AKP ភ្នំពេញ ថ្ងៃទី០៩ ខែកក្កដា ឆ្នាំ២០២៥--

ឯកឧត្តម ម៉េត មករា រដ្ឋលេខាធិការ និងជាអនុប្រធានក្រុមប្រឹក្សាសកម្មភាពជនពិការនៃក្រសួងសង្គមកិច្ច អតីតយុទ្ធជន និងយុវនីតិសម្បទា នាថ្ងៃទី០៩ ខែកក្កដា ឆ្នាំ២០២៥ បានអញ្ជើញជាអធិបតីក្នុងពិធីបើកវគ្គបណ្ដុះបណ្ដាលស្ដីពី "សិទ្ធិទទួលបានយុត្តិធម៌សម្រាប់ជនមានពិការភាពក្នុងប្រព័ន្ធយុត្តិធម៌" ជាមួយមន្ត្រីយុត្តិធម៌ នៅខេត្ដបាត់ដំបង។

ឯកឧត្តម ម៉េត មករា បានលើកឡើងថា គោលបំណងវគ្គបណ្តុះបណ្តាលនេះមានចំណុចសំខាន់ដូចជា៖ ទី១. លើកកម្ពស់ការយល់ដឹងអំពីសិទ្ធិរបស់ជនមានពិការភាព ស្របតាមបទដ្ឋានសិទ្ធិមនុស្សអន្តរជាតិ និងក្របខណ្ឌគតិយុត្តិជាតិ។ ទី២. លើកកម្ពស់ការយល់ដឹងអំពីគម្រូសិទ្ធិមនុស្សក្នុងវិស័យពិការភាព និងរបៀបអនុវត្តគម្រូសិទ្ធិមនុស្សនេះ នៅក្នុងកិច្ចការងាររបស់មន្ត្រីក្នុងប្រព័ន្ធយុត្តិធម៌។ ទី៣. ស្វែងយល់ពីរបៀបនៃការអនុវត្តកាតព្វកិច្ចក្នុងក្របខណ្ឌច្បាប់ជាតិ និងអន្តរជាតិដើម្បីផ្តល់នូវយុត្តិធម៌ ពេលមានសំណុំរឿងទាក់ទងនឹងជនមានពិការភាព នៅក្នុងដំណើរការនីតិវិធីតុលាការ។ ទី៤. កំណត់បញ្ហា ទទួលស្គាល់ និងកាត់បន្ថយឧបសគ្គនានា ដែលជនមានពិការភាពជួបប្រទះ នៅពេលពួកគេអនុវត្តសិទិ្ធរបស់ខ្លួន និងទី៥. កំណត់ឱកាសទាំងឡាយដើម្បីពង្រឹងកិច្ចសហប្រតិបត្តិការរវាងតួអង្គក្នុងប្រព័ន្ធយុត្តិធម៌ និងអង្គការតំណាងជនមានពិការភាព ព្រមទាំងដៃគូនានានៅថ្នាក់មូលដ្ឋាន ដើម្បីលើកកម្ពស់សិទ្ធិទទួលបានយុត្តិធម៌សម្រាប់ជនមានពិការភាព។

វគ្គបណ្តុះបណ្តាលនេះមានរយៈពេល២ថ្ងៃ ពីថ្ងៃទី០៩-១០ ខែកក្កដា ឆ្នាំ២០២៥ ដែលរៀបចំឡើងក្រោមកិច្ចសហការរវាងក្រសួងសង្គមកិច្ច អតីតយុទ្ធជន និងយុវនីតិសម្បទា ក្រសួងយុត្តិធម៌ អគ្គលេខាធិការក្រុមប្រឹក្សាសកម្មភាពជនពិការ រដ្ឋបាលខេត្តបាត់ដំបង និង ការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សប្រចាំកម្ពុជា (UNOHCHR) និងមានការចូលរួមពីមន្ត្រីយុត្តិធម៌ ដែលជាចៅក្រម ព្រះរាជអាជ្ញារង ចៅក្រមកម្មសិក្សា ប្រធាន អនុប្រធានការិយាល័យ មកពីខេត្តគោលដៅ ចំនួន៧ រួមមាន ខេត្តបាត់ដំបង ខេត្តសៀមរាប ខេត្តឧត្តរមានជ័យ ខេត្តបន្ទាយមានជ័យ ខេត្តប៉ៃលិន ខេត្តពោធិ៍សាត់ ខេត្តកំពង់ឆ្នាំង និស្សិតផ្នែកច្បាប់ អង្គការជាតិ អន្តរជាតិ និងអ្នកពាក់ព័ន្ធ សរុបចំនួន ៦២នាក់៕

ដោយ ណយ នឿន (ប្រភព៖ ក្រសួងសង្គមកិច្ច)