AKP ភ្នំពេញ ថ្ងៃទី០៥ ខែកក្កដា ឆ្នាំ២០២៥--លោក ហែម គីរី អគ្គលេខាធិការ សហព័ន្ធខ្មែរកីឡាហែលទឹកបានគូសបញ្ជាក់ថា ការប្រកួតកីឡាហែលទឹកកុមារ ឆ្នាំ២០២៥ ដែលជាឆ្នាំទី២នៃការរៀបចំ គឺជាការផ្តល់ឱកាសដល់កុមារា កុមារីចំនួន ១២៨នាក់បានចូលរួមប្រកួតប្រជែងតស៊ូអំណត់ព្យាយាម ដកពិសោធ ដើម្បីឱ្យសហព័ន្ធអាចសម្លឹងមើលធនធានថ្នាលបន្តវេន ត្រៀមឆ្ពោះទៅធ្វើម្ចាស់ផ្ទះ ការប្រកួតកីឡាយុវជនអាស៊ី ឆ្នាំ២០២៩ និងគោលដៅបន្តនាឆ្នាំបន្តបន្ទាប់។

ការគូសបញ្ជាក់របស់លោកអគ្គលេខាធិការបានធ្វើឡើង ក្រោយបញ្ចប់ការប្រកួតកីឡាហែលទឹកកុមារស.ខ.ហឆ្នាំ២០២៥ (KSF Children’s Swimming Competition 2025) នៅថ្ងៃទី០៥ ខែកក្កដា ឆ្នាំ២០២៥ នៅអាងហែលទឹកនៃពហុកីឡដ្ឋានជាតិអូឡាំពិក។

លោក ហែម គីរី បានលើកឡើងទៀតថា មូលហេតុចម្បង ក្នុងការរៀបចំការប្រកួតកីឡាហែលទឹកុមារ ចាប់ពី៦ឆ្នាំដល់១២ឆ្នាំនេះ គឺដោយសារគោលដៅរបស់កម្ពុជាទទួលធ្វើម្ចាស់ផ្ទះ កីឡាយុវជនអាស៊ី ឆ្នាំ២០២៩ ដូច្នេះនៅសល់៤ឆ្នាំទៀត គឺកីឡាករ កីឡាការិនីវ័យក្រោម១២ឆ្នាំនេះនឹងឈានដល់វ័យ១៦ឆ្នាំ ដែលស្ថិតក្នុងស្តង់ដាកម្រិតអាយុដែលយើងធ្វើម្ចាស់ផ្ទះ ឆ្នាំ២០២៩តែម្តង។ ដូច្នេះ គោលដៅ៤ឆ្នាំទៀត តាមរយៈការរៀបចំការប្រកួតជារៀងរាល់ឆ្នាំនេះនឹងបង្កើនបាននូវធនធានកីឡាករ កីឡាការិនីហែលទឹកកាន់តែច្រើន ហើយឱកាសនៃការប្រកួតប្រជែងនេះកាន់តែខ្លាំង។ ជាមួយគ្នានេះ សហព័ន្ធនឹងបន្តសម្លឹងមើលធនធានទាំងក្នុងចំណោមកុមារា កុមារីទាំង១២៨នាក់នេះថាតើអ្នកណាខ្លះនឹងអាចក្លាយជាធនធានយុវជនជម្រើសជាតិកម្ពុជាយើង សម្រាប់ការប្រកួតកីឡាយុវជនអាស៊ី ២០២៩ ក៏ដូចជាគោលដៅបន្តបន្ទាប់នាឆ្នាំ២០៣០ និងឆ្នាំ២០៣៥បន្តទៀត។

អគ្គលេខាធិការរូបនេះបន្ថែមថា ប្រកួតនេះ គឺដើម្បីផ្តល់ឱកាសដល់កុមារា កុមារីកម្ពុជា និងបរទេសរស់នៅកម្ពុជាបានចូលរួមក្នុងវិស័យកីឡាហែលទឹក តាមរយៈការដកស្រង់បទពិសោធ។ មានន័យថា កុមារខ្លះធ្លាប់បានហ្វឹកហាត់ ប៉ុន្តែពួកគាត់ខ្លះមិនទាន់ដឹងពីរបៀបរបប បច្ចេកទេសនៃការចូលរួមប្រកួត ហើយតាមរយៈការប្រកួតនេះនឹងផ្តល់លទ្ធភាពឱ្យពួកគាត់បានចូលរួមទទួលយកនូវបទពិសោធនេះ។ យើងឃើញថា គ្រឹះស្ថានសិក្សា ក្លឹបមួយចំនួនមានលទ្ធភាពក្នុងការបណ្តុះបណ្តាលកុមារា កុមារី ប៉ុន្តែខ្លះមិនទាន់មានលទ្ធភាពរៀបចំការប្រកួត ដូច្នេះហើយសហព័ន្ធខ្មែរកីឡាហែលទឹកបានរៀបចំការប្រកួតកុមារនេះ ដើម្បីផ្តល់ឱកាសដល់កុមារទាំងអស់បានចូលរួមប្រកួត ដើម្បីវាស់ស្ទង់សមត្ថភាពផង ជាការលើកទឹកចិត្តឱ្យមានការចូលរួមប្រកួតផង។

សង្កត់ធ្ងន់បន្ថែមពីលើនេះ លោក ហែម គីរី លើកឡើងថា កុមារា កុមារី ដែលធ្លាប់បានចូលរួមប្រកួតប្រជែង គឺអាចយល់ដឹងពីចក្ខុវិស័យ ក្នុងការអប់រំខ្លួន ដោយមានន័យថា ពួកគាត់ទទួលយកការពិតនូវការឈ្នះ-ចាញ់ និងការរៀបចំខ្លួន។ កីឡាធ្វើឱ្យយើងចេះអំណត់តស៊ូ ព្យាយាម ដូច្នេះសម្រាប់កុមារទាំងការសិក្សាក្តី ទាំងជីវិតរស់នៅប្រចាំថ្ងៃក្តី ត្រូវតែមានការព្យាយាម។ ដូច្នេះចក្ខុវិស័យរបស់សហព័ន្ធ គឺចង់ឱ្យគ្រឹះស្ថានសិក្សាទាំងរដ្ឋ និងឯកជនផ្តល់ឱកាសដល់កុមារបានចូលរួមប្រកួត ដើម្បីទទួលបាននូវចំណេះដឹងក្នុងការរៀបចំខ្លួន ចំណេះដឹងលើការថែទាំសុខភាព ក៏ដូចជាការរៀបចំការរស់នៅរបស់ពួកគាត់ ពីព្រោះថាពេលពួកគាត់មិនបានលទ្ធផលល្អ ក្នុងការប្រកួត ពេលនេះ គឺមិនប្រាកដថាពួកគាត់មិនទទួលបានលទ្ធផលល្អ នាថ្ងៃខាងមុខនោះទេ ដូច្នេះពួកគាត់ត្រូវតស៊ូអំណត់ព្យាយាមបន្តទៀត ដើម្បីទទួលបានលទ្ធផលល្អ នាថ្ងៃខាងមុខ៕

ដោយ ហេង ណាលីន