AKPភ្នំពេញ៖ថ្ងៃទី ៨ ខែ កក្កដា ឆ្នាំ ២០២៥--

លោក ដូ ណាល់ត្រាំ ប្រធានាធិបតីសហរដ្ឋអាមេរិក បាន ផ្ញើលិខិតមកកាន់ នាយករដ្ឋមន្ត្រីកម្ពុជា សម្តេចធិបតី ហ៊ុន ម៉ាណែត អំពីការកំណត់អត្រាពន្ធគយថ្មីមកលើកម្ពុជា ដែលបានចុះពី៤៩ភាគរយ មក ៣៦ ភាគរយនេះចាត់ទុកជាជោគជ័យធំមួយរបស់កម្ពុជាក្នុងជំហ៊ានទី១ក្នុងការចរចាពន្ធបដិការរបស់យើង។ នេះជាការថ្លែបញ្ជាក់ពីសំណាក់ ឯកឧត្តម ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១ ក្រុមប្រឹក្សាអភិវឌ្ឍន៍កម្ពុជា។
    ថ្លែងក្នុងសន្និសីទសារព័ត៌មាននារសៀលថ្ងៃទី ០៨ ខែ កក្កដា ឆ្នាំ ២០២៥នេះឯកឧត្តម ឧបនាយករដ្ឋមន្ត្រី ស៊ុន ចាន់ថុល បានឱ្យដឹងថាកាលពីថ្ងៃទី២ ខែ មេសា ឆ្នាំ ២០២៥ពន្ធបដិការដែលសហរដ្ឋអាមេរិកបានកំណត់មកកម្ពុជា៤៩ភាគរយ ឥឡូវនេះចុះមក៣៦ភាគរយ បើប្រៀបធៀបជាមួយប្រទេសផ្សេងៗទៀតដូចជាប្រទេសឡាវ ប្រទេសមីយ៉ាន់ម៉ា និងប្រទេសផ្សេងៗទៀតឃើញថាអត្រាពន្ធបដិការមានការចុះ និងខ្លះទៀតថេរ ប៉ុន្តែក្នុងចំណោមនេះមានប្រទេសមួយចំនួនពន្ធបដិការនេះបានឡើងពី២៥ទៅជា២៦ភាគរយវិញក្នុងនេះដូចជាប្រទេសជប៉ុនមានការតម្លើងពី២៤ទៅជា២៥ភាគរយជាដើម។បើប្រៀបធៀបគឺកម្ពុជាយើងទទួលបានជោគជ័យណាស់ គឺជោគជ័យក្នុងការចរចា ហើយការទទួលបានជោគជ័យនេះដោយសារយើងចរចាដោយសុចរិត ដោយស្មោះត្រង់។

 ឯកឧត្តម ឧបនាយករដ្ឋមន្ត្រី ស៊ុន ចាន់ថុលបានមានប្រសាសន៍ថា”ខ្ញុំសូមជំរាបថាពន្ធបដិការនេះនឹង ចូលជាធរមានថ្ងៃទី១ ខែ សីហា ឆ្នាំ២០២៥ក្នុងករណីយើងមិនមានការចរចាបន្ថែមទៀតជាមួយប្រទេសសហរដ្ឋអាមេរិកទេ។ទោះបីយ៉ាងណាក្នុងលិខិតរបស់ប្រធានាធិបតី សហរដ្ឋអាមេរិក ដូណាល់ត្រាំ បានផ្ញើរជូនសម្តេចបវរ ធិបតី ហ៊ុន ម៉ាណែត គឺបើកឱកាសឱ្យយើងទៅចរចា បន្ថែមទៀតឱ្យបានមុនថ្ងៃទី១ ខែ សីហា ឆ្នាំ ២០២៥”។
       ជុំវិញបញ្ហានេះដែរ ឯកឧត្តម ឧបនាយករដ្ឋមន្ត្រីបានបញ្ជាក់បន្ថែមថា”ខ្ញុំបានផ្ញើរអ៊ីម៉ែលទៅកាន់តំណាងពាណិជ្ជកម្មសហរដ្ឋអាមេរិក ព្រឹកម៉ិញនេះ(ថ្ងៃទី៨ ខែ កក្កដា ឆ្នាំ ២០២៥)ថាយើងខ្ញុំត្រៀមខ្លួនជាស្រេចក្នុងការធ្វើដំណើរឬចរចាតាមប្រព័ន្ធអនឡាញដើម្បីបន្ថយអត្រាពន្ធបដិការថែមទៀត។ខ្ញុំសុំជំរាបថាអត្រាពន្ធនេះមិនមែនអត្រាជាក់ស្តែង ចូលជាធរមានពិតប្រាកដទេពោលគឺយើងនៅមានឱកាស ទៅចរចាបន្ថែមទៀតដើម្បីបន្ថយអត្រាពន្ធបដិការនេះ”។

