AKP បន្ទាយមានជ័យ ថ្ងៃទី០៧ ខែកក្កដា ឆ្នាំ២០២៥--ក្នុងស្មារតីរួមគ្នាជាខឿនការពារជាតិ ឯកឧត្តម នាយឧត្តមសេនីយ៍ សេរី កុសល អ្នកតំណាងរាស្ត្រមណ្ឌលខេត្តបន្ទាយមានជ័យ និងជាប្រធានក្រុមការងារថ្នាក់ជាតិចុះជួយស្រុកភ្នំស្រុក បានដឹកនាំគណៈប្រតិភូចុះសួរសុខទុក្ខ និងនាំយកអំណោយជាច្រើនជូនដល់កងកម្លាំងនគរបាលវរការពារព្រំដែនគោកចំនួន ៤ វរៈ ដែលកំពុងឈរជើងជួរមុខតាមបណ្ដោយព្រំដែនកម្ពុជា-ថៃ ក្នុងស្រុកថ្មពួក ខេត្តបន្ទាយមានជ័យ កាលពីថ្ងៃទី០៦ ខែកក្កដា ឆ្នាំ២០២៥។ ដំណើរទស្សនកិច្ចនេះ ក៏មានការអមដំណើរដោយលោកឧត្តមសេនីយ៍ទោ សិទ្ធិ ឡោះ ស្នងការនៃស្នងការដ្ឋាននគរបាលខេត្តបន្ទាយមានជ័យផងដែរ។

ក្នុងឱកាសនោះ ឯកឧត្តម សេរី កុសល បានពាំនាំនូវប្រសាសន៍ផ្ដាំផ្ញើសួរសុខទុក្ខប្រកបដោយក្ដីនឹករលឹកពីសំណាក់ថ្នាក់ដឹកនាំកំពូលរបស់កម្ពុជា រួមមាន សម្តេចតេជោ ហ៊ុន សែន ប្រធានព្រឹទ្ធសភា សម្តេចប្រធានរដ្ឋសភា សម្តេចធិបតី ហ៊ុន ម៉ាណែត នាយករដ្ឋមន្ត្រី ព្រមទាំងនាយឧត្តមសេនីយ៍ កែ គឹមយ៉ាន ប្រធានក្រុមការងារចុះជួយខេត្តបន្ទាយមានជ័យ ជូនចំពោះកងកម្លាំងទាំងអស់ដែលកំពុងបំពេញភារកិច្ចការពារជាតិមាតុភូមិ។ ក្នុងនាមជាម្ចាស់ប្រទេស យើងទាំងអស់គ្នាមានភារកិច្ចការពារប្រទេសជាតិ ពីការឈ្លានពានរបស់ខ្មាំងសត្រូវ ដែលនេះជាសារមួយបង្ហាញពីសារសំខាន់នៃកាតព្វកិច្ចរបស់កងកម្លាំងប្រដាប់អាវុធក្នុងការការពារបូរណភាពទឹកដី។

ក្រៅពីការសួរសុខទុក្ខ ឯកឧត្តម សេរី កុសល ក៏បានជម្រាបជូនកងកម្លាំងអំពីការវិវត្តន៍ថ្មីៗនៃស្ថានភាពព្រំដែន និងបានណែនាំឱ្យកងកម្លាំងទាំងអស់ត្រូវតែស្តាប់ និងអនុវត្តន៍ឲ្យបានខ្ជាប់ខ្ជួននូវអនុសាសន៍សំខាន់ៗរបស់សម្តេចតេជោ ហ៊ុន សែន និងសម្តេចធិបតី ហ៊ុន ម៉ាណែត ទាក់ទងនឹងបញ្ហាពិតប្រាកដនៅចំពោះមុខ ជាពិសេសការចិញ្ចឹមចិត្តចង់បានទឹកដីកម្ពុជាពីសំណាក់ភាគីថៃ។ ក្នុងនាមជាអតីតយុទ្ធជនដែលមានបទពិសោធន៍សង្គ្រាម នាយឧត្តមសេនីយ៍ សេរី កុសល ក៏បានចែករំលែកនូវបទពិសោធន៍ផ្ទាល់ខ្លួនអំពីយុទ្ធវិធីប្រយុទ្ធ ការប្រើប្រាស់លេណដ្ឋាន និងសារសំខាន់នៃការប្រាស្រ័យទាក់ទងគ្នាក្នុងសមរភូមិ។ ឯកឧត្តមបានរៀបរាប់អំពីភូមិសាស្ត្រជាក់ស្ដែងនៃតំបន់ថ្មពួក ដែលកាលពីអតីតកាលជាតំបន់ដែលមានភាគីបីធ្វើសកម្មភាព ហើយឯកឧត្តម និងសហការីធ្លាប់មានបទពិសោធន៍ប្រយុទ្ធនៅទីនោះផ្ទាល់។

