AKP ភ្នំពេញ ថ្ងៃទី០៥ ខែកក្កដា ឆ្នាំ២០២៥--

​សន្និសីទ​​កំពូល​ប្រព័ន្ធ​ផ្សព្វផ្សាយ​អាស៊ី​ (Asia Media Summit - AMS) ​លើក​ទី​២០ ​នៅ​ខេត្តសៀមរាប ​នឹង​ចាប់ផ្តើម​ពីថ្ងៃ​ទី​២១ ​ដល់​ថ្ងៃទី​២៤ ​ខែកក្កដា ​ឆ្នាំ​២០២៥ ខាងមុខនេះ។ បណ្ដា​ប្រព័ន្ធ​ផ្សព្វផ្សាយ ​វាគ្មិន​សំខាន់ៗ និង​ដៃគូ​សហការ​ប្រមាណ ៧០០នាក់ មក​ពី​ប្រមាណ ៥០ប្រទេស ​នៅ​ទូទាំង​ពិភពលោក ​គ្រោង​នឹងចូលរួម​ក្នុង​ព្រឹត្តិការណ៍​ដ៏​មាន​សារសំខាន់​នេះ។ ព្រះរាជាណាចក្រ​កម្ពុជា​ដែលជា​ម្ចាស់ផ្ទះ​រៀបចំ​សន្និសីទ​​កំពូល​នេះ​រំពឹងថា ​ព្រឹត្តិការណ៍​នេះ​នឹង​អាចជួយ​ពង្រឹង​ទៅលើ​ក្របខ័ណ្ឌ​នៃ​ការទូត​ព័ត៌មាន​ ដែល​សំដៅ​ទៅលើ​វិស័យ​ព័ត៌មាន និង​សោតទស្សន៍​ ព្រមទាំងការ​ពង្រីក​កិច្ចសហប្រតិបត្តិកា​រត​ភ្ជាប់​ក្នុង​តំបន់ ​និង​ពិភពលោក​ចំពោះ​បញ្ហា​ដែល​ជួបប្រទះរួម​គឺ ​ព័ត៌មាន​ក្លែងក្លាយ​ ហើយជាពិសេសគឺ​ហានិភ័យ​នៃ​ការកើនឡើង​នៃ​ព័ត៌មាន​កែ្ល​ង​ក្លាយ​ដែល​បង្កើតឡើង​ដោយ​បញ្ញា​សិប្បនិម្មិត (AI)​។​

​តាមរយៈ​ព្រឹត្តិការណ៍​នេះ ​តួអង្គ​ទាំងអស់​នឹងចូលរួម​ផ្លាស់ប្តូរ​បទពិសោធ​ន៍ យោបល់ និង​កត់ត្រា​ទុក​នូវ​អនុសាសន៍ និង​ធាតុ​ចូល​ដែល​នឹង​រួមចំណែក​សំខាន់​សម្រាប់​ការអភិវឌ្ឍ​វិស័យ​ព័ត៌មាន ​និង​ប្រព័ន្ធ​ផ្សព្វផ្សាយ​ ​ព្រមទាំង​ពង្រឹង​ និង​ពង្រីក​កិច្ចសហប្រតិបត្តិការ​ក្នុង​តំបន់​ក្រោម​មូលបទ «អបអរសាទរ​ពីរ​ទសវត្សរ៍​នៃ​ឧត្តមភាព និង​លើសពីនេះ»​។ ជាមួយនឹង​សន្និសីទ​កំពូល​ប្រព័ន្ធ​ផ្សព្វផ្សាយ​អាស៊ី​នេះ ​ក៏មានការរៀបចំ​កិច្ចប្រជុំ​រដ្ឋមន្ត្រី​អាស៊ី​-​ប៉ាស៊ីហ្វិក ដែលមាន​បណ្តា​ប្រទេស​ជា​សមាជិក​អាស៊ី​-​ប៉ាស៊ីហ្វិក​ចំនួន ២៦ប្រទេស ​ព្រមទាំង​មាន​សិក្ខាសាលា​ពាក់ព័ន្ធ​នឹង​ការងារ​អភិវឌ្ឍ​ប្រព័ន្ធ​ផ្សព្វផ្សាយ​ក្នុង​ក្របខ័ណ្ឌអាស៊ី​-​ប៉ាស៊ីហ្វិក​ផងដែរ​។​

