AKP តាកែវ ថ្ងៃទី០៨ ខែកក្កដា ឆ្នាំ២០២៥-- មន្ទីរព័ត៌មានខេត្តតាកែវបានរៀបចំបើកកិច្ចប្រជុំបូកសរុបលទ្ធផលការងារចុះធ្វើយុទ្ធនាការប្រឆាំងព័ត៌មានក្លែងក្លាយ ក្រោមអធិបតីភាពឯកឧត្តម គឹម ហុង អនុរដ្ឋលេខាធិការក្រសួងព័ត៌មានទទួលបន្ទុកមន្ទីរព័ត៌មានខេត្តតាកែវ និងលោក អៀម ថៃ ប្រធានមន្ទីរព័ត៌មានខេត្តតាកែវ កាលពីថ្ងៃទី០៧ ខែកក្កដា ឆ្នាំ២០២៥ ដោយមានការចូលរួមពីអនុប្រធានមន្ទីរព័ត៌មានខេត្តតាកែវ ប្រធានអនុប្រធានការិយាល័យទាំង៥ មន្ត្រីរាជការ និងមន្ត្រីកិច្ចសន្យានៃមន្ទីរព័ត៌មានខេត្តតាកែវ។

មានប្រសាសន៍សំណេះសំណាលក្នុងពិធីនោះ ឯកឧត្តម គឹម ហុង បានពាំនាំការផ្ដាំផ្ញើសាកសួរសុខទុក្ខពីសំណាក់ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន មកជម្រាបជូនបងប្អូនថ្នាក់ដឹកនាំមន្ត្រីរាជការនៃមន្ទីរព័ត៌មានខេត្តតាកែវទាំងអស់ ដោយឯកឧត្តមរដ្ឋមន្ត្រីក្រសួងព័ត៌មានបានកោតសរសើរ និងវាយតម្លៃខ្ពស់ដល់មន្ទីរព័ត៌មានខេត្តតាកែវ ចំពោះកិច្ចខិតខំប្រឹងប្រែងនាពេលកន្លងមក ក្នុងការចុះធ្វើយុទ្ធនាការប្រឆាំងព័ត៌មានក្លែងក្លាយ ក្រោមពាក្យស្លោក "និយាយថាទេចំពោះព័ត៌មានក្លែងក្លាយ" ដែលបានរៀបចំដោយក្រសួងព័ត៌មានបញ្ចប់ទៅដោយជោគជ័យគួរជាទីមោទនៈ។

ឯកឧត្តម គឹម ហុង បានមានប្រសាសន៍បន្តថា គោលបំណងនៃការធ្វើយុទ្ធនាការប្រឆាំងព័ត៌មានក្លែងក្លាយ ដើម្បីអប់រំដល់ប្រជាពលរដ្ឋយុវជននិងសាធារជនទូទៅឱ្យយល់ដឹងពីផលប៉ះពាល់អវិជ្ជមានរបស់ព័ត៌មានក្លែងក្លាយ។ហើយមានមធ្យោបាយក្នុងការការពារខ្លួនពីព័ត៌មានក្លែងក្លាយទាំងនោះ ធ្វើឱ្យពួកគាត់ចេះវិភាគចេះថ្លឹងថ្លែង និងវាយតម្លៃព័ត៌មានមុននឹងជឿឬចែករំលែក។ ជាពិសេសការផ្ទៀងផ្ទាត់ប្រភព និងភាពត្រឹមត្រូវនៃព័ត៌មាន ជំរុញឱ្យបងប្អូនប្រជាពលរដ្ឋ ក្លាយជាអ្នកប្រើប្រាស់ព័ត៌មានប្រកបដោយការទទួលខុសត្រូវ និងចូលរួមចំណែកក្នុងការទប់ស្កាត់ការរីករាលដាលនៃព័ត៌មានក្លែងក្លាយ តាមរយៈយុទ្ធសាស្ត្រ "ម៣ និងផ១" (មិនបង្កើតព័ត៌មានក្លែងក្លាយ មិនផ្សព្វផ្សាយព័ត៌មានក្លែងក្លាយ មិនចែករំលែកព័ត៌មានក្លែងក្លាយ និងត្រូវផ្សព្វផ្សាយព័ត៌មានពិតមានប្រភពច្បាស់លាស់) របស់ក្រសួងព័ត៌មាន។

ឯកឧត្តមអនុរដ្ឋលេខាធិការក៏បានជំរុញដល់មន្ត្រីរាជការ និងមន្ត្រីកិច្ចសន្យាទាំងអស់ ត្រូវខិតខំពង្រឹងសមត្ថភាពនិងអនុវត្តការងាររបស់ន្លួន ប្រកបដោយភាពទទួលខុសត្រូវខ្ពស់។ ជាពិសេសត្រូវឆ្លើយតបឱ្យបានលឿនចំពោះព័ត៌មានក្លែងក្លាយ ដែលបានកើតឡើងក្នុងមូលដ្ឋានរបស់យើង ដែលមានចរិតបំផ្លិចបំផ្លាញសង្គមជាតិ ត្រូវរួមសាមគ្គីគ្នាក្នុងស្មារតីមហាគ្រួសារខ្មែរ សំដៅធ្វើយ៉ាងណាចូលរួមអភិវឌ្ឍស្ថាប័នរបស់ខ្លួន ឱ្យមានការរីកចម្រើនស្របតាមបរិបទសង្គមបច្ចុប្បន្ន៕

ដោយ អ៊ុច សៀង