ឯកឧត្តមក៏បានណែនាំឱ្យកម្លាំងប្រជាការពារត្រូវដើរតួនាទីជា «ភ្នែក ជាចម្រុះ» សម្រាប់កងកម្លាំងគ្រប់ប្រភេទ ដោយតម្រូវឱ្យរាយការណ៍ជាបន្ទាន់នូវរាល់បាតុភាពមិនប្រក្រតីនានា ដើម្បីអាចដោះស្រាយទាន់ពេលវេលា និងបានជំរុញឱ្យក្រុមការងារថ្នាក់ជាតិចុះជួយមូលដ្ឋាន ដែលប្រៀបដូចជា “សមរភូមិក្រោយ” ត្រូវតែគិតគូរគាំទ្រដល់ “សមរភូមិមុខ” តាមរយៈការឧបត្ថម្ភស្បៀងអាហារ និងសម្ភារចាំបាច់នានា ដើម្បីបង្ហាញពីស្មារតីរួបរួមការពារជាតិដ៏រឹងមាំរបស់យើង។

ក្នុងបេសកកម្មដ៏មានអត្ថន័យនេះ ឯកឧត្តម សេរី កុសល បានស្វែងយល់យ៉ាងច្បាស់ពីទឹកចិត្តដ៏អង់អាចក្លាហានរបស់បងប្អូនកងទ័ព ហើយបានថ្លែងអំណរគុណយ៉ាងស្មោះស្ម័គ្រជាទីបំផុតជូនចំពោះវីរភាព និងពលិកម្មរបស់កងកម្លាំងជួរមុខគ្រប់ប្រភេទ និងគ្រប់ទិសទាំងអស់ ដោយមនោសញ្ចេតនាកោតសរសើរដ៏ខ្ពង់ខ្ពស់បំផុត។

អំណោយដែលបានចែកជូនដល់វរនគរបាលការពារព្រំដែនគោកទាំង ៤ វរសេនា រួមមានអង្ករចំនួន ៥តោន ល្ពៅចំនួន១០តោន ពងមាន់ចំនួន៦,០០០គ្រាប់ ទឹកសុទ្ធចំនួន៥០កេស មីចំនួន៨០ កេស ខ្ទឹមសចំនួន៨០គីឡូក្រាម ស្ករស ចំនួន ៨០ គីឡូក្រាម អំបិលចំនួន៨០គីឡូក្រាម ប៊ីចេង ចំនួន ៨០ គីឡូក្រាម និងផ្លែឈើមួយចំនួនទៀត។

ព្រមជាមួយនោះ ក៏មានការប្រគល់ថវិកាជូនវរសេនាតូចការពារព្រំដែននីមួយៗចំនួន៤០ ម៉ឺនរៀល និងផ្គត់ផ្គង់ថវិកាសម្រាប់ការជីកលេណដ្ឋានរឹងមាំចំនួន៥០០ដុល្លារដល់វរការពារព្រំដែន៨០៧។ ទន្ទឹមនឹងនេះ ក៏បានឧបត្ថម្ភថវិកាដល់រដ្ឋបាលឃុំបន្ទាយឆ្មា និងឃុំគោករមៀត រួមទាំងកម្លាំងប្រជាការពារផងដែរ ដោយចំណាយថវិកាសរុបទាំងអស់ចំនួន៤២លានរៀល៕

ដោយ ឈុន សារ៉ាត