​សន្តិសុខ​ព័ត៌មាន​ត្រូវបាន​ពង្រឹង​ក្នុង​អាណត្តិ​ទី​៧ នៃ​ក្រសួង​ព័ត៌មាន ​ហើយ​សណ្តាប់ធ្នាប់​ផ្នែក​សារព័ត៌មាន​ត្រូវបាន​វាយតម្លៃថា មាន​ភាពល្អប្រសើរ​ក្នុង​រយៈពេល​១​ឆ្នាំ​ជាង​មកនេះ ខណៈ​ក្រសួង​ព័ត៌មាន​បានកសាង​ការទូត​ព័ត៌មាន ជាមួយ​បណ្តា​ប្រទេស​ក្នុង​តំបន់ ​និង​ពិភពលោក ដោយ​រួមគ្នា​ពង្រឹង​ប្រសិទ្ធភាព ​គុណភាព​ព័ត៌មាន និង​សន្តិសុខ​ព័ត៌មាន​ដើម្បី​ប្រឆាំង​ព័ត៌មាន​ក្លែងក្លាយ ​នៅក្នុង​ដំណាក់កាល​បរិបទបច្ចេកវិទ្យា​ឌីជីថល។​

​នៅក្នុង​ការដឹកនាំ​កិច្ចប្រជុំ​ត្រៀម​សន្និសីទ​កំពូល​ប្រព័ន្ធ​ផ្សព្វផ្សាយ​អាស៊ី​លើក​ទី​២០​ នា​រសៀល​ថ្ងៃទី​០២ ខែកក្កដា ឆ្នាំ​២០២៥ ជាមួយ​ថ្នាក់ដឹកនាំ​មកពី​តំណាង​ក្រសួង-​ស្ថាប័ន​ពាក់ព័ន្ធ​ អាជ្ញាធរ​ខេត្តសៀមរាប និង​មន្ត្រី​ជំនាញ​​របស់​ក្រសួង​ព័ត៌មាន​ ​ដើម្បី​ធ្វើការ​ពិនិត្យ​លើ​កិច្ចការងារ​សំខាន់ៗ​មួយចំនួន​ដែល​ត្រូវធ្វើ​មុន​ និង​ក្នុងពេល​នៃ​សន្និសីទ​កំពូល​ប្រព័ន្ធ​ផ្សព្វផ្សាយ​អាស៊ី លើក​ទី​២០ នៅ​ខេត្តសៀមរាប​ ​ឯកឧត្តម​ នេត្រ ភក្ត្រា រដ្ឋមន្ត្រីក្រសួង​ព័ត៌មាន ​បាន​គូសបញ្ជាក់ថា សន្និសីទ​កំពូល​ប្រព័ន្ធ​ផ្សព្វផ្សាយ​អាស៊ី​លើក​ទី២០ នេះ​ គឺ​ដើម្បី​ពង្រឹង​ទៅលើ​ក្របខ័ណ្ឌ​នៃ​ការទូត​ព័ត៌មាន​ ហើយចំពោះ​ការទូត​ព័ត៌មាន​គឺ​សំដៅ​ទៅលើ​វិស័យ​ព័ត៌មាន និង​សោតទស្សន៍។ ​ក្រសួង​ព័ត៌មាន​ក្នុងនាម​ជា​សេនាធិការ​របស់​រាជរ​ដ្ឋា​ភិ​បាល​គឺ​ត្រូវ​ចាំបាច់​រុញ​ការត​ភ្ជាប់​ក្នុង​តំបន់ ​និង​ពិភពលោក​តែម្តង​ ពីព្រោះ​បញ្ហា​ដែល​ជួបប្រទះ​រួម​គឺ ​ព័ត៌មាន​ក្លែងក្លាយ និងហានិភ័យ​នៃ​ការ​កើនឡើង​នៃ​ព័ត៌មាន​កែ្ល​ង​ក្លាយ​ដែល​បង្កើតឡើង​ដោយ AI​។​

«​ ​ប្រទេស​នីមួយៗ​មាន​បញ្ហា​ដូចគ្នា ​រឿង​បណ្តាញ​ទំនាក់ទំនង​សង្គម បញ្ហា​ព័ត៌មាន​ក្លែងក្លាយ រឿង AI ដែល​ជ្រៀតជ្រែក​ក្នុង​វិស័យ​សារព័ត៌មាន ដូច្នេះ​យើង​ត្រូវតែ​និយាយ​អំពី​ការទូត​ព័ត៌មាន ដែល​គ្រប់​ប្រទេស ក្រសួង ស្ថាប័ន ក្នុងចំណោម​បណ្តា​ប្រទេស​ធ្វើ​កិច្ចការងារ​រួមគ្នា​ដើម្បី​ពង្រឹង​ប្រសិទ្ធភាព​ និង​គុណភាព​ព័ត៌មាន​»​។ នេះ​ជាការ​គូសបញ្ជាក់​បន្ថែម​របស់​ឯកឧត្តម​ នេត្រ ភក្ត្រា​។​