      ជាមួយគ្នាកម្ពុជាក៏សូមថ្លែងអំណរគុណដល់ប្រធានាធិបតី សហរដ្ឋអាមេរិកដែលបានបញ្ចុះអត្រាពន្ធជូនដល់កម្ពុជាពី ៤៩មកត្រឹម ៣៦ភាគរយ ហើយយើងនឹងបន្តចរចា ដើម្បីបន្ថយអត្រាពន្ធនេះផង និងក៏ដូចជាពង្រឹងពង្រីកលើវិស័យពាណិជ្ជកម្មទ្វេរភាគី រវាងកម្ពុជា និងសហរដ្ឋអាមេរិក។
   ទន្ទឹមជាមួយគ្នា ឯកឧត្តម ឧបនាយករដ្ឋមន្ត្រី ស៊ុន ចាន់ថុល បានអំពាវនាវដល់ក្រុមហ៊ុនដែលមាននៅកម្ពុជា សុំថែរក្សាភាពស្ងប់ស្ងៀម រាជរដ្ឋាភិបាលកម្ពុជា មានលទ្ធភាព គ្រប់បែបយ៉ាងដើម្បីការពារវិនិយោជិតដើម្បីផលប្រយោជន៍របស់កម្ពុជាយើង។ជាមួយគ្នានេះសូមអំពាវនាវដល់បងប្អូនប្រជាពលរដ្ឋកម្ពុជាយើង ឱ្យជឿទុកចិត្តលើរាជរដ្ឋាភិបាលក្នុងការបន្តកិច្ចខិតខំប្រឹងប្រែង ការពារផលប្រយោជន៍ជាតិរបស់យើង។

     ឯកឧត្តម ឧបនាយករដ្ឋមន្ត្រីបានលើកឡើងដែរថានាពេលនេះ ក្រុមប្រឹក្សាអភិវឌ្ឍន៍កម្ពុជា បានអនុម័ត្រគម្រោង៣៧៣គម្រោង ចាប់ពីខែមករា ដល់ខែមិថុនាកន្លងមកពោលគឺកន្លះឆ្នាំ យើងអនុម័ត្រលើសឆ្នាំ ២០២៣កន្លងមកនិងបើយើងបន្ថែមមួយសប្តាហ៍បន្ថែមទៀតរហូតដល់៤កក្កដា គឺយើងបានអនុម័ត្រគម្រោងរហូតដល់ ៣៩៦គម្រោង ដែលមានទុនវិនិយោគ៦ពាន់លានដុល្លារ ដោយក្នុងនេះបង្កើតការងារជូនដល់ប្រជាពលរដ្ឋកម្ពុជា ២៧១ពាន់កន្លែង។ដូចនេះគឺកម្ពុជាយើងនៅមានតែឱកាស មានលទ្ធភាពទាក់ទាញវិនិយោគមកដាក់ទុននៅកម្ពុជាដើម្បីបង្កើតការងារជូន បងប្អូនប្រជាពលរដ្ឋយើង។ដូច្នេះចំពោះបងប្អូនរបស់យើងបើចង់វិលត្រឡប់មកធ្វើការក្នុងប្រទេសកម្ពុជាយើងវិញ សូមអញ្ជើញវិលត្រឡប់មកវិញដោយសារយើងមានការងារ ២៧១កន្លែង ជូនដល់បងប្អូនយើងធ្វើនៅថ្ងៃខាងមុខនេះ។
    គួរបញ្ជាក់ថាកាលពីថ្ងៃទី៣ ខែមេសា ឆ្នាំ២០២៥ ប្រធានាធិបតីអាមេរិក លោក ដូណាល់ ត្រាំ បានប្រកាសដំឡើងពន្ធលើទំនិញនាំចូលពី ប្រទេសកម្ពុជាដល់ទៅ ៤៩ភាគរយ ដោយសារសហរដ្ឋអាម៉េរិក មានឱនភាពជញ្ជីងពាណិជ្ជកម្មជាមួយកម្ពុជាក្នុងកម្រិត ៩៧ភាគរយរួចមក៕

ដោយ៖មករា