AKP កំពង់ធំ ថ្ងៃទី០៧ ខែកក្កដា ឆ្នាំ២០២៥-- លោក ព្រំ ឆដា អភិបាលរងស្រុកស្ទោង លោក យឹម ប៊ុនថេង នាយកអង្គការកូហ្វាពប្រចាំនៅខេត្តកំពង់ធំ បានអញ្ជើញចែកកង់ សម្លៀកបំពាក់ និងសម្ភារសិក្សាដល់សិស្សានុសិស្សនៅកម្រងអង្គឃ្លាំដែល ជាអំណោយរបស់អង្គការកូហ្វាពប្រចាំនៅខេត្តកំពង់ធំដល់សិស្សានុសិស្សនៅកម្រងអង្គឃ្លាំ កាលពីថ្ងៃទី០៦ ខែកក្កដា ឆ្នាំ២០២៥។

អំណោយទាំងនោះរួមមានកង់ចំនួន៨៨ គ្រឿងខោជើងវែងចំនួន៧៩ ខោជើងខ្លីចំនួន៧៩ សំពត់ចំនួន១២២ អាវដៃខ្លីចំនួន២០១កាតាបចំនួន១៣០កាបូបចំនួន១៣០សៀវភៅសរសេរចំនួន៥២០ក្បាល បន្ទាត់ចំនួន២៦០ប្រដាប់ខួងខ្មៅដៃចំនួន២៦០ ខ្មៅដៃចំនួនដើម៣៩០ និងប៊ិចចំនួន៣៩០ដើម។

លោក ព្រំ ឆដា បានលើកឡើងថា តម្លៃនៃការសិក្សាគឺជាកត្តាមួយដែលជំរុញឱ្យសិស្សានុសិស្សសម្រេចនូវគោលដៅរបស់ខ្លួន ពិសេសគឺមានការបង្រៀនពីលោកគ្រូអ្នកគ្រូ និងឪពុកម្ដាយ ដើម្បីឱ្យពួកគាត់ទទួលបាននូវចំណេះដឹង ជំនាញពិតប្រាកដ និងបទពិសោធន៍នៅក្នុងជីវិតប្រកបដោយភាពជោគជ័យ។ ដូច្នេះសូមក្មួយៗត្រូវតែខិតខំសិក្សារៀនសូត្រក្រេបយកចំណេះដឹងពីលោកគ្រូអ្នកគ្រូនិងមករៀនឱ្យបានទៀងទាត់ ដើម្បីឱ្យក្លាយជាកូនល្អ សិស្សល្អ មិត្តល្អ និងពលរដ្ឋល្អ រស់នៅក្នុងសង្គមមានភាពថ្លៃថ្នូរ។

លោក ញង កង នាយកកម្រងអង្គឃ្លាំ បានធ្វើរាយការណ៍ពីសកម្មភាពអង្គការកូហ្វាពបានចាប់យកសាលារៀនចំនួន៤សាលាក្នុងចំណោមសាលាគោលដៅទាំង៩ក្នុងកម្រងអង់ឃ្លាំសម្រាប់ចូលរួមជួសជុលរួមមាន៖ ១. សាលាបឋមសិក្សាអន្លង់ព្រីងសាលា០១ខ្នង០៥បន្ទប់ទំហំ២៨០ម៉ែត្រការេ(៤០ម៉ែត្រគុណ៧ម៉ែត្រ)មានចាក់សាបក្រាលការ៉ូ លាបថ្នាំជុំវិញក្នុង និងក្រៅអគារ។ ២. សាលាបឋមសិក្សាព្រៃខ្លាសាលា០១ខ្នង០៥បន្ទប់ ទំហំ២៨០ម៉ែត្រការ៉េ (៨០ម៉ែត្រគុណ៧ម៉ែត្រ) ក្រាលការ៉ូនៅក្នុងបន្ទប់រៀនចំនួន២បន្ទប់ស្មើនឹង១១២ម៉ែត្រការ៉េ លាបថ្នាំជុំវិញអគារក្នុងនិងក្រៅ។៣. សាលាបឋមសិក្សាភូមិថ្មី សាងសង់កន្លែងលាងសម្អាតដៃ១កន្លែងប្រវែង៤ម៉ែត្រនិងដាក់កញ្ចក់ឆ្លុះមុខ។ ៤. សាលាបឋមសិក្សាឈូកក្រាលការ៉ូនៅក្នុងបន្ទប់រៀនចំនួន២បន្ទប់ស្មើនឹង១១០ម៉ែត្រការ៉េនិងទូដាក់ឯកសារគ្រូចំនួន០១។

លោក ញង កង បានបញ្ជាក់បន្ថែមថា សម្រាប់សាលាបឋមសិក្សាអន្លង់ព្រីងមានថវិកាគាំទ្រពីអង្គការកូហ្វាពចំនួន១០លាន៦២ម៉ឺនរៀលនិងថវិកាបដិភាគពីសហគមន៍ចំនួន៤លានរៀលសរុបចំនួន១៤លាន៦២ម៉ឺរៀល។ ២.សាលាបឋមសិក្សាព្រៃខ្លាថវិកាគាំទ្រពីអង្គការកូហ្វាពមានចំនួន៦១៣៦០០០រៀលនិងថវិកាបដិភាគពីសហគមន៍ចំនួន១៨៤៤០០០ចំនួន៧៩៨០០០០រៀល។ ៣.សាលាបឋមសិក្សាភូមិថ្មី ថវិកាគាំទ្រពីអង្គការកូហ្វាពមានចំនួន៥លានរៀល ថវិកាបដិភាគពីសហគមន៍ចំនួន ១១៣៣០០០រៀលសរុបចំនួន៦១៣៣០០០រៀលនិង ៤.សាលាបឋមសិក្សាឈូកថវិកាគាំទ្រពីអង្គការកូហ្វាព មានចំនួន៤៣២៤០០០រៀល ថវិកាបដិភាគពីសហគមន៍ចំនួន១៣២០០០០រៀលសរុបចំនួន៥៦៤៤០០០រៀល៕

ដោយ ស៊ុម វណ្ណា