AKP ភ្នំពេញ ថ្ងៃទី០៨ ខែកក្កដា ឆ្នាំ២០២៥ -- ឯកឧត្តម ឈា ប៊ុនរិទ្ធ រដ្ឋលេខាធិការប្រចាំការ ក្រសួងធនធានទឹក និងឧតុនិយម  រួមជាមួយឯកឧត្តមជាថ្នាក់ដឹកនាំ មន្ត្រីបច្ចេកទេសក្រសួង និងមន្ទីរធនធានទឹក និងឧតុនិយមខេត្តប៉ៃលិន បានអញ្ជើញចុះពិនិត្យស្ថានភាពទឹក ការគ្រប់គ្រងទឹក និងការងារថែទាំប្រព័ន្ធធារាសាស្ត្រ ក្នុងភូមិសាស្ត្រខេត្តប៉ៃលិន។

ក្នុងដំណើរចុះបេសកកម្មនេះ ឯកឧត្តមរដ្ឋលេខាធិការប្រចាំការ និងក្រុមការងារបានអញ្ជើញចុះពិនិត្យជាក់ស្តែងការងារថែទាំប្រព័ន្ធធារាសាស្ត្រចំនួន៣ប្រព័ន្ធគឺ៖ ទី១-ប្រព័ន្ធធារាស្ត្រអូរដូនតា ស្ថិតក្នុងឃុំស្ទឹងត្រង់ ស្រុកសាលាក្រៅ។ ទី២-ប្រព័ន្ធធារាសាស្ត្រផ្ទះស្បូវ ស្ថិតក្នុងឃុំស្ទឹងត្រង់ ស្រុកសាលាក្រៅ និងទី៣-ប្រព័ន្ធធារាសាស្ត្រថ្នល់បត់ ស្ថិតក្នុងសាលាក្រៅ ស្រុកសាលាក្រៅ និងការងារថែទាំខួបប្រឡាយមេទី២ ថ្នល់បត់ ស្ថិតក្នុងឃុំសាលាក្រៅ ស្រុកសាលាក្រៅ ព្រមទាំងបានចុះពិនិត្យស្ថានភាពទឹកតាមបណ្តាស្ទឹងសំខាន់ៗផងដែរ។

ឯកឧត្តមរដ្ឋលេខាធិការប្រចាំការបានថ្លែងកោតសរសើរដល់មន្ទីរធនធានទឹក និងឧតុនិយមខេត្តប៉ៃលិន ដែលបានយកចិត្តទុកដាក់ប្រកបដោយស្មារតីទទួលខុសត្រូវខ្ពស់លើការងារគ្រប់គ្រង និងថែទាំប្រព័ន្ធធារាសាស្ត្រឱ្យមានដំណើរការល្អ សម្រាប់ការផ្គត់ផ្គង់ទឹកស្រោចស្រពស្រែរបស់បងប្អូនប្រជាកសិករ ក៏ដូចជាជួយដោះទឹកពេលមានជំនន់កើតឡើងម្តងៗ។ 

ឯកឧត្តមក៏បានណែនាំដល់មន្ទីរឱ្យបន្តការយកចិត្តទុកដាក់បន្ថែមទៀតលើការងារថែទាំប្រព័ន្ធប្រឡាយ និងសំណង់សិល្បការ្យ ជាពិសេសការងារបិទបើកទ្វារទឹក ព្រមទាំងតាមដានជាប្រចាំអំពីស្ថានភាពទឹកនៅផ្នែកខាងលើ ក៏ដូចជាចែករំលែកព័ត៌មានទិន្នន័យបរិមាណទឹកភ្លៀង និងកម្ពស់ទឹកឱ្យគ្នាទៅវិញទៅមកជាមួយមន្ទីរធនធានទឹក និងឧតុនិយមខេត្តបន្ទាយមានជ័យ និងខេត្តបាត់ដំបង ដែលស្ថិតនៅផ្នែកខាងក្រោម ក្នុងគោលដៅកាត់បន្ថយហានិភ័យកើតឡើងដោយសារទឹក។

សូមបញ្ជាក់ថា ខេត្តប៉ៃលិនមានប្រភពទឹកសំខាន់ៗចំនួន ៣ គឺ៖ ១-ស្ទឹងប៉ៃលិន មានប្រភពទឹកពីតំបន់ប្រជុំភ្នំខៀវ ២-ស្ទឹងភ្នំកុយ និង៣-ស្ទឹងកំរៀង ដែលជាដៃស្ទឹងមង្គលបុរីផ្នែកខាងលើ៕

ដោយ៖ ពេជ្រ សំអឿន (ប្រភព៖ ក្រសួងធនធានទឹក និងឧតុនិយម)