AKP ភ្នំពេញ ថ្ងៃទី០៧ ខែកក្កដា ឆ្នាំ២០២៥--កិច្ចប្រជុំឧត្ដមក្រុមប្រឹក្សាពិគ្រោះ និងផ្តល់យោបល់ លើកទី៣ នៅវិមានសន្តិភាព រាជធានីភ្នំពេញ ក្រោមអធិបតីភាព សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា នាព្រឹកថ្ងៃចន្ទ ទី៧ ខែកក្កដា ២០២៥ បានផ្លាស់ប្តូរមតិយោបល់លើអនុវិស័យ និងវិស័យជាច្រើន និងបញ្ហាស្ថានភាពវិវត្តជាប្រចាំរវាងជម្លោះព្រំដែនកម្ពុជា-ថៃ។

ក្នុងសន្និសីទសារព័ត៌មាន ស្តីពីលទ្ធផលនៃកិច្ចប្រជុំរបស់ឧត្តមក្រុមប្រឹក្សាពិគ្រោះ និងផ្តល់យោបល់ នារសៀលថ្ងៃទី០៧ ខែកក្កដា ឆ្នាំ២០២៥ នៅវិមានសន្តិភាព ឯកឧត្តម ឈឹម ផលវរុណ ប្រធានលេខាធិការដ្ឋាន ឧត្តមក្រុមប្រឹក្សាពិគ្រោះ និងផ្តល់យោបល់ បានឱ្យដឹងថា ប្រតិភូគណបក្សបានឆ្លៀតលើកពីបញ្ហាផ្សេងមួយទៀត ក្រៅពីទស្សនទានរួមទាំងបរិបទថ្មីៗជាមួយនឹងសភាពការណ៍កម្ពុជានៅឯព្រំដែន ដោយបានជជែកពិភាក្សាគ្នាយ៉ាងផុសផុល ហើយសម្ដេចបវរធិបតី ក៏បានឆ្លើយនិងពន្យល់ទៅវិញទៅមកដើម្បីឱ្យយល់គ្នាក្នុងដំណើរជាប្រជាជាតិខ្មែរជាមួយគ្នា។
ឯកឧត្តម ឈឹម ផលវរុណ បានបញ្ជាក់ថា«ប្រជុំឆមាសទី៣នេះចំពេលដែលកម្ពុជាកំពុងស្ថិតនៅក្នុងស្ថានភាពនៃការការពារអធិបតេយ្យភាព បូរណភាពទឹកដី នៅឯព្រំដែនជាមួយប្រទេសថៃឡង់ដ៍ ហើយស្ថានភាពនេះគឺគណបក្សទាំងអស់នៅក្នុងឧត្តមក្រុមប្រឹក្សាពិគ្រោះ និងផ្តល់យោបល់មានប្រតិភូគណបក្សចំនួន៣០បានគាំទ្របញ្ចេញមតិរៀងៗខ្លួន និងគាំទ្រទាំងស្រុងនូវការសម្រេចជ្រើសរើសវិធានផ្លូវច្បាប់ដែលយើងប្ដឹងទៅតុលាការយុត្តិធម៌អន្តរជាតិ ICJ ពាក់ព័ន្ធទៅនឹងតំបន់បួន គឺតំបន់មុំបី ប្រសាទតាក្របី ប្រាសាទតាមាន់ធំ និងប្រាសាទតាមាន់តូច»។
ឯកឧត្តម ប្រធានលេខាធិការដ្ឋាន ឧត្តមក្រុមប្រឹក្សាពិគ្រោះ និងផ្តល់យោបល់ យល់ឃើញថា ចំណុចនេះប្រតិភូគណបក្សទាំង៣០ បានបញ្ជាក់យ៉ាងស៊ីជម្រៅដោយទទួលស្គាល់និងជឿជាក់បំផុតនូវការដឹកនាំដ៏ម៉ឺងម៉ាត់របស់ប្រមុខរាជរដ្ឋាភិបាល និងរបស់សម្ដេចតេជោ ជាប្រមុខដឹកនាំគណបក្សគ្រប់គ្រងរាជរដ្ឋាភិបាលនិងជាប្រធានព្រឹទ្ធសភាដែលជាសសរស្ដម្ភនៃការជ្រោងទង់ការពារជាតិ ហើយជាការជឿទុកចិត្ត ហើយនូវអ្វីដែលយើងផ្ដល់មតិគ្នាទៅវិញទៅមកគឺសម្ដេចធិបតីបានបញ្ជាក់នូវអ្វីដែលយើងកំពុងរៀបចំ យកចិត្តទុកដាក់និងលើកទឹកចិត្តដល់ប្រជាពលរដ្ឋខ្មែរទូទៅនិងគ្រប់និន្នាការរួមគ្នាជាកម្លាំងការពារជាតិនៃសមរភូមិមុខដើម្បីទៅជ្រោងទង់ការពារកម្លាំងឈរជើងនៅឯព្រំដែន។
ក្នុងន័យនេះ សម្ដេចធិបតីក៏បានបញ្ជាក់ថា«យើងទាំងអស់គ្នា ពលរដ្ឋម្នាក់ក៏ជាយុទ្ធជនម្នាក់ដែរ ប៉ុន្តែជាយុទ្ធជនសមរភូមិក្រោយក្នុងការគាំទ្រយុទ្ធជនសមរភូមិមុខ ហើយចំណុចនេះហើយដែលយើងនាំគ្នាជឿជាក់នូវអ្វីដែលយើងអាចធ្វើបានក្នុងការការពារទឹកដី»។
ជាមួយគ្នានោះសម្ដេចធិបតីក៏បានអំពាវនាវឱ្យមានការជឿជាក់ចំពោះនីតិវិធីនៃដំណើរការប្ដឹងទៅតុលាការយុត្តិធម៌អន្តរជាតិ ICJ គឺមិនមែនជាអ្វីដែលយើងធ្វើលេងទេ គឺយើងធ្វើយ៉ាងម៉ត់ចត់ និងត្រៀមសិក្សា និងប្រមូលឯកសារឱ្យគ្រប់គ្រាន់ ពេញលក្ខណៈច្បាប់សម្រាប់ទៅតុលាការ ICJ៕
ដោយ៖ គង់ សិរីរ័ត្ន