AKP ភ្នំពេញ ថ្ងៃទី២៥ ខែមិថុនា ឆ្នាំ២០២៥

ឯកឧត្ដម ង្វៀន មិញវូ (Nguyen Minh Vu) ឯកអគ្គរដ្ឋទូតនៃសាធារណរដ្ឋសង្គមនិយមវៀតណាមប្រចាំនៅ  កម្ពុជាបានគូសបញ្ជាក់ថា គិតមកទល់ពេលនេះ វៀតណាមមានគម្រោងវិនិយោគនៅកម្ពុជាចំនួន ២១៥ ដោយមានទុនចុះបញ្ជីសរុបចំនួន ២,៩៤ ពាន់លានដុល្លារអាម៉េរិក ដែលជាបរទេសមួយក្នុងចំណោមបរទេសទាំងបួនដែលមានការវិនិយោគផ្ទាល់ពីបរទេស (FDI) ច្រើនជាងគេនៅក្នុងប្រទេសកម្ពុជា។ ឯកឧត្ដមបានលើកឡើងថា សព្វថ្ងៃនេះ អ្នកវិនិយោគវៀតណាមមានវត្តមាននៅរាជធានីនិងខេត្តចំនួន ១៨ ក្នុងចំណោម រាជធានីនិងខេត្តទាំង ២៥ នៃប្រទេសកម្ពុជា ដោយផ្តោតលើវិស័យសំខាន់ៗ ដូចជា កសិកម្ម ទូរគមនាគមន៍ ធនាគារ សេវាកម្មហិរញ្ញវត្ថុ ឧស្សាហកម្មកែច្នៃនិងកែច្នៃចំណីអាហារ អាជីវកម្មរ៉ែ អាកាសចរណ៍ ទេសចរណ៍។ល។

ថ្លែងប្រាប់ទីភ្នាក់ងារសារព័ត៌មានកម្ពុជា (AKP) ក្នុងឱកាសខួបលើកទី ៥៨ នៃការបង្កើតទំនាក់ទំនងការទូតរវាងវៀតណាម និងកម្ពុជា ឯកឧត្ដម ង្វៀន មិញវូ បានថ្លែងថា គម្រោងជាច្រើនត្រូវបានដាក់ឱ្យដំណើរការប្រកបដោយស្ថិរភាពនិងប្រសិទ្ធភាព ដែលរួមចំណែកច្រើនបែបយ៉ាងដល់វិស័យសេដ្ឋកិច្ចនិងសង្គមជាតិកម្ពុជា ជំរុញការអភិវឌ្ឍន៍ហេដ្ឋារចនាសម្ព័ន្ធ បង្កើតការងារធ្វើ រួមចំណែកបង្កើនប្រាក់ចំណូលដល់ពលករកម្ពុជាមួយផ្នែកធំ ក៏ដូចជារួមចំណែកដល់សន្តិសុខសង្គម និងការងារសប្បុរសធម៌មនុស្សធម៌នៅប្រទេសកម្ពុជា។ ឯកឧត្ដមឯកអគ្គរដ្ឋទូតបានថ្លែងបញ្ជាក់ថា នាពេលខាងមុខ ធុរកិច្ចវៀតណាមជាច្រើននឹងមានគម្រោងវិនិយោគថ្មី ឬពង្រីកការវិនិយោគនៅក្នុងក្នុងប្រទេសកម្ពុជា។ ឯកឧត្ដមក៏បានអះអាងថា មានធុរកិច្ចជាច្រើនបាននិងកំពុងធ្វើការសិក្សាស្វែងរកឱកាសវិវិយោគ ធ្វើអាជីវកម្មនៅក្នុងតំបន់មួយចំនួននៃប្រទេសកម្ពុជាដូចជា រាជធានីភ្នំពេញនិងខេត្តនានាដូចជា ខេត្ដស្វាយរៀង កំពត តាកែវ ក្រចេះ មណ្ឌលគីរី រតនគិរី ព្រះសីហនុ ព្រះវិហារ។ល។ វិស័យដែលសហគ្រាសវៀតណាមចាប់អារម្មណ៍រួមមាន កសិកម្មខ្នាតធំ ឧស្សាហកម្មកែច្នៃផលិតផលកសិកម្ម ទូរគមនាគមន៍និងបច្ចេកវិទ្យាព័ត៌មាន (បណ្តាញ 5G រដ្ឋាភិបាលអេឡិចត្រូនិក បរិវត្តកម្មឌីជីថល) ថាមពលកកើតឡើងវិញ អាជីវកម្មរ៉ែ ឧស្សាហកម្មកែច្នៃ។ សហគ្រាសមួយចំនួនក៏ចាប់អារម្មណ៍លើវិស័យសំណង់ អចលនទ្រព្យ ការផលិតសម្ភារសំណង់ ក៏ដូចជាការចូលរួមក្នុងគម្រោងអភិវឌ្ឍន៍ហេដ្ឋារចនាសម្ព័ន្ធ។

