AKP បន្ទាយមានជ័យ ថ្ងៃទី១០ ខែកក្កដា ឆ្នាំ២០២៥--ប្រជាពលរដ្ឋក្នុងឃុំតាគង់ ស្រុកម៉ាឡៃ ខេត្តបន្ទាយមានជ័យ កំពុងទទួលបានផលប្រយោជន៍យ៉ាងច្រើនពីគម្រោងកម្មវិធីអភិវឌ្ឍន៍ និងធ្វើឱ្យប្រសើរឡើងលើវិស័យផ្គត់ផ្គង់ទឹកស្អាត និងអនាម័យជនបទ ប្រកបដោយនិរន្តរភាព។ គម្រោងដ៏សំខាន់នេះត្រូវបានអនុវត្តដោយក្រសួងអភិវឌ្ឍន៍ជនបទ ក្នុងគោលបំណងលើកកម្ពស់សុខភាព និងជីវភាពរស់នៅរបស់ប្រជាពលរដ្ឋនៅតាមទីជនបទ។

ក្នុងឱកាសចុះពិនិត្យវឌ្ឍនភាពគម្រោងដោយផ្ទាល់នៅឃុំតាគង់ កាលពីថ្ងៃទី០៩ ខែកក្កដា ឆ្នាំ២០២៥ លោក ជា យុទ្ធារុណ ប្រធានមន្ទីរអភិវឌ្ឍន៍ជនបទខេត្តបន្ទាយមានជ័យ បានឱ្យដឹងថា ការចុះពិនិត្យនេះគឺដើម្បីធានាថាគម្រោងត្រូវបានអនុវត្តទៅតាមផែនការ និងផ្តល់អត្ថប្រយោជន៍ពិតប្រាកដដល់ប្រជាពលរដ្ឋ។ សមិទ្ធផលសំខាន់ៗនៃគម្រោងតាមរយៈគម្រោងនេះ ក្រសួងអភិវឌ្ឍន៍ជនបទបានផ្តល់ជូនប្រជាពលរដ្ឋក្នុងឃុំតាគង់នូវសមិទ្ធផលសំខាន់ៗជាច្រើន រួមមានស្តារស្រះសហគមន៍ចំនួន ៦ កន្លែងការស្តារស្រះទាំងនេះនឹងជួយបង្កើនសមត្ថភាពស្តុកទឹកសម្រាប់ការប្រើប្រាស់ប្រចាំថ្ងៃ និងកសិកម្ម។ អណ្តូងខួងបំពាក់ស្នប់ចំនួន ៣៥ អណ្តូងទាំងនេះនឹងផ្តល់ប្រភពទឹកស្អាតសម្រាប់ប្រើប្រាស់ប្រចាំថ្ងៃដល់គ្រួសារជាច្រើន។ ពាងត្រងទឹកភ្លៀងចំណុះ ១,០០០ លីត្រ ចំនួន ៣,៦២៥ ពាងការចែកចាយពាងត្រងទឹកភ្លៀងនេះ គឺដើម្បីលើកកម្ពស់ការប្រមូល និងស្តុកទឹកភ្លៀងសម្រាប់ប្រើប្រាស់នៅតាមផ្ទះ។ ធុងជ័រត្រងទឹកភ្លៀងចំណុះ ១០,០០០ លីត្រ សម្រាប់សាលារៀន និងមណ្ឌលសុខភាព ចំនួន ១៤ ធុង ការផ្តល់ធុងទឹកធំៗទាំងនេះ គឺដើម្បីធានាការផ្គត់ផ្គង់ទឹកស្អាតគ្រប់គ្រាន់នៅតាមកន្លែងសាធារណៈសំខាន់ៗ។ បង្គន់អនាម័យតាមសាលារៀនចំនួន ២ កន្លែងការសាងសង់បង្គន់អនាម័យនៅតាមសាលារៀននឹងជួយលើកកម្ពស់អនាម័យ និងសុខភាពរបស់សិស្សានុសិស្ស។ បង្គន់អនាម័យគ្រួសារចំនួន ១៣៣ បង្គន់ ការសាងសង់បង្គន់អនាម័យសម្រាប់គ្រួសារនឹងជួយកាត់បន្ថយការបន្ទោរបង់ពាសវាលពាសកាល និងការពារការរីករាលដាលនៃជំងឺឆ្លង។

