AKP ព្រះវិហារ ថ្ងៃទី០៨ ខែកក្កដា ឆ្នាំ២០២៥--
គណៈប្រតិភូសមាគមសហព័ន្ធអ្នកវិនិយោគកម្ពុជា ដឹកនាំដោយ អ្នកឧកញ៉ា លី ឃុនថៃ ប្រធានសមាគមបានអញ្ជើញចុះជួបសំណេះសំណាល សាកសួរសុខទុក្ខ និងនាំយកអំណោយជាគ្រឿងឧបភោគ បរិភោគ សម្ភារប្រើប្រាស់ និងថវិកាមួយចំនួន ជូនដល់កងកម្លាំង និងវីរៈយុទ្ធជនជួរមុខ ដែលមានភាពអង់អាចក្លាហាន កំពុងឈរជើងការពារបូរណភាពទឹកដីតាមខ្សែបន្ទាត់ព្រំដែនកម្ពុជា-ថៃ ទិសព្រះវិហារ នាព្រឹកថ្ងៃទី០៨ ខែកក្កដា ឆ្នាំ២០២៥។ ពិធីនេះ បានធ្វើឡើងនៅទីបញ្ជាការដ្ឋានអង្គរក្ស ទួល៩៥ ស្ថិតនៅឃុំស្រអែម ស្រុកជាំក្សាន្ដ ខេត្តព្រះវិហារ ដោយទទួលបានការស្វាគមន៍ពីសំណាក់ ឯកឧត្តម នាយឧត្តមសេនីយ៍កិត្តិសង្គហបណ្ឌិត ហ៊ីង ប៊ុនហៀង អគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការ បញ្ជាការដ្ឋានអង្គរក្ស។

ក្នុងឱកាសនោះ អ្នកឧកញ៉ា លី ឃុនថៃ បានគូសបញ្ជាក់ថា ការចុះមកដល់ព្រំដែនដោយផ្ទាល់នាពេលនេះ គឺជាសក្ខីភាពនៃការ បង្ហាញពីចំណងសាមគ្គីភាពរវាងសមរភូមិមុខ និងសមរភូមិក្រោយ ដោយនាំមកនូវការគោរព ការគាំទ្រ និងការលើកទឹកចិត្តដែលចេញពីឆន្ទៈស្នេហាជាតិ ឈរលើស្មារតីរួមគ្នាជាធ្លុងមួយ សាមគ្គីភាព ឯកភាពជាតិ ជូនចំពោះកងកម្លាំងទាំងអស់ ដែលបានខិតខំអស់ពីកម្លាំងកាយចិត្ត តស៊ូ ប្ដូរផ្ដាច់ និងហ៊ានលះបង់គ្រប់បែបយ៉ាង ដើម្បីបុព្វហេតុការពារបូរណភាពទឹកដី អធិបតេយ្យជាតិ និងសន្ដិសុខរបស់ប្រទេសជាតិទាំងមូល ជាពិសេសការពារទឹកដីពីការឈ្លានពានខុសច្បាប់របស់ខ្មាំងសត្រូវ។ អ្នកឧកញ៉ាបានប្រកាសគាំទ្រយ៉ាងពេញទំហឹង និងឥតងាករេ ចំពោះគោលនយោបាយ រាជរដ្ឋាភិបាលកម្ពុជា ក្រោមការដឹកនាំដ៏ឈ្លាសវៃ និងប៉ិនប្រសប់ របស់ សម្ដេចធិបតីនាយករដ្ឋមន្ដ្រី ជាពិសេសចំណាត់ការប្រកបដោយភាពច្បាស់លាស់ និងហ្មត់ចត់បំផុត របស់សម្ដេច ក្នុងការបញ្ជូនការដោះស្រាយវិវាទព្រំដែនកម្ពុជាថៃ ទៅតុលាការយុត្តិធម៌អន្ដរជាតិ ICJ និងតាមគ្រប់មធ្យោបាយ ទាំងយន្ដការផ្លូវច្បាប់ ការទូត និងយោធា ដើម្បីការពារបូរណភាពទឹកដី កម្ពុជា។

សូមជម្រាបជូនថា អំណោយដែលបាននាំយកទៅជូនកងទ័ព រួមមាន៖ គ្រឿងឧបភោគ បរិភោគ សម្ភារប្រើប្រាស់ និងថវិកាមួយចំនួន គិតជាទឹកប្រាក់សរុបចំនួន ៣៧០លានរៀល ដែលជាការរួមចំណែកជួយសម្រាលបន្ទុក និងលើកទឹកចិត្តដល់កងទ័ពទាំងអស់ឱ្យបន្តបំពេញភារកិច្ចប្រកបដោយស្មារតីទទួលខុសត្រូវខ្ពស់ និងបន្តការពារជាតិមាតុភូមិ៕

ដោយ៖ រិទ្ធី ប្រភព៖ មន្ទីរព័ត៌មានខេត្ដព្រះវិហារ