AKP ភ្នំពេញ ថ្ងៃទី២១ ខែមិថុនា ឆ្នាំ២០២៥–នៅទីស្តីការក្រសួងមហាផ្ទៃ កាលពីថ្ងៃទី២០ ខែមិថុនា ឆ្នាំ២០២៥ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ អនុប្រធានទី១ នៃក្រុមប្រឹក្សាកីឡាក្រសួងមហាផ្ទៃ បានជួបសំណេះ 
សំណាលជាមួយប្រតិភូ គ្រូបង្វឹក កីឡាករ កីឡាការិនី នៃក្រុមប្រឹក្សាកីឡាក្រសួងមហាផ្ទៃមុនទៅចូលរួមក្នុងព្រឹត្តិការណ៍ប្រកួតកីឡានគរបាល និងកងពន្លត់អគ្គិភ័យពិភពលោកលើកទី២១ ឆ្នាំ២០២៥ នៅទីក្រុង Birmingham រដ្ឋ Alabama សហរដ្ឋអាមេរិក។

សូមជម្រាបជូនថា យោងតាមការឯកភាពដ៏ខ្ពង់ខ្ពស់របស់ ឯកឧត្តម អភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានអនុញ្ញាតឱ្យប្រធានប្រតិភូ អនុប្រធានប្រតិភូ គ្រូបង្វឹក និងកីឡាករ កីឡាការិនីសរុបចំនួន៥២រូបចេញទៅចូលរួមក្នុងការប្រកួតកីឡានគរបាល និងកងពន្លត់អគ្គិភ័យពិភពលោកលើកទី២១ នៅទីក្រុង Birmingham រដ្ឋ Alabama សហរដ្ឋអាមេរិក ដែលគ្រោងនឹងប្រព្រឹត្តទៅចាប់ពីថ្ងៃទី២៧ ខែមិថុនា ដល់ថ្ងៃទី៦ ខែកក្កដា ឆ្នាំ២០២៥ ក្នុងនោះមានចំនួន៩ប្រភេទកីឡា ដែលត្រូវបានបញ្ជូនឱ្យទៅចូលរួមប្រកួតប្រជែង មានដូចជា វាយសី ចំបាប់ ជឺជិតស៊ូ យូដូ ហែលទឹក  វាយកូនឃ្លីលើតុ ការ៉ាតេ តេក្វាន់ដូ និងបាល់ទះ៕ 

ដោយ៖ ចាន់ សុភឿន (ប្រភព៖ ក្រសួងមហាផ្ទៃ)