AKP បន្ទាយមានជ័យ ថ្ងៃទី០៨ ខែកក្កដា ឆ្នាំ២០២៥--ឯកឧត្តម អ៊ុំ រាត្រី អភិបាលខេត្តបន្ទាយមានជ័យ បានថ្លែងក្រើនរម្លឹកដល់រដ្ឋបាលក្រុងស្រុកទូទាំងខេត្តត្រូវបន្តការយកចិត្តទុកដាក់ខ្ពស់ក្នុងការ បម្រើសេវាសាធារណៈជូនប្រជាពលរដ្ឋឱ្យបានល្អប្រសើរប្រកបដោយតម្លាភាព និងប្រសិទ្ធភាព។ ការថ្លែងដូច្នេះក្នុងឱកាសឯកឧត្តម អ៊ុំ រាត្រី  បានអញ្ជើញជាអធិបតីប្រកាសចូលកាន់មុខតំណែងលោក វឺ ថងរ័ក្ស ជាអភិបាលរងក្រុងប៉ោយប៉ែត ជំនួសលោក ហឿន វីរៈ ដែលត្រូវផ្លាស់ប្តូរមុខតំណែងពីអភិបាលរងក្រុងប៉ោយប៉ែតទៅជាអភិបាលនៃគណៈស្រុកព្រះនេត្រព្រះ នៅសាលប្រជុំរដ្ឋបាលក្រុងប៉ោយប៉ែត នាព្រឹកថ្ងៃទី០៨ ខែកក្កដា ឆ្នាំ២០២៥។

ក្នុងឱកាសនោះ ឯកឧត្តម អ៊ុំ រាត្រី បានសង្កត់ធ្ងន់ថា ក្នុងនាមជាមន្ត្រីរាជការ ជាពិសេសថ្នាក់ដឹកនាំមូលដ្ឋាន ត្រូវមានភាពជាគំរូ ស្មោះត្រង់ និងបំពេញការងារដោយការទទួលខុសត្រូវខ្ពស់ ដើម្បីឆ្លើយតបទៅនឹងតម្រូវការ និងការរំពឹងទុករបស់ប្រជាពលរដ្ឋ។ ការបម្រើសេវាសាធារណៈ ត្រូវតែប្រកាន់ខ្ជាប់នូវគោលការណ៍ "បម្រើប្រជាជន" ដោយមិនប្រកាន់បក្សពួក ឬផលប្រយោជន៍ផ្ទាល់ខ្លួនឡើយ។ ការកែទម្រង់ស៊ីជម្រៅរបស់រាជរដ្ឋាភិបាលគឺដើម្បីធានាថា ប្រជាពលរដ្ឋគ្រប់រូបទទួលបាននូវសេវាចាំបាច់នានាប្រកបដោយភាពងាយស្រួល និងឆាប់រហ័ស។

ជាមួយគ្នានេះដែរ លោក វឺ ថងរ័ក្ស ទើបតែចូលកាន់តំណែងថ្មី បានធ្វើការប្តេជ្ញាចិត្តយ៉ាងមុតមាំ ចំពោះមុខអង្គពិធីថានឹងខិតខំប្រឹងប្រែងបំពេញតួនាទី និងភារកិច្ចរបស់ខ្លួនឱ្យអស់ពីសមត្ថភាព ប្រកបដោយស្មារតីទទួលខុសត្រូវខ្ពស់។ លោកប្តេជ្ញាថានឹងចូលរួមអនុវត្តឱ្យបានម៉ឺងម៉ាត់នូវរាល់គោលការណ៍ គោលនយោបាយ និងផែនការនានារបស់រាជរដ្ឋាភិបាល ក៏ដូចជាការណែនាំរបស់ថ្នាក់ដឹកនាំខេត្ត ដើម្បីចូលរួមកសាង និងអភិវឌ្ឍក្រុងប៉ោយប៉ែតឱ្យកាន់តែរីកចម្រើន។ ជាពិសេស លោកនឹងយកចិត្តទុកដាក់ដោះស្រាយរាល់បញ្ហាប្រឈមនានារបស់ប្រជាពលរដ្ឋ និងខិតខំបម្រើសេវាសាធារណៈជូនពួកគាត់ឱ្យបានល្អប្រសើរ ស្របតាមអនុសាសន៍របស់ឯកឧត្តមអភិបាលខេត្ត។

សូមជម្រាបថាការផ្លាស់ប្តូរតំណែង និងការតែងតាំងថ្នាក់ដឹកនាំថ្មីនេះ គឺជាផ្នែកមួយនៃការកែទម្រង់រដ្ឋបាលសាធារណៈ ដើម្បីពង្រឹងប្រសិទ្ធភាពការងារ និងធានាថា រដ្ឋបាលមូលដ្ឋានមានសមត្ថភាពគ្រប់គ្រាន់ក្នុងការឆ្លើយតបទៅនឹងតម្រូវការអភិវឌ្ឍ និងបម្រើសេវាជូនប្រជាពលរដ្ឋឱ្យកាន់តែល្អប្រសើរឡើង៕

ដោយ ឈុន សារ៉ាត