AKP ឧត្តរមានជ័យ ថ្ងៃទី១០ ខែកក្កដា ឆ្នាំ២០២៥-- ឯកឧត្តម ប៊ុន ច័ន្ទវណ្ណៈ រដ្ឋលេខាធិការក្រសួងអភិវឌ្ឍន៍ជនបទ តំណាងឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ និងលោក ហោ ជិនវិរៈយុទ្ធ អភិបាលរងខេត្តឧត្តរមានជ័យ កាលពីព្រឹកថ្ងៃទី០៩ ខែកក្កដា ឆ្នាំ២០២៥ អញ្ជើញបើកការដ្ឋានស្ថាបនាផ្លូវក្រាលដីល្បាយគ្រួសចំនួន១ខ្សែ មាន៤កំណាត់ ប្រវែងសរុប៩០០០ម៉ែត្រ ទទឹង៨ម៉ែត្រ កម្រាស់០,២ម៉ែត្រ សាងសង់លូមូលមុខមួយចំនួន៦កន្លែង និងលូមូលមុខពីរចំនួន២កន្លែង ស្ថិតនៅទីតាំងដីសម្បទានសង្គមកិច្ច ក្នុងភូមិស្រះទឹកតេជោសែនជ័យ ឃុំចុងកាល់ ស្រុកចុងកាល់ ខេត្តឧត្តរមានជ័យ ដោយមានការចូលរួមពីប្រធានមន្ទីរអភិវឌ្ឍន៍ជនបទខេត្ត អាជ្ញាធរស្រុកចុងកាល់ ព្រមទាំងប្រជាពលរដ្ឋជាច្រើនរូបទៀត។

ឯកឧត្តម ប៊ុន ច័ន្ទវណ្ណៈ បានផ្តាំផ្ញើសួរសុខទុក្ខប្រកបដោយមនោសញ្ចេតនា និងសេចក្តីនឹករលឹកយ៉ាងជ្រាលជ្រៅបំផុតពីសម្តេចតេជោ ហ៊ុន សែន បិតាស្ថាបនិកសន្តិភាព និងមគ្គទេសក៍ឯកដឹកនាំប្រទេសកម្ពុជា ប្រធានក្រុមឧត្តមប្រឹក្សាផ្ទាល់ព្រះមហាក្សត្រ និងជាប្រធានព្រឹទ្ធសភា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន សម្តេចមហាបវរធិបតី ហ៊ុន ម៉ា ណែត នាយករដ្ឋមន្ត្រីនៃកម្ពុជា និងលោកជំទាវ បណ្ឌិត ពេជ ចន្ទមុន្នី ហ៊ុនម៉ាណែត និងផ្តាំផ្ញើសាកសួរសុខទុក្ខពីលោក ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ ជូនចំពោះលោក លោកស្រី បងប្អូនប្រជាពលរដ្ឋទាំងអស់ដែលមានវត្តមាននៅទីនេះ។ ក្នុងនាម ឯកឧត្តម ឆាយ ឫទ្ធិសែន សូមចូលរួមអបអរសាទរ និងសប្បាយរីករាយជាមួយបងប្អូនប្រជាពលរដ្ឋ និងអាជ្ញាធរគ្រប់លំដាប់ថ្នាក់នៅក្នុងមូលដ្ឋាននេះ ចំពោះការទទួលបាន សមិទ្ធផលថ្មីបន្ថែមទៀតពីរាជរដ្ឋាភិបាលកម្ពុជា តាមរយៈក្រសួងអភិវឌ្ឍន៍ជនបទគឺផ្លូវ១ខ្សែនេះ ត្រូវបានកសាងក្រោមគោលនយោបាយ និងយុទ្ធសាស្ត្រអភិវឌ្ឍន៍ ប្រទេសជាតិនៃរាជរដ្ឋាភិបាល ដែលកើតចេញពីការបោះឆ្នោតជ្រើសតាំងតំណាងរាស្ត្រនីតិកាលទី៧។

ឯកឧត្តមបន្តថា ជាមួយនឹងភាពរីកចម្រើន និងសុខសន្តិភាព រាជរដ្ឋាភិបាលអាណត្តិទី៧ ក្រោមការដឹកនាំដ៏ត្រឹមត្រូវ ឈ្លាសវៃ និងប្រកបដោយសមត្ថភាពនិងចក្ខុវិស័យវែងឆ្ងាយរបស់សម្តេចមហាបវរធិបតី ហ៊ុន ម៉ាណែត ជានាយករដ្ឋមន្ត្រី មានឆន្ទៈយ៉ាងម៉ុតមាំក្នុងការថែរក្សាសមិទ្ធផលនានា ដែលបានកសាងឡើងពីបាតដៃទទេរតាំងពីឆ្នាំ១៩៧៩ រហូតមកដល់បច្ចុប្បន្ន ជាពិសេស ការពារសុខសន្តិភាព និងស្ថេរភាពឱ្យខានតែបានដើម្បីបន្តដឹកនាំ និងអភិវឌ្ឍប្រទេសជាតិឆ្ពោះទៅសម្រេចបានចក្ខុវិស័យ កម្ពុជាជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសមានចំណូលខ្ពស់ នៅឆ្នាំ២០៥០។

ឯកឧត្តមរដ្ឋលេខាធិការបានថ្លែងបន្តទៀតថា ជាក់ស្តែងផ្លូវ ១ខ្សែនេះនឹងបង្កភាពងាយស្រួលដល់ប្រជាពលរដ្ឋយើង ក្នុងការធ្វើដំណើរ ចំណេញពេលវេលា កាត់បន្ថយការចំណាយលើការដឹកជញ្ជូនសម្ភារៈ ឬផលិតផលផ្សេងៗទៅកាន់ទីផ្សារ និងងាយស្រួលក្នុង ការទទួលបាននូវសេវាសាធារណៈ ដូចជាទៅផ្សារ សាលារៀន មន្ទីរពេទ្យជាដើម។ ហេតុនេះសូមបងប្អូនប្រជាពលរដ្ឋ និងអាជ្ញាធរ គ្រប់ថ្នាក់ទាំងអស់ ចូលរួមថែរក្សាសមិទ្ធផលដែលទទួលបានថ្មីនេះ តាមរយៈការសម្អាតបរិស្ថានតាមដងផ្លូវ កុំឱ្យមានដក់ទឹក ស្ទះទឹកតាម ប្រឡាយ ឬចង្ហូរទឹក នៅសងខាងផ្លូវជាដើម ។ សូមដាក់លូបង្ហូរទឹក ឬធ្វើស្ពានចូលផ្ទះ និងសម្អាតប្រឡាយ ឬចង្ហូរទឹក នៅតាមមុខផ្ទះជាប្រចាំនិងទុកដាក់សម្រាម ជាពិសេស ថង់ ដបប្លាស្ទិក និងសម្ភារធ្វើពីប្លាស្ទិកផ្សេងៗឱ្យបានត្រឹមត្រូវ ដើម្បីឱ្យភូមិ និងឃុំយើងមានអនាម័យល្អ និងបរិស្ថានស្អាត៕

ដោយ ទិត ស្រ៊