ឯកឧត្ដមឯកអគ្គរដ្ឋទូតបានបញ្ជាក់ផងដែរថា នាពេលខាងមុខ ដើម្បីជំរុញការវិនិយោគរបស់វៀតណាមនៅប្រទេសកម្ពុជា ឯកឧត្ដមគិតថា ប្រទេសទាំងពីរត្រូវរៀបចំឱ្យបានទៀងទាត់នូវព្រឹត្តិការណ៍ផ្សព្វផ្សាយ ដើម្បីជំរុញកិច្ចសហប្រតិបត្តិការពាណិជ្ជកម្ម និងវិនិយោគទ្វេភាគី ដូចជាវេទិកាធុរកិច្ចកម្ពុជា-វៀតណាម កិច្ចប្រជុំជំរុញការវិនិយោគកម្ពុជា-វៀតណាម ការតាំងពិព័រណ៍ទេសចរណ៍ បង្កើតតំបន់សេដ្ឋកិច្ចពិសេសតាមព្រំដែន ។ល។ ដើម្បីជំរុញកិច្ចសហប្រតិបត្តិការវិនិយោគរវាងប្រទេសទាំងពីរឱ្យកាន់តែស៊ីជម្រៅនិងមានប្រសិទ្ធភាពខ្ពស់។ ឯកឧត្ដមក៏បានលើកឧទាហរណ៍ជាក់ស្ដែងថា កាលពីថ្ងៃទី ០២ ខែ មេសា ឆ្នាំ ២០២៥ កន្លងទៅ ស្ថានទូតវៀតណាមប្រចាំនៅកម្ពុជា បានសហការជាមួយសហព័ន្ធសមាគមធុរកិច្ចវៀតណាម-កម្ពុជា (VCBA) រៀបចំវេទិកាសន្ទនាធុរកិច្ច ដោយមានក្រុមហ៊ុនវៀតណាមជាង ១៥០ ចូលរួម ដែលចាប់អារម្មណ៍មកបណ្តាក់ទុននៅកម្ពុជា។

ឯកឧត្ដមឯកអគ្គរដ្ឋទូតជឿជាក់ថា ទំនាក់ទំនងនយោបាយនិងការទូតដ៏ល្អប្រសើរវាងប្រទេសទាំងពីរ ទីតាំងភូមិសាស្ត្រនិងវប្បធម៌ជិតស្និទ្ធនិងការកែលម្អបរិយាកាសវិនិយោគនៃប្រទេសទាំងពីរនាពេលថ្មីៗនេះ នឹងក្លាយជាលក្ខខណ្ឌអំណោយផលសម្រាប់ធុរកិច្ចនៃប្រទេសទាំងពីរក្នុងការវិនិយោគ ធ្វើអាជីវកម្មនិងអភិវឌ្ឍន៍ ពាំនាំមកផលប្រយោជន៍ជាក់ស្តែងដល់អាជីវកម្មនិងប្រជាជននៃប្រទេសទាំងពីរ។ ឯកឧត្ដមបានបញ្ជាក់បន្ថែមថា៖ «ស្ថានទូតវៀតណាមប្រចាំនៅកម្ពុជា នឹងរួមដំណើរជាមួយនឹងស្ថាប័នមានសមត្ថកិច្ចនៃប្រទេសទាំងពីរ គាំទ្រនិងជំរុញធុរកិច្ចវៀតណាមក្នុងការវិនិយោគថ្មី ឬពង្រីកការវិនិយោគនិងធ្វើអាជីវកម្មនៅក្នុងប្រទេសកម្ពុជា»៕

ដោយ៖ រិទ្ធី