AKP កំពង់ធំ ថ្ងៃទី១០ ខែកក្កដា ឆ្នាំ២០២៥-- លោក វណ្ណៈ សោភានិត អភិបាលនៃគណៈអភិបាលស្រុកប្រាសាទបល្ល័ង្ក បានបញ្ជាក់ថា ប្រជាការពារភូមិជាកម្លាំងស្នូលក្នុងមូលដ្ឋាន ដើម្បីការពារសុវត្ថិភាពប្រជាពលរដ្ឋ និងនៅជិតពលរដ្ឋជាងគេបំផុត ក្នុងឱកាសដែលលោកអញ្ជើញជាអធិបតីក្នុងពិធីសំណេះសំណាល និងចែកជូនឯកសណ្ឋានដល់ប្រជាការពារចំនួន៨០៩នាក់ (ស្រី១៤នាក់) និងផ្ដល់ជូននូវចំណងដៃគូស្វាមីបានរៀបអាពាហ៍ពិពាហ៍ថ្មីចំនួន១៤៥គូ ដែលជាអំណោយដ៏ថ្លៃថ្លារបស់លោកអ្នកឧកញ៉ាបណ្ឌិត ទ្រី ភាព បេសកជនពិសេសសម្ដេចអគ្គមហាសេនាបតីតេជោ ហ៊ុន សែន អនុប្រធានក្រុមការងារចុះមូលដ្ឋានខេត្តកំពង់ធំ នាព្រឹកថ្ងៃទី១០ ខែកក្កដា ឆ្នាំ២០២៥។

លោក វណ្ណៈ សោភានិត បានលើកឡើងថា កម្លាំងប្រជាការពារគឺជាកម្លាំងស្នូលដ៏សំខាន់សម្រាប់អាជ្ញាធរក្នុងមូលដ្ឋានដើរតួនាទីយ៉ាងសំខាន់ក្នុងការចូលរួមសហការគ្រប់សកម្មភាព របស់អាជ្ញាធរមិនថាកិច្ចការងារសន្តិសុខ មនុស្សធម៌ ឬការងាររដ្ឋបាលផ្សេងៗ ដូចជាការជួយសម្រួលចរាចរណ៍កកស្ទះ រៀបចំសណ្តាប់ធ្នាប់ ក្នុងមូលដ្ឋានជាដើម គឺតែងតែមានវត្តមានរបស់ពួកគាត់ នៅជាមួយសកម្មភាពទាំងនេះជានិច្ច។

លោកអភិបាលស្រុកក៏បានកោតសរសើរ និងវាយតម្លៃខ្ពស់ចំពោះបងប្អូនជាប្រជាការពារទាំងអស់ ដែលបានលះបង់ពេលវេលា កម្លាំងកាយ កម្លាំងចិត្ត និងប្រាជ្ញាស្មារតី ចូលរួមសហការជាមួយអាជ្ញាធរដែនដី ធ្វើឱ្យភូមិឃុំរបស់យើងមានសន្តិសុខ សណ្តាប់ធ្នាប់ល្អ ជាភូមិឃុំប្រកបដោយសុវត្ថិភាព ពិសេសគឺ ចូលរួមការពារសមិទ្ធផលនានា ដែលជាសម្បត្តិរួមឱ្យបានគង់វង់យូរអង្វែង ដើម្បីជាប្រយោជន៍របស់យើងទាំងអស់គ្នា និងកូនចៅជំនាន់ក្រោយ។ដោយមានការគាំទ្ររបស់រាជរដ្ឋាភិបាល តាមរយៈការអនុវត្តគោលនយោបាយ ភូមិឃុំមានសុវត្ថិភាព ធ្វើឱ្យយើងអាចរក្សាបាន សន្តិសុខ សណ្តាប់ធ្នាប់សាធារណៈបានល្អ បង្ក្រាបបានបទល្មើសគ្រប់ប្រភេទ ធ្វើឱ្យប្រជាពលរដ្ឋរស់នៅដោយសុខដុមរម្យនាមានការអភិវឌ្ឍរីកចម្រើនលើគ្រប់វិស័យនិងធ្វើឱ្យភាពក្រីក្រក្នុងមូលដ្ឋានបានថយចុះមួយកម្រិតផងដែរ។

លោក វណ្ណៈ សោភានិត អភិបាលស្រុក បានសង្កត់ធ្ងន់ថា សន្តិភាពនេះរកបានមកដោយលំបាក ក្រោមការតស៊ូប្តូរផ្តាច់យកជីវិតទៅប្តូរ យកសន្តិភាពពីប្រមុខរាជរដ្ឋាភិបាលកម្ពុជា ដែលមានសម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងសម្ដេចធិបតី  ហ៊ុន ម៉ាណែត ជានាយករដ្ឋមន្ត្រីនៃព្រះរាជាណាចក្រកម្ពុជា ដែលជាប្រមុខដឹកប្រទេសដ៏ឈ្លាសវៃ បានប្រែក្លាយប្រទេសជាតិ តាំងពីបាតដៃទទេរឱ្យការរីកចម្រើនលើគ្រប់វិស័យ។

សូមបញ្ជាក់ថា អំណោយរួមមាន ឃុំដូង៩៤ឈុត ឃុំសាមគ្គី៧២ឈុត ឃុំក្រយា៦៨ឈុត ឃុំសាគ្រាម១២៧ឈុត ឃុំផាន់ញើម៩២ឈុត ឃុំសាលាវិស័យ២៧២ឈុត និងឃុំទួលគ្រើល៨៤ឈុត ព្រមទាំងបានផ្ដល់ជូនចំណងដៃដល់គូស្វាមីចំនួន១៤៥គូ ក្នុង១គូចំនួន១០០ដុល្លារដែលជាថវិការបស់លោកអ្នកឧកញ៉ាបណ្ឌិត ទ្រី ភាព បេសកជនពិសេស សម្ដេចអគ្គមហាសេនាបតីតេជោ ហ៊ុន សែន និងជាអនុប្រធានក្រុមការងារចុះមូលដ្ឋានខេត្តកំពង់ធំ៕

ដោយ ស៊ុម វណ្ណា