​AMS គឺជា​ការជួប​ជុំគ្នា​រប​ស់​ថ្នាក់ដឹកនាំ ​និង​មន្ត្រី​ជំនាញៗ​នៃ​ប្រព័ន្ធ​ផ្សព្វផ្សាយ​ដែល​បានធ្វើ​ឡើងជា​រៀងរាល់ឆ្នាំ។ ឯកឧត្តម ប៉ាង ណាត អនុរដ្ឋលេខាធិការ​ក្រសួង​ព័ត៌មាន ​និង​ជា​អនុប្រធាន​អចិន្ត្រៃយ៍​លេខាធិការដ្ឋាន​រៀបចំ​សន្និសីទ​កំពូល AMS លើក​ទី​២០ មានប្រសាសន៍​ឱ្យដឹងថា​៖ ​AMS នឹង​រៀបចំឡើង​នៅក្នុង​ខេត្តសៀមរាប​ ​ក្រោម​ប្រធានបទ «អបអរសាទរ​ពីរ​ទសវត្សរ៍​នៃ​ឧត្តមភាព និងលើសពីនេះ»។ កិច្ចប្រជុំ​នេះ​គ្រោង​អញ្ជើញ​អ្នកចូលរួម​មកពី​បណ្ដា​ប្រព័ន្ធ​ផ្សព្វផ្សាយ​វាគ្មិន​សំខាន់ៗ និង​ដៃគូ​សហការ​ប្រមាណ ៧០០ នាក់​នៅ​ទូទាំង​ពិភពលោក​ដើម្បី​ជួយ​ផ្សព្វផ្សាយ​ពី​សក្តានុពល​ នៃវិស័យ​ទេសចរណ៍ សម្បត្តិ​វប្បធម៌​ដ៏​សម្បូរ​ណ៍​បែប ភាពស្រស់ស្អាត​ ជាពិសេស​បង្ហាញ​ពី​សុខសន្តិភាព និង​ការអភិវឌ្ឍ​របស់​ប្រទេស​កម្ពុជា​។​

​ដើម្បីឱ្យ​សន្និសីទ​​កំពូល​ប្រព័ន្ធ​ផ្សព្វផ្សាយ​អាស៊ី ​(AMS) ​លើក​ទី​២០ ​ប្រព្រឹត្ត​ដោយ​ជោគជ័យ ​ក្រសួង​ព័ត៌មាន​បាន​ចុះ​អនុស្សរណៈ​ ​ជាមួយ​វិទ្យាស្ថានអាស៊ីប៉ាស៊ីហ្វិក ដើម្បីអភិវឌ្ឍន៍ប្រព័ន្ធផ្សព្វផ្សាយ (AIBD) ​ដើម្បី​រួមគ្នា​ចាប់ផ្ដើម​អនុវត្ត​ការងារ​រៀបចំ​កិច្ចប្រជុំ​កំពូល​ប្រព័ន្ធ​ផ្សព្វផ្សាយ​អាស៊ី​លើក​ទី​២០​ នៅលើ​ទឹកដី​អង្គរ​ខេត្តសៀមរាប ​ឱ្យទទួល​បាន​ជោគជ័យ​។

​កិច្ចប្រជុំ ​និង​ព្រឹត្តិការណ៍​ពាក់ព័ន្ធ​ទាំងអស់​ ក៏​ជា​ឱកាស​មួយ​សម្រាប់​បណ្តា​ប្រទេស​ជា​សមាជិក AIBD ​និង​អ្នកចូលរួម​ទាំងអស់​ផ្តោតលើ​ការពិភាក្សា​រក​ដំណោះស្រាយ​ និង​យន្តការ​សមស្រប​គាំទ្រ​ដល់​កិច្ចខិតខំ​រួម​ដើម្បី​ប្រឆាំង​ព័ត៌មាន​ក្លែងក្លាយ​ដែលជា​បញ្ហា​រួម​របស់​សមាជិក​ក្នុង​តំបន់​ និង​រួមគ្នា​លើកកម្ពស់​ការយល់ដឹង​របស់​ប្រជាពលរដ្ឋ​ក្នុងការទប់ស្កាត់​ការ​សាយភាយ​ព័ត៌មាន​ក្លែងក្លាយ​ដើម្បី​ធានា​ភាពសុខសាន្ត និង​ស្ថិរភាព​សេដ្ឋកិច្ចសង្គម​ ទាំង​ក្នុង​តំបន់​ និង​ក្នុងប្រទេស​សមាជិក​ទាំង​អស់។​

