AKP កំពង់ស្ពឺ ថ្ងៃទី០៧ ខែកក្កដា ឆ្នាំ២០២៥-- ឯកឧត្ដមបណ្ឌិត ជាម ច័ន្ទសោភ័ណ អភិបាលនៃគណៈអភិបាលខេត្តកំពង់ស្ពឺ និងជាប្រធានកិត្តិយសសមាគមអតីតយុទ្ធជនកម្ពុជាខេត្តកំពង់ស្ពឺ បានអញ្ជើញជាអធិបតីក្នុងពិធីសំណេះសំណាលអបអរសាទរខួបលើកទី១៨ ទិវាអតីតយុទ្ធជនកម្ពុជា នារសៀលថ្ងៃអាទិត្យ ទី០៦ ខែកក្កដា ឆ្នាំ២០២៥ ដោយមានការចូលរួមពីគណៈអភិបាលរងខេត្ត កងកម្លាំងទាំង៣ មន្ទីរអង្គភាពជំនាញជុំវិញខេត្ត អភិបាលស្រុក ស្រុក កម្លាំងទាំង៣ នៅក្រុង ស្រុក មេឃុំ សង្កាត់ ប៉ុស្តិ៍រដ្ឋបាលឃុំទាំង៨៨ ទូទាំងខេត្ត។

ក្នុងឱកាសនោះ ឯកឧត្តម បណ្ឌិត ជាម ច័ន្ទសោភ័ណ បានកោតសរសើរ និងវាយតម្លៃខ្ពស់ ចំពោះការខិតខំប្រឹងប្រែងរបស់សមាគមន៍ អតីតយុទ្ធជនកម្ពុជាខេត្តកំពង់ស្ពឺ ដែលបានបំពេញតួនាទី ភារកិច្ចបានល្អ និងស្មោះត្រង់ រយៈពេល៦ខែដើមឆ្នាំ២០២៥កន្លងមកនេះ។ ក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនែព្រះរាជាណាចក្រកម្ពុជា ដែលតែងតែយកចិត្តទុកដាក់ខ្ពស់ចំពោះអតីតយុទ្ធជននិងបងប្អូននិវត្តជន។ ក្រោមម្លប់សន្តិភាពប្រទេសជាតិមានការអភិវឌ្ឍរីកចម្រើន ធ្វើឱ្យកំណើនសេដ្ឋកិច្ចមានការកើនឡើងយ៉ាងឆាប់រហ័ស ធានាបាននិរន្តរភាពសម្រាប់សេដ្ឋកិច្ចជាតិ។ ក្នុងនោះបង ពូ មីង អតីតយុទ្ធជន បានចូលរួមយ៉ាងសកម្ម ឆ្លងកាត់ការលំបាកក្នុងអតីតកាលនិងរៀបចំស្តារឡើងវិញប្រព័ន្ធរដ្ឋបាល នោះជាការចាប់ផ្តើមដំបូង ឆ្លងកាត់ការលំបាក ជួបប្រទះព្យុះភ្លៀងទម្រាំធ្វើឱ្យកម្ពុជា មានការរីកចម្រើន និងអភិវឌ្ឍមកដល់សព្វថ្ងៃ ហើយសមិទ្ធផលដែលកើនមានមកដល់បច្ចុប្បន្នគឺបានមកមិនអាចខ្វះបានពីបង ពួ មីងអតីតយុទ្ធជនបស់យើង។

