AKP ភ្នំពេញ ថ្ងៃទី០៩ ខែកក្កដា ឆ្នាំ២០២៥--

ឯកឧត្តមសន្តិបណ្ឌិត ម៉ៅ ច័ន្ទតារា រដ្ឋមន្ត្រីស្តីទីក្រសួងមហាផ្ទៃ នាព្រឹកថ្ងៃទី០៩ ខែកក្កដា ឆ្នាំ២០២៥ បានដឹកនាំកិច្ចប្រជុំពិនិត្យ និងពិភាក្សាលើសេចក្តីព្រាងអនុក្រឹត្យស្តីពីការគ្រប់គ្រងការផ្សព្វផ្សាយពាណិជ្ជកម្មគ្រប់ប្រភេទនៅរដ្ឋបាលថ្នាក់ក្រោមជាតិ ដោយមានការអញ្ជើញចូលរួមពីអនុរដ្ឋលេខាធិការ អគ្គនាយក ប្រធានក្រុមប្រឹក្សានីតិកម្ម អគ្គនាយករង ប្រធានអង្គភាព អនុប្រធាននាយកដ្ឋាន តំណាងលេខាធិការដ្ឋាន គ. ជ. អ. ប. លោក លោកស្រី និងមន្ត្រីជំនាញដែលពាក់ព័ន្ធចំណុះអគ្គនាយកដ្ឋានរដ្ឋបាលជាច្រើនរូប។

ក្នុងកិច្ចប្រជុំនេះ ឯកឧត្តម សន្តិបណ្ឌិត ម៉ៅ ច័ន្ទតារា មានប្រសាសន៍ថា កិច្ចប្រជុំនាពេលនេះធ្វើឡើងដើម្បីត្រួតពិនិត្យ និងពិភាក្សា ក៏ដូចជាផ្តល់ជាមតិយោបល់រួមចំណែកកែសម្រួលទៅលើសេចក្តីព្រាងអនុក្រឹត្យស្តីពីការគ្រប់គ្រងការផ្សព្វផ្សាយពាណិជ្ជកម្មគ្រប់ប្រភេទនៅរដ្ឋបាលថ្នាក់ក្រោមជាតិនេះឱ្យកាន់តែមានភាពច្បាស់លាស់ និងគ្រប់ជ្រុងជ្រោយ ក្នុងនោះលោក ឆាង វ័យ ប្រធាននាយកដ្ឋានកិច្ចការរដ្ឋបាលរាជធានី ខណ្ឌ និងខេត្ត បានធ្វើសេចក្តីរាយការណ៍ជូនអង្គប្រជុំនូវចំណុចដែលបានកែសម្រួលនាកិច្ចប្រជុំបច្ចេកទេសកន្លងមក ហើយអង្គប្រជុំក៏បានបន្តពិនិត្យ និងផ្តល់ធាតុចូលលើសេចក្តីព្រាងអនុក្រឹត្យនេះបន្ថែមផងដែរ។ 

ឯកឧត្តមរដ្ឋមន្រ្តីស្តីទីបានស្នើដល់អគ្គនាយកដ្ឋានរដ្ឋបាល នាយកដ្ឋានជំនាញ និងក្រុមការងារបច្ចេក ទេសឱ្យបន្តពិនិត្យឡើងវិញនូវទម្រង់ ខ្លឹមសារ ឃ្លាឃ្លោង និងការប្រើប្រាស់វាក្យសព្ទឱ្យមានលក្ខណៈសង្គតិភាព ផ្អែកតាមទិដ្ឋភាពច្បាប់ បរិបទសង្គម និងបច្ចេកទេសទៅលើមូលបទ សេចក្តីយោង ជំពូក និងមាត្រាដែលមានចែងក្នុងសេចក្តីព្រាងអនុក្រឹត្យនេះ។ បន្ថែមពីនេះ ឯកឧត្តមសន្តិបណ្ឌិតក៏បានសំណូមពរដល់ក្រុមការងារឱ្យរួសរាន់កែសម្រួល និងរៀបចំដាក់ប្រជុំឆ្លងជាថ្មីម្តងទៀតនៅចុងខែកក្កដានេះ៕

ដោយ៖ ចាន់ សុភឿន (ប្រភព៖ ក្រសួងមហាផ្ទៃ)