AKP កែប ថ្ងៃទី០៥ ខែមិថុនា ឆ្នាំ២០២៥-- ក្នុងទិវាបរិស្ថានជាតិ និងបរិស្ថានពិភពលោក ដែលប្រារព្ធធ្វើឡើងនៅឆ្នេរអង្កោល ខេត្តកែប នៅព្រឹកថ្ងៃទី០៥ ខែមិថុនា ឆ្នាំ២០២៥នេះ យ៉ាងហោចណាស់មានមនុស្សចូលរួមប្រហែលជាង៦០០នាក់ ដោយទិវានេះធ្វើឡើងក្រោមប្រធានបទប្រយុទ្ធប្រឆាំងការបំពុលដោយប្លាស្ទិក។

ទិវានេះបានប្រព្រឹត្តទៅក្រោមអធិបតីភាព ឯកឧត្តមបណ្ឌិត សោម ពិសិដ្ឋ អភិបាលខេត្តកែប និងមានការចូលរួមពីសំណាក់ ឯកឧត្តម លោកជំទាវ លោក លោកស្រី ថ្នាក់ដឹកនាំខេត្ត មន្ទីរអង្គភាព កងកម្លាំងប្រដាប់អាវុធទាំង៣ ក្រុមយុវជន សិស្សានុសិស្ស និងអាជីវករប្រមាណជាង៦០០នាក់ នៅឆ្នេរលេងទឹកអង្កោល ស្រុកដំណាក់ចង្អើរ ខេត្តកែប។ 

លោក អ៊ិន សៅ ប្រធានមន្ទីរបរិស្ថានខេត្តកែប បានលើកឡើងថា ចាប់តាំងពីមានផ្លូវស្អាតតភ្ជាប់មក នេះជាលើកទី៣ហើយដែលមន្ទីរបរិស្ថានបានប្រារព្ធកម្មវិធីធំៗនៅលើទឹកដីឆ្នេរអង្កោល គោលបំណងដើម្បីចូលរួមសំអាតសោភណ្ឌភាពឆ្នេរដ៏ស្រស់ស្អាត និងមានសក្តានុពលនេះឱ្យកាន់តែប្រសើរឡើង បង្កើនការទាក់ទាញភ្ញៀវទេសចរជាតិ អន្តរជាតិមកសម្រាកលំហែកម្សាន្តឱ្យកាន់តែច្រើនឡើងថែមទៀត ក្នុងគោលបំណងលើកកំពស់ជីវភាពរស់នៅរបស់ប្រជាពលរដ្ឋក្នុងតំបន់នេះ។ 

ថ្លែងនាឱកាសនោះដែរ ឯកឧត្តមបណ្ឌិត សោម ពិសិដ្ឋ អភិបាលខេត្តកែប លើកឡើងថា ជារៀងរាល់ឆ្នាំខេត្តកែបតែងតែប្រារព្ធទិវាបរិស្ថានជាតិ និងបរិស្ថានពិភពលោក ៥ មិថុនា ដោយទិវានេះបានប្រារព្ធធ្វើឡើងក្នុងគោលបំណងលើកកម្ពស់ ការយល់ដឹងជាសាធារណៈអំពីការគ្រប់គ្រង និងប្រើប្រាស់ធនធានធម្មជាតិប្រកបដោយ និរន្តរភាព ការប្រយុទ្ធប្រឆាំងនឹងការប្រែប្រួលអាកាសធាតុ ការគ្រប់គ្រងគុណភាពបរិស្ថាន សំដៅលើកកម្ពស់សុខភាពសាធារណៈ។

ឯកឧត្តមបន្តថា តាមរយៈសកម្មភាពនេះ ជាសារមួយយ៉ាងសំខាន់ក្នុងការផ្សព្វផ្សាយ និងជំរុញឱ្យអាជីវករប្រជាពលរដ្ឋក្នុងតំបន់ឆ្នេរអង្កោលចូលរួមសម្អាត ទុកដាក់ វេចខ្ចប់ និងទទួលយកសេវាប្រមូលដឹកជញ្ជូនសំរាមឱ្យបានគ្រប់ៗគ្នា ដើម្បីភាពថ្លៃថ្នូរ និងសោភ័ណភាពឆ្នេររបស់យើង។

ឯកឧត្តមបន្តថា ក្នុងអំឡុងពេលនេះ ត្បិតឆ្នេរអង្កោលត្រូវបានក្រាលគ្របដោយស្មៅសមុទ្រ ធ្វើឱ្យបរិស្ថានឆ្នេរហាក់មិនអំណោយផលល្អសម្រាប់ភ្ញៀវទេសចរចុះលេងកម្សាន្ត តែយ៉ាងណាឯកឧត្តមសំណូមពរដល់អាជីវករជួយសម្អាតទៅតាមលទ្ធភាព ទោះមិនឈ្នះកម្លាំងធម្មជាតិយ៉ាងហោចណាស់ក៏ជួយបរិស្ថានឆ្នេរបានមួយកម្រិតដែរ។ 

សូមបញ្ជាក់ផងដែរថា ជារៀងរាល់ឆ្នាំអំឡុងពេលរដូវធ្លាក់ភ្លៀង តាមបណ្តោយឆ្នេរអង្កោល ត្រូវបានទទួលរងសំណល់នានាបក់តាមទឹករលកមកទើត្រឹមឆ្នេរនេះ បន្ថែមពីនេះទឹកសមុទ្របាននាំយកទាំងពពួកស្មៅសមុទ្រមកជាមួយ ដែលធ្វើឱ្យស្ថានភាពឆ្នេរមិនសូវអំណោយផលល្អសម្រាប់អ្នកទេសចរចុះលេងកម្សាន្ត តែយ៉ាងណាស្ថានភាពនេះនឹងប្រែទៅជាល្អប្រសើរវិញ ក្រោយរដូវធ្លាក់ភ្លៀងបានបញ្ចប់៕

ដោយ ប្រាក់ លាង