AKP កំពង់ស្ពឺ ថ្ងៃទី០៦ ខែកក្កដា ឆ្នាំ២០២៥-- ឯកឧត្តម យឹម សុខុម ប្រធានក្រុមប្រឹក្សាខេត្ត និងឯកឧត្តមបណ្ឌិត ជាម ច័ន្ទសោភ័ណ អភិបាលខេត្តកំពង់ស្ពឺ បានអញ្ជើញចូលរួមក្នុងពិធីដាំកូនឈើតាមបណ្តោយផ្លូវជាតិលេខ៤ ក្នុងភូមិសាស្ត្រខេត្តកំពង់ស្ពឺ ចាប់ពីព្រំប្រទល់ខេត្តកណ្តាល រហូតដល់ខេត្តព្រះសីហនុ ប្រវែង៨១គីឡូម៉ែត្រ ក្រោមអធិបតីភាព ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ស្ពឺ នាថ្ងៃទី០៦ ខែកក្កដា ឆ្នាំ២០២៥ ដោយមានការអញ្ជើញចូលរួមពី សមាជិកក្រុមប្រឹក្សាខេត្ត គណៈអភិបាលរងខេត្ត កងកម្លាំងទាំងបី និងប្រធាន អនុប្រធានមន្ទីរជុំវិញខេត្ត ព្រមទាំងលោកគ្រូ អ្នកគ្រូ សិស្សានុសិស្ស យុវជន ជាច្រើនរូបទៀតសរុបប្រមាណ១៥០០នាក់ នៅបរិវេណមន្ទីរអប់រំយុវជននិងកីឡាខេត្តកំពង់ស្ពឺ។

ឯកឧត្តមបណ្ឌិតអភិបាលខេត្តបានមានប្រសាសន៍ថា គោលបំណងក្នុងការដាំដើមឈើនេះដើម្បីបំផុសចលនាប្រជាពលរដ្ឋ កងកម្លំាងប្រដាប់អាវុធ មន្រ្តីរាជការគ្រប់ជាន់ថ្នាក់ សិស្ស និស្សិត ចូលរួមយុទ្ធនាការ សម្អាតបរិស្ថាន ស្របតាមផែនការយុទ្ធសាស្ត្ររបស់ក្រសួង បរិស្ថានដែលបានដាក់ចេញនូវយុទ្ធសាស្រ្តចក្រាវិស័យបរិស្ថាន២០២៣-២០២៨ សំដៅលើ«ភាពស្អាត ភាពបៃតង និងចីរភាព »។

ឯកឧត្តមបណ្ឌិត ជាម ច័ន្ទសោភ័ណ បានថ្លែងអំណរគុណដល់មន្ទីរបរិស្ថានខេត្តកំពង់ស្ពឺ បានផ្តល់កូនឈើប្រភេទដើម ចន្ទគិរី ចំនួន១៦០០០ដើម ផ្តល់ជូនក្រុងស្រុកចំនួន៣គឺក្រុងច្បារមន ស្រុកសំរោងទង ស្រុកភ្នំស្រួច សម្រាប់ដាំសងខាងផ្លូវជាតិលេខ៤ចម្ងាយ៨១គីឡូម៉ែត្រដើម្បីចូលរួមចំណែកសម្អសោភ័ណភាពខេត្ត។

ក្នុងឱកាសនោះ ឯកឧត្តម ឧបនាយករដ្ឋមន្ត្រីបានផ្តល់កិត្តិយសដាំកូនឈើជានិមិត្តរូប និងប្រគល់កូនឈើចាន់គិរី ចំនួន១២.០០០ដើម ដល់ស្រុកភ្នំស្រួចដើម្បីដាំសងខាងលើប្រវែងផ្លូវ៥១.០៧គីឡូម៉ែត្រ  ចំនួន២.៤០០ដើមដល់ស្រុកសំរោងទង ដាំសងខាងលើប្រវែងផ្លូវ១៦.៩៣គីឡូម៉ែត្រ និងចំនួន១.៦០០ដើមដល់ក្រុងច្បារមន ដាំសងខាងលើប្រវែងផ្លូវ១២.៦៨គីឡូម៉ែត្រ  ដើម្បីត្រៀមយកទៅដាំលម្អសងខាងដងផ្លូវជាតិលេខ៤ ក្នុងភូមិសាស្ត្រខេត្តកំពង់ស្ពឺផងដែរ៕

ដោយ លឹម សាន្ត