AKP ភ្នំពេញ ថ្ងៃទី០៧ ខែកក្កដា ឆ្នាំ២០២៥-- គិតត្រឹមឆមាសទី១នៃឆ្នាំ២០២៥នេះ អង្គភាពប្រឆាំងអំពើពុករលួយបានទទួលពាក្យប្តឹងសរុបចំនួន២៥៩ ពាក្យប្ដឹង ក្នុងនោះពាក្យប្ដឹងអនាមិកមាន ៨៦ ឬប្រមាណ៣៣,២០ភាគរយ។ ក្រៅពីនេះពាក្យប្ដឹងចំនួន ២០ មិនពាក់ព័ន្ធអំពើពុករលួយទេ។

បើយោងតាមសេចក្តីប្រកាសព័ត៌មានរបស់ក្រុមប្រឹក្សាជាតិប្រឆាំងអំពើពុករលួយដែលបើកកិច្ចប្រជុំលើកទី៤៨អាណត្តិទី៣ នារសៀលថ្ងៃទី០៧ ខែកក្កដា ឆ្នាំ២០២៥ បានឱ្យដឹងថាសម្រាប់ក្នុងចំណោមពាក្យប្តឹង២៥៩នៃឆមាសទី១នេះដែរមានពាក្យប្ដឹងចំនួន១១៥ ក្រោយវិភាគ-ស្រាវជ្រាវ-សុំការបំភ្លឺ មិនពាក់ព័ន្ធអំពើពុករលួយ,ពាក្យប្តឹងអន្តរាគមន៍ឱ្យជួយដោះស្រាយ ៧ ពាក្យប្ដឹង កសាងសំណុំរឿងបញ្ជូនទៅតុលាការ ៧ សំណុំរឿង កំពុងបន្តនីតិវិធីស្រាវជ្រាវ ១១៤ ពាក្យប្ដឹង កំពុងដំណើរការ៣បណ្តឹង។ ក្រៅពីនេះអង្គភាពប្រឆាំងអំពើពុករលួយក៏បានដំណើរការពិនិត្យ វិភាគ និងធ្វើការសម្រេចលើពាក្យប្ដឹង ដែលមានក្នុងខែសរុបចំនួន៤៦ពាក្យប្ដឹងផងដែរ។

ប្រភពខាងលើនេះបានឱ្យដឹងបន្ថែមថាសម្រាប់ការងារប្រកាសទ្រព្យសម្បត្តិ និងបំណុល ក្នុងឆមាសទី១វិញគឺបើ គិតទាំងការប្រកាសទ្រព្យសម្បត្តិ និងបំណុលតាមរបប ២ ឆ្នាំ២២ ៣៥៣ រូប តែងតាំងថ្មី ៧៨៩ រូបលាឈប់ និងចប់អាណត្តិ ៣៥០ រូប បញ្ឈប់ពីមុខតំណែង៥រូប ចូលនិវត្តន៍ ២៣៥ រូប ដោយសរុបអ្នកបានមកប្រកាសទ្រព្យសម្បត្តិ និងបំណុល ក្នុងឆមាសទី១ ឆ្នាំ២០២៥ មានចំនួន ២៣ ៧៣៥ រូប។

សេចក្តីប្រកាសព័ត៌មានដដែលបានឱ្យដឹងបន្ថែមថាសម្រាប់ក្នុងខែមិថុនា ឆ្នាំ២០២៥ដែរ មានមន្ត្រីចំនួន ១៩៨ រូប បានមកប្រកាសទ្រព្យសម្បត្តិ និង បំណុល ក្នុងនោះមន្ត្រីទើបទទួលបានការតែងតាំងថ្មី ចំនួន១១៦រូប មន្ត្រី១រូប ប្រកាសក្រោយបញ្ឈប់ពីមុខតំណែង មន្ត្រី២រូប ប្រកាសតាមតម្រូវការស៊ើបអង្កេត និង៧៩រូបទៀត បានមកប្រកាសទ្រព្យសម្បត្តិនិងបំណុលដោយមូលហេតុលាឈប់ ចូលនិវត្តន៍ និងចប់អាណត្តិ៕

ដោយ៖ មករា