AKP ព្រះវិហារ ថ្ងៃទី០៧ ខែកក្កដា ឆ្នាំ២០២៥

ក្រុមវេជ្ជសាស្ត្រសម្តេចតេជោ ដឹកនាំដោយ ឯកឧត្តម វេជ្ជបណ្ឌិត លី សុខី ប្រធានប្រតិបត្តិក្រុមវេជ្ជសាស្ត្រសម្តេចតេជោតំណាងដ៏ខ្ពង់ខ្ពស់របស់លោកជំទាវ ហ៊ុន ម៉ាណា ប្រធានក្រុមវេជ្ជសាស្ត្រសម្តេចតេជោ និងជាអគ្គនាយកវិទ្យុ និងទូរទស្សន៍បាយ័ន នាថ្ងៃទី ០៦ ខែកក្កដាឆ្នាំ ២០២៥ បានចុះមកពិនិត្យនិងព្យាបាល ដោយឥតគិតថ្លៃជូនដល់បងប្អូនប្រជាពលរដ្ឋ ដែលកំពុងស្នាក់នៅបណ្ដោះអាសន្ននៅក្នុងវត្តពោធិ៥០០០ ដើម ស្ថិតនៅភូមិ គូលែនត្បូង ឃុំ គូលែនត្បូង ស្រុកគូលែន ខេត្តព្រះវិហារ ព្រមទាំងមាននាំយកសម្ភារមួយចំនួនដែលជាតម្រូវការចាំបាច់របស់មណ្ឌល ជាអំណោយរបស់លោកជំទាវ ហ៊ុន ម៉ាណា មកជូនមណ្ឌលសុវត្ថិភាពក្នុងវត្តពោធិ៍៥០០០ ដើម ផងដែរ ។ ក្នុងពិធីនេះ ក៏មានការអញ្ជើញចូលរួមពី លោក សុខ សាន្តតារ៉ា អភិបាលរងខេត្តព្រះវិហារ ព្រមទាំងអាជ្ញាធរដែនដី កងកម្លាំងទាំង៣ យុវជនកាកបាទក្រហមកម្ពុជា និងសហភាពសហព័ន្ធយុវជន ស្រុក គូលែន ព្រមទាំងបងប្អូនប្រជាពលរដ្ឋ យ៉ាងច្រើនកុះករ។

ឯកឧត្តម វេជ្ជបណ្ឌិត លី សុខី បានបញ្ជាក់ថា ការព្យាបាលជំងឺជូនពលរដ្ឋដោយឥតគិតថ្លៃគឺជាការយកចិត្ត ទុកដាក់ខ្ពង់ខ្ពស់របស់សម្តេចតេជោ ហ៊ុន សែន ក្នុងការលើកកម្ពស់សុខភាពរបស់ប្រជាពលរដ្ឋ ដែលបាន ជម្លៀសខ្លួនមកស្នាក់នៅក្នុងវត្ត ពោធិ៥០០០ដើម។ ឯកឧត្ដមវេជ្ជបណ្ឌិតបានលើកឡើងថា ទាំងនេះក៏បញ្ជាក់ឱ្យឃើញពីការចូលរួមដោយស្ម័គ្រស្មោះអស់ពីចិត្តរបស់ក្រុមវេជ្ជសាស្ត្រសម្តេចតេជោ ដែលបានចុះមកពិនិត្យព្យាបាលជំងឺនៅក្នុងឱកាសនេះ ជាការចូលរួមចំណែកយ៉ាងធំធេងជាមួយបងៗ ជាកងកម្លាំង ដែលបានឈរជើងការពារទឹកដីនៅសមរភូមិមុខដែលបានលះបង់កម្លាំងកាយចិត្ត ហ៊ានប្តូរជីវិតដើម្បីការពារទឹកដីពីការឈ្លានពានរបស់បច្ចាមិត្រ និងបានជម្លៀស ក្រុមគ្រួសារ អោយមកស្នាក់នៅក្នុងតំបន់សុវត្ថិភាព វត្តពោធិ៥០០០ដើមនេះ។ ឯកឧត្តមបានកោតសរសើរនិងថ្លែងអំណរគុណជាអនេកដល់អាជ្ញាធរ ខេត្តព្រះវិហារដែលបានជួយសម្របសម្រួល ឱ្យក្រុមការងារបានចុះមកពិនិត្យនិងព្យាបាលជូនដល់ប្រជាពលរដ្ឋនាពេលនេះ។

ក្នុងឱកាសនេះផងដែរ លោក សុខ សាន្តតារ៉ា អភិបាលរងខេត្តព្រះវិហារបានថ្លែងអំណរគុណដល់ក្រុមវេជ្ជសាស្ត្រ សម្តេចតេជោ ក្រោមការណែនាំរបស់លោកជំទាវ ហ៊ុន ម៉ាណា ប្រធានក្រុមវេជ្ជសាស្ត្រសម្តេចតេជោ ដែលបាន ចំណាយពេលវេលា កម្លាំងកាយចិត្ត ព្រមទាំង សម្ភារប្រើប្រាស់ និង ថ្នាំពេទ្យជាច្រើនមុខ ចុះមកពិនិត្យព្យាបាល ជូនដល់បងប្អូនប្រជាពលរដ្ឋ ដែលបានស្នាក់នៅបណ្ដោះអាសន្នក្នុងវត្តពោធិ៥០០០ ដើមនេះ។ លោកអភិបាលរងខេត្ដជឿជាក់ថា ប្រជាពលរដ្ឋពិតជាបានសប្បាយចិត្ត ដោយទទួលបាននូវការមើលថែនិងព្យាបាលដោយឥតគិតថ្លៃ ពីសំណាក់ក្រុមវេជ្ជសាស្ត្រសម្តេចតេជោ នាឱកាសនេះ និងពិតជាទទួលបាននូវសុខុមាលភាព កាន់តែល្អប្រសើរបន្ថែមទៀត។

សូមជម្រាបជូនថា ក្រោយពីបានធ្វើការពិនិត្យព្យាបាល អស់រយៈពេល៧ម៉ោង ចាប់ពីម៉ោង ៧.៣០នាទី ព្រឹករហូតដល់ម៉ោង ២.៣០ នាទីរសៀល ជាលទ្ធផល ទទួលបានរួមមាន៖ ពិនិត្យព្យាបាលរោគស្ត្រី ១៧០នាក់ សម្ភពនិងអេកូសាស្ត្រ ១១៤នាក់ ពិនិត្យ និងព្យាបាលធ្មេញ ១២៤ នាក់ លាបថ្នាំការពារធ្មេញ ២១៣នាក់ និងចែករទេះជនពិការ១០គ្រឿង ធុងសំរាមធំ២០ ធុង សាប៊ូ សម្អាតបន្ទប់ទឹក១២០គីឡូ ច្រាស់ដុសបន្ទប់ទឹក៥០ឈុត ថ្នាំនិងច្រាស់ដុសធ្មេញ ២ ៥០០នាក់ អំបោសធាងដូង និងប្រដាប់កិប ៥០ឈុត៕

ដោយ៖ រិទ្ធី ប្រភព៖ មន្ទីរព័ត៌មានខេត្ដព្រះវិហារ