AKP ភ្នំពេញ ថ្ងៃទី០៦ ខែមិថុនា ឆ្នាំ២០២៥--

ឯកឧត្ដមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា កាលពីព្រឹកថ្ងៃទី០៥ ខែមិថុនា ឆ្នាំ២០២៥ បានអញ្ជើញបើកសន្និសីទវិទ្យាសាស្ត្រលើកទី១៤ ស្តីពីការប្រើប្រាស់សក្តានុពលនៃការស្រាវជ្រាវ និងអភិវឌ្ឍន៍ដើម្បីនវានុវត្តន៍ និងកំណើន នាវិទ្យាស្ថានបច្ចេកវិទ្យាកម្ពុជា ដែលសន្និសីទនេះរៀបចំឡើងក្នុងគោលបំណងដើម្បីអបអរសាទរកម្លាំងថាមពលនៃការស្រាវជ្រាវ និងអភិវឌ្ឍន៍ ដើម្បីជំរុញកម្ពុជាឱ្យរីកចម្រើន ហើយវាក៏ជាវេទិកាដ៏មានសារៈសំខាន់សម្រាប់ចែករំលែកចំណេះដឹង បទពិសោធន៍ លទ្ធផលស្រាវជ្រាវរវាងគ្រឹះស្ថានបណ្ដុះបណ្ដាលក្នុងប្រទេស និងក្រៅប្រទេស និងវិស័យឯកជននានា ដើម្បីបង្កើនភាពជាដៃគូក្នុងការបណ្ដុះបណ្ដាល និងការស្រាវជ្រាវរួមគ្នា។

ឯកឧត្ដមបណ្ឌិតសភាចារ្យ ឧបនាយករដ្ឋមន្ត្រីបានថ្លែងថា ព្រឹត្តិការណ៍នេះបានផ្ដល់ឱកាសដល់អ្នកស្រាវជ្រាវ និងនិស្សិតក្នុងការដាក់បង្ហាញស្នាដៃដែលជាលទ្ធផលស្រាវជ្រាវរបស់ពួកគេ បង្កើតបណ្ដាញជាមួយអ្នកជំនាញឧស្សាហកម្មពាក់ព័ន្ធ ចូលរួមលើកកម្ពស់ការទទួលស្គាល់ចំពោះសហគមន៍ស្រាវជ្រាវ ព្រមទាំងជាឱកាសសម្រាប់សិស្សវិទ្យាល័យទទួលបានការយល់ដឹងស៊ីជម្រៅអំពីមុខវិជ្ជា STEM ដែលជួយពួកគេឱ្យត្រៀមខ្លួនបានល្អប្រសើរសម្រាប់អនាគតសិក្សា និងអាជីពនាពេលខាងមុខ។

ឆ្លើយតបនឹងមូលបទនៃទិវាវិទ្យាសាស្ត្រលើកទី១៤ "ការប្រើប្រាស់សក្តានុពលនៃការស្រាវជ្រាវ និងអភិវឌ្ឍន៍ដើម្បីនវានុវត្តន៍ និងកំណើន" ឯកឧត្ដមបណ្ឌិតសភាចារ្យ ហង់ជួន ណារ៉ុន បានគូសបញ្ជាក់ពីសារៈសំខាន់នៃការស្រាវជ្រាវ និងការអភិវឌ្ឍក្នុងការជំរុញនវានុវត្តន៍លើគ្រប់វិស័យ ដើម្បីលើកកម្ពស់ប្រសិទ្ធភាព និងប្រសិទ្ធផលនៃផលិតកម្ម សេវាកម្ម និងដំណើរការសហគ្រាស ឧស្សាហកម្ម កិច្ចសហការរវាងស្ថាប័នសិក្សា ឧស្សាហកម្ម ទន្ទឹមនឹងការបង្កើតបរិយាកាសអំណោយផលសម្រាប់នវានុវត្តន៍ពីសំណាក់រាជរដ្ឋាភិបាល និងបានគូសរំលេចពីការសិក្សាស្រាវជ្រាវថ្មីៗជាច្រើន កំពុងផ្តោតស្រាវជ្រាវពាក់ព័ន្ធនឹងការវិវឌ្ឍដ៏ឆាប់រហ័សនៃបញ្ញាសិប្បនិម្មិត (AI) ដោយខ្លះបានលើកឡើងពីក្តីបារម្ភថា AI នឹងដណ្ដើមការងាររបស់មនុស្ស ខណៈខ្លះទៀតបានអះអាងថា AI បាន និងកំពុងជួយសម្រួលការងាររបស់មនុស្សឱ្យកាន់តែមានប្រសិទ្ធភាពខ្ពស់ លើកកម្ពស់ការរៀន និងបង្រៀនជំនាញសតវត្សទី២១ ដោយមនុស្សត្រូវតែបន្តអភិវឌ្ឍន៍សមត្ថភាព និងជំនាញ ដើម្បីអាចទាញយកអត្ថប្រយោជន៍ជាអតិបរមាពីការវិវឌ្ឍនៃAI។

ឯកឧត្តមបានបន្ថែមថា រាជរដ្ឋាភិបាលកម្ពុជាបាន និងកំពុងអនុវត្តយុទ្ធសាស្ត្រលើកកម្ពស់ការស្រាវជ្រាវ និងនវានុវត្តន៍ ដោយផ្តោតលើភាពជាដៃគូរវាងស្ថាប័នសិក្សា ឧស្សាហកម្ម និងរដ្ឋាភិបាល ដើម្បីជំរុញពិពិធកម្មសេដ្ឋកិច្ច ការអភិវឌ្ឍវិស័យឯកជន និងសង្គមឌីជីថល។ ជាការឆ្លើយតបទៅនឹងយុទ្ធសាស្ត្របញ្ចកោណ ដំណាក់កាលទី១ ក្រសួងបានដាក់ចេញនូវផែនការយុទ្ធសាស្ត្រអប់រំ ២០២៤-២០២៨ សំដៅធានាថាប្រជាពលរដ្ឋកម្ពុជាទាំងអស់ទទួលបានការអប់រំប្រកបដោយគុណភាព សមធម៌ និងបរិយាប័ន្ន ដោយផ្តោតលើការពង្រឹង និងពង្រីកចំណេះដឹង ជំនាញសតវត្សទី២១ វិន័យ សីលធម៌ សុជីវធម៌ សុខភាព កាយសម្បទា និងការរៀនសូត្រពេញមួយជីវិត៕

ដោយ៖ ចាន់ សុភឿន (ប្រភព៖ ក្រសួងអប់រំ)