​ឯកឧត្ដម  ប៉ាង ណាត បាន​បញ្ជាក់ថា AMS ​នឹង​ជួយ​ឱ្យ​កម្ពុជា​ពង្រឹង​ទំនាក់ទំនង និង​កិច្ចសហប្រតិបត្តិការ​ជាមួយ​បណ្ដា​ប្រទេស​នានា​នៅក្នុង​តំបន់ និង​ក្រៅ​តំបន់​ក្នុង​វិស័យ​ប្រព័ន្ធ​ផ្សព្វផ្សាយ រួមគ្នាប្រយុទ្ធប្រឆាំង​ព័ត៌មាន​ក្លែងក្លាយ​ដើម្បី​បង្កើន​ការយល់ដឹង​ជា​សាធារណៈ ​និង​ធានា​សន្តិសុខ​សង្គម។ ​ជាងនេះទៅទៀត ​អ្នកពាក់ព័ន្ធ​ទាំងអស់​ក៏​អាច​ផ្លាស់ប្តូរ​នូវ​បទពិសោធន៍​ជំរុញ​ការ​បំលាស់ប្តូរ​ឌីជីថល ពិ​ភាក្សា​អំពី​ក្រមសីលធម៌​សារព័ត៌មាន​ដើម្បី​ធ្វើឱ្យ​ប្រព័ន្ធ​ផ្សព្វផ្សាយ​ដើរ​ទាន់​សម័យកាល អភិវឌ្ឍ​វិស័យ​ប្រព័ន្ធ​ផ្សព្វផ្សាយ ​ជាពិសេស​ធានាបាន​នូវ​គុណភាព ​និង​ភាពត្រឹមត្រូវ​នៃ​ព័ត៌មាន។​

​កម្ពុជា​ធ្លាប់​ធ្វើជា​ម្ចាស់ផ្ទះ​រៀបចំ​ សន្និសីទ​កំពូល AMS លើក​ទី១៦ នៅខេត្តសៀមរាប​កាលពី​ឆ្នាំ២០១៩ ក្រោម​ប្រធានបទ​៖ «​ប្រព័ន្ធ​ផ្សព្វផ្សាយ​ឌីជីថល​ ការ​ផ្តោតលើ​ការ​អភិវ​ឌ្ឍ​ទីផ្សារ​»​។ ព្រឹត្តិការណ៍​នេះ​បាន​ទាក់ទាញ​អ្នកតំណាង​ប្រព័ន្ធ​ផ្សព្វផ្សាយ​ប្រមាណ ៦០០​នាក់​ មកពី៤២​ប្រទេស​ចូលរួម​។
សូមរម្លឹកថា កាលពី​ឆ្នាំ​២០២៤ ឯកឧត្តម នេត្រ ភក្ត្រា រដ្ឋមន្ត្រីក្រសួង​ព័ត៌មាន ​បានអញ្ជើញចូលរួម​សន្និសីទ​កំពូល AMS លើក​ទី១៩ ដែល​ប្រារព្ធ​ធ្វើ​នៅទីក្រុង​គូ​ឡា​ឡាំ​ពួ ​ប្រទេស​ម៉ាឡេស៊ី។ ពេលនោះ​ឯកឧត្តម រដ្ឋមន្ត្រី បាន​អំពាវនាវ​ដល់​បណ្តា​ប្រទេស ជា​សមាជិក AIBD ចូលរួម​ជាមួយ​កម្ពុជា​ក្នុង​យុទ្ធនាការ​ប្រយុទ្ធប្រឆាំង​នឹង​ព័ត៌មាន​ក្លែងក្លាយ ​ដែលជា​បញ្ហា​រួម​របស់​តំបន់ ​ដើម្បី​រួមគ្នា​លើកកម្ពស់​ការយល់ដឹង​របស់​ប្រជាពលរដ្ឋ។ គំនិត​ផ្តួចផ្តើម​នេះ ទទួល​បានការ​គាំទ្រ ​និងការ​សាទរ​ពី​ប្រទេសសមាជិក AIBD។

