AKP ភ្នំពេញ ថ្ងៃទី១០ ខែកក្កដា ឆ្នាំ២០២៥--

សាកលវិទ្យាល័យភូមិន្ទវិចិត្រសិល្បៈបានរៀបចំប្រជុំក្រុមប្រឹក្សាភិបាល អាណត្តិទី២ លើកទី៤ ក្រោមអធិបតីភាព ឯកឧត្តម សោម សុគន្ធ រដ្ឋលេខាធិការនៃក្រសួងវប្បធម៌ និងវិចិត្រសិល្បៈ និងជាប្រធានក្រុមប្រឹក្សាភិបាលនៃសាកលវិទ្យាល័យភូមិន្ទវិចិត្រសិល្បៈ នៅថ្ងៃទី១០ ខែកក្កដា ឆ្នាំ ២០២៥ ដោយមានការអញ្ជើញចូលរួមឯកឧត្តម ហេង  សុផាឌី សាកលវិទ្យាធិការ លោក ឡុង ចាន់តុលា ប្រធាននាយកដ្ឋាន តាមដាននិងវាយតម្លៃនៃអគ្គនាយកដ្ឋានថវិកា ក្រសួងសេដ្ឋកិច្ច និងហរិញ្ញវត្ថុ លោក ស៊ុន ចាន់ដឹប ប្រធានសិក្សាធិការដ្ឋាន និងជាតំណាងបុគ្គលិកក្រុមប្រឹក្សាភិបាល សាកលវិទ្យាធិការរង ប្រធាន -អនុប្រធានលេខាធិការដ្ឋាន និងមន្ត្រីរាជការដែលពាក់ព័ន្ធ សរុបចំនួន ១៦នាក់។  

ឯកឧត្តម សោម សុគន្ធ បានមានប្រសាសន៍ថា កិច្ចប្រជុំនេះមានគោលបំណងកែសម្រួលគោលការណ៍ណែនាំ ដើម្បីឱ្យមានប្រសិទ្ធភាពការងារ និងការបណ្តុះ  បណ្តាលប្រកបដោយគុណភាព សមត្ថភាព និងសីលធម៌ ដែលផ្តោតលើរបៀបវារៈចំនួន ៦រួមមាន៖ ទី១-របាយការណ៍ស្តីពីវឌ្ឍនភាពការងាររបស់សាកលវិទ្យាល័យភូមិន្ទវិចិត្រសិល្បៈ ទី២-របាយការណ៍ស្តីពីការងារបណ្តុះបណ្តាលនិស្សិតក្នុងឆ្នាំសិក្សា២០២៤-២០២៥ និងការកែសម្រួលលក្ខខណ្ឌមួយចំនួនក្នុងការជ្រើសរើសនិស្សិតឱ្យចូលរៀនសម្រាប់ឆ្នាំសិក្សា ២០២៥-២០២៦ ទី៣-វឌ្ឍនភាពការងារ នៃការរៀបចំពិធីចែកសញ្ញាបត្រដល់និស្សិត ដែលនឹងប្រព្រឹត្តទៅនៅថ្ងៃទី៧ ខែសីហា ឆ្នាំ២០២៥ ទី៤-សកម្មភាពការងារនិងថវិកា នៃគម្រោងកែលម្អការអប់រំឧត្តមសិក្សាទី២ (HEIP2) ប្រចាំឆ្នាំ២០២៥ ទី៥-របាយការណ៍ថវិកាចំណូល-ចំណាយឆ្នាំ២០២៥ និងទី៦-ផែនការថវិកាឆ្នាំ២០២៦៕

ដោយ ណយ នឿន (ប្រភព៖ ក្រសួងវប្បធម៌)