លោក ជា យុទ្ធារុណ បានឱ្យដឹងទៀតថា គម្រោងអភិវឌ្ឍន៍ និងធ្វើឱ្យប្រសើរឡើងលើវិស័យផ្គត់ផ្គង់ទឹកស្អាត និងអនាម័យជនបទនេះ គឺជាអាទិភាពចម្បងមួយរបស់រាជរដ្ឋាភិបាលក្រោមការដឹកនាំប្រកបដោយគតិបណ្ឌិតរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជាដែលមានក្រសួងអភិវឌ្ឍន៍ជនបទជាសេនាធិការ ក្នុងការលើកកម្ពស់គុណភាពជីវិតរបស់បងប្អូនប្រជាពលរដ្ឋនៅតាមជនបទ។ យើងយល់ថាទឹកស្អាត និងអនាម័យល្អ គឺជារឿងចាំបាច់បំផុតសម្រាប់សុខភាព និងការអភិវឌ្ឍប្រកបដោយចីរភាព។

លោកបានបន្តទៀតថា ការផ្តល់ជូននូវសមិទ្ធផលទាំងនេះនឹងជួយកាត់បន្ថយបន្ទុកប្រចាំថ្ងៃរបស់បងប្អូនប្រជាពលរដ្ឋក្នុងការស្វែងរកប្រភពទឹកស្អាត ព្រមទាំងរួមចំណែកកាត់បន្ថយអត្រាជំងឺដែលបង្កឡើងដោយកង្វះអនាម័យ។ ខ្ញុំសង្ឃឹមថាប្រជាពលរដ្ឋនឹងប្រើប្រាស់ និងថែរក្សាសមិទ្ធផលទាំងនេះឱ្យបានល្អ ដើម្បីផលប្រយោជន៍យូរអង្វែង។

ប្រជាពលរដ្ឋក្នុងឃុំតាគង់ជាច្រើនបានសម្តែងនូវក្តីរីករាយ និងថ្លែងអំណរគុណយ៉ាងជ្រាលជ្រៅចំពោះក្រសួងអភិវឌ្ឍន៍ជនបទ ក៏ដូចជាអាជ្ញាធរពាក់ព័ន្ធ ដែលបាននាំយកគម្រោងដ៏មានសារៈសំខាន់នេះមកកាន់ឃុំរបស់ពួកគាត់។

លោក វណ្ណឌី ជាប្រជាពលរដ្ឋម្នាក់រស់នៅឃុំតាគង់ បានថ្លែងទាំងទឹកមុខញញឹមថា កាលពីមុន ពួកខ្ញុំពិបាករកទឹកស្អាតប្រើណាស់ ជាពិសេសនៅរដូវប្រាំង។ ពេលខ្លះត្រូវដើរឆ្ងាយដើម្បីដងទឹក។ តែឥឡូវមានអណ្តូងខួង មានពាងត្រងទឹកភ្លៀង ហើយថែមទាំងមានបង្គន់អនាម័យទៀត ធ្វើឲ្យជីវភាពពួកខ្ញុំស្រួលជាងមុនឆ្ងាយណាស់។ ចំណែកអ្នកស្រី សុភី ដែលជាមាតាបិតាសិស្សម្នាក់ បានលើកឡើងថា កូនៗខ្ញុំទៅរៀនឥឡូវលែងបារម្ភរឿងគ្មានទឹកស្អាតលាងដៃ ឬបង្គន់ស្អាតប្រើហើយ។ នេះពិតជាសមិទ្ធផលដ៏ធំធេងដែលបានជួយលើកកម្ពស់សុខភាពកូនចៅយើង។

សូមជម្រាបថាគម្រោងកម្មវិធីអភិវឌ្ឍន៍ និងធ្វើឱ្យប្រសើរឡើងលើវិស័យផ្គត់ផ្គង់ទឹកស្អាត និងអនាម័យជនបទ ប្រកបដោយនិរន្តរភាពនេះ ត្រូវបានគេរំពឹងថា នឹងបន្តរួមចំណែកយ៉ាងសំខាន់ក្នុងការកែលម្អគុណភាពជីវិត និងសុខភាពសាធារណៈរបស់ប្រជាពលរដ្ឋនៅទូទាំងប្រទេស ជាពិសេសនៅតំបន់ជនបទដាច់ស្រយាល៕

ដោយ ឈុន សារ៉ាត