​នេះ​ជា​មោទនភាព​មួយ​សម្រាប់​ប្រទេស​កម្ពុជា ​ដែល​ត្រូវបាន AIBD គាំទ្រ​ឱ្យ​​ធ្វើជា​ម្ចាស់ផ្ទះ​ សន្និសីទ​កំពូល AMS ជា​លើក​ទី២ ដោយសារ​ប្រទេស​កម្ពុ​ជាមានសក្ដានុពល​គ្រប់គ្រាន់​នៅក្នុង​ការរៀបចំកិច្ចប្រជុំ​នេះ​។ នៅក្នុង​ក្របខ័ណ្ឌ​នៃ​ការរៀបចំ និង​ពង្រឹង​ការគ្រប់គ្រង​សណ្តាប់ធ្នាប់​សារព័ត៌មាន ក្រសួង​ព័ត៌មាន​បាន​អនុវត្ត​ទិសដៅ​ការងារ​អាទិភាព​ក្នុង​ការរៀបចំ​ប្រព័ន្ធ និងយន្តការ​គ្រប់គ្រង​ព័ត៌មាន ដើម្បី​ធានា​លំហ​ព័ត៌មាន និង​សន្តិសុខ​ព័ត៌មាន ព្រមទាំង​បាន​អនុវត្ត​វិធានការ​សមស្រប​ក្នុងការ​ប្រឆាំង​ព័ត៌មាន​ក្លែងក្លាយ​។ 

​សន្និសីទ​កំពូល AMS គឺជា​ការជួបជុំ​រវាង​ក្រុម​ប្រព័ន្ធ​ផ្សព្វផ្សាយ អ្នកដឹកនាំ​ការផ្សព្វផ្សាយ អ្នកសម្រេចចិត្ត​លើ​ការផ្សព្វផ្សាយ អ្នក​ដែលមាន​ជំនាញ​លើ​ផ្នែក​ប្រព័ន្ធ​ផ្សព្វផ្សាយ និង​ដៃគូ​ផ្សព្វផ្សាយ​ដទៃទៀត ​ហើយក៏ជាការ​ជួបជុំ​ប្រចាំឆ្នាំ​ដើម្បី​ផ្លាស់ប្តូរ​បទពិសោធន៍ ​ដើម្បី​ផ្ទេរ​ចំណេះដឹង​ទៅដល់​អ្នកជំនាន់ក្រោយ និង​ដើម្បី​គិតគូរ​ពិចារណា ថា​តើ​ការរីកចម្រើន​នៃ​បច្ចេកវិទ្យា​យ៉ាងណា​ដើម្បី​រក​ដំណោះស្រាយ​នូវ​វិបត្តិ​លើប្រព័ន្ធ​ផ្សព្វផ្សាយ​នាពេល​កន្លងមក តើ​យើង​ត្រូវធ្វើ​បែបណា ​ដូច្នេះ​អ្នក​ដែល​ពាក់ព័ន្ធ​ទាំងអស់នេះ​នឹង​មកជួប​ជុំគ្នា​ដើម្បី​ផ្លាស់ប្តូរ​បទពិសោធន៍ ផ្ទេរ​ចំណេះដឹង ដោះស្រាយ​បញ្ហា​ប្រឈម​នា​ឆ្នាំ​កន្លង​ទៅ លើសកម្មភាព​នៃ​ប្រព័ន្ធ​ផ្សព្វផ្សាយ។ អ្វីដែល​កាន់តែ​ពិសេស​នោះ ​កិច្ចប្រជុំ​នេះ​នឹងចូលរួម​លើកកម្ពស់​តួនាទី​ប្រព័ន្ធ​ផ្សព្វផ្សាយ​ក្នុងការ​អភិវឌ្ឍ​ និង​ការឆ្លើយតប​គ្រោះមហន្តរាយ ដោយមាន​ការពិភាក្សា​លើ​ប្រ​ព័ន្ធ​ប្រកាសអាសន្ន​ក្នុងការ​ត្រៀម​បង្ការ និង​ឆ្លើយតប​គ្រោះមហន្តរាយ​ដើម្បី​ការពារ​អាយុជីវិត​មនុស្ស​ផងដែរ៕
ដោយ បាន ច័ន្ទ​តារា​រិ​ទ្ធ​

​