ឯកឧត្តមបណ្ឌិតអភិបាលខេត្តបានថ្លែងការគោរពដឹងគុណចំពោះអតីតយុទ្ធជនកម្ពុជាទាំងមូល ជាពិសេសបងប្អូនអតីតយុទ្ធជនកម្ពុជាខេត្តកំពង់ស្ពឺ នូវគំរូវីរភាពដ៏អង់អាច មោះមុត និងគុណបំណាច់ដ៏ធំធេងរបស់វីរយុទ្ធជន យុទ្ធនារីនៃកងកម្លាំងប្រដាប់អាវុធ ដែលបានពលិកម្មគ្រប់បែបយ៉ាង ក្នុងការបម្រើ និងការពារជាតិមាតុភូមិ។ ពលីកម្មប្រកបដោយស្មារតីស្នេហាជាតិ របស់វីរអតីតយុទ្ធជន យុទ្ធនារី នៅគ្រប់ដំណាក់កាលនៃប្រវត្តិសាស្ត្រ គឺបានរួមចំណែក យ៉ាងសំខាន់ក្នុងកិច្ចការពារបូរណភាពទឹកដី ការកសាងសុខសន្តិភាព និងស្ថិរភាពសង្គមសម្រាប់ ព្រះរាជាណាចក្រកម្ពុជា សំដៅធានាឱ្យមានការអភិវឌ្ឍសេដ្ឋកិច្ច និងសង្គមជាឧត្តមប្រយោជន៍ សម្រាប់ជាតិមាតុភូមិ និងប្រជាជនកម្ពុជា។

នាឱកាសនោះដែរ ឯកឧត្តមអភិបាលខេត្តក៏បានធ្វើការអំពាវនាវដល់ឯកឧត្តម លោកជំទាវ លោក លោកស្រី សប្បុរសជន អង្គការដៃគូអភិវឌ្ឍនានា សូមមេត្តាជួយផ្តល់ការគាំទ្រដល់សមាគមអតីតយុទ្ធជនកម្ពុជា ខេត្តកំពង់ស្ពឺ ដើម្បីចូលរួមដោះស្រាយការលំបាករបស់បងប្អូនអតីតយុទ្ធជន ស្របតាមទស្សនៈថា ខ្មែរជាប្រទេសតូច តែមានបេះដូងធំទូលាយ ដែលជាប្រពៃណីរបស់ប្រជាពលរដ្ឋខ្មែរ តែងតែជួយគ្នា និងគាំទ្រគ្នាទៅវិញទៅមក តែងតែសាមគ្គីគ្នាជាធ្លុងមួយគ្រប់ស្ថានភាពនៃការលំបាក។

យោងតាមបាយការណ៍របស់បញ្ជាការតំបន់ប្រតិបត្តិការសឹករងខេត្តកំពង់ស្ពឺ បច្ចុប្បន្នសមាជិកសមាគមអតីតយុទ្ធជនទូទាំងខេត្តកំពង់ស្ពឺគិតត្រឹមខែមិថុនា ឆ្នាំ២០២៥ សរុបចំនួន ៦.៥៥១នាក់ បានចូលជាសមាជិក ស.អ.ក ចំនួន ៥.០៨៣នាក់ ក្នុងនោះ និវត្តន៍ជន ១.៦៥៨ នាក់ និងជនពិការ ១.៥២៧នាក់។ រយៈពេល១២ខែក្នុងឆ្នាំ២០២៤ សមាជិកអតីតយុវជន ១២០នាក់បានទទួលមរណភាព គណៈកម្មាធិការ ស.អ.ក បានចុះបើកប្រាក់បេឡាមរណៈសង្រ្គោះដល់ផ្ទះគ្រួសារនៃសព។ សមាជិកសមាគមអតីតយុទ្ធជនចំនួន ៥.០៨៣នាក់ ស្មើចំនួន១០០ភាគរយទទួលបានប័ណ្ណ ប.ស.ស សម្រាប់ទៅព្យាបាលជម្ងឺដោយឥតគិតថ្លៃ។ សមាជិកអតីតយុទ្ធជនវចំនួន ៥១២ គ្រួសារ/នាក់ ស្មើចំនួន១០ភាគរយ ទទួលបានបណ្ណសមធម៌ (បណ្ណក្រីក្រ )។ អតីតយុទ្ធជនក្នុងភូមិសាស្ត្រខេត្តកំពង់ស្ពឺ ទទួលបាន ៤១៩ខ្នងផ្ទះ គិតចាប់ពីឆ្នាំ២០១២ មកដល់បច្ចុប្បន្នពីសម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ផងដែរ៕

ដោយ លឹម សាន្ត