AKP ភ្នំពេញ ថ្ងៃទី០៥ ខែមិថុនា ឆ្នាំ២០២៥-- ឯកឧត្តម នាយឧត្តមសេនីយ៍ វង្ស ពិសេន អគ្គមេបញ្ជាការនៃកងយោធពលខេមរភូមិន្ទ បានអនុញ្ញាតឱ្យលោកឧត្តមសេនីយ៍ទោ RAZAQ KOLAWOLE SHITTU ទីប្រឹក្សាយោធានីហ្សេរីយ៉ាប្រចាំកម្ពុជា ដែលមាននិវេសនដ្ឋាននៅទីក្រុងកូឡាឡាំពួរ ប្រទេសម៉ាឡេស៊ី ចូលជួបសម្ដែងការគួរសម នាព្រឹកថ្ងៃទី០៥ ខែមិថុនា ឆ្នាំ២០២៥ នៅអគ្គបញ្ជាការដ្ឋាន។

នៅក្នុងឱកាសនោះ ឯកឧត្តម នាយឧត្តមសេនីយ៍ វង្ស ពិសេន បានសម្តែងនូវការស្វាគមន៍ចំពោះដំណើរបំពេញទស្សនកិច្ចរបស់លោកឧត្តមសេនីយ៍ទោ RAZAQ ដោយជឿជាក់ថា តាមរយៈនៃដំណើរទស្សនកិច្ចនេះ នឹងជួយពង្រឹងដល់ទំនាក់ទំនងកិច្ចសហប្រតិបត្តិការរវាងកងទ័ពប្រទេសទាំងពីរ។

លោកឧត្តមសេនីយ៍ទោ RAZAQ KOLAWOLE SHITTU បានចាត់ទុកជំនួបនាពេលនេះថា គឺជាប្រពៃណីដែលកងទ័ពនីហ្សេរីយ៉ាតែងតែចូលជួបសម្ដែងការគួរសម ដើម្បីណែនាំនិងបង្ហាញខ្លួនជូនឯកឧត្តម អគ្គមេបញ្ជាការបានស្គាល់ បន្តពង្រឹងពង្រីកទំនាក់ទំនងរវាងប្រទេសនីហ្សេរីយ៉ា និងកម្ពុជា។

ឧត្តមសេនីយ៍ទោ RAZAQ KOLAWOLE SHITTU ក៏បានគូសបញ្ជាក់ពីបច្ចុប្បន្នភាពនៃប្រទេសទាំងពីរ ដែលកំពុងបង្កើនទំនាក់ទំនងជាមួយគ្នា ហើយអ្វីដែលពិសេសនោះគឺ នីហ្សេរីយ៉ានិងកម្ពុជា កំពុងអភិវឌ្ឍដូចគ្នា ដោយសង្ឃឹមថាប្រទេសទាំងពីរនឹងផ្តល់ឱកាសដល់ការចែករំលែកបទពិសោធន៍ និងចំណេះដឹងឱ្យគ្នាបានច្រើន។

លោកឧត្តមសេនីយ៍ទោ RAZAQ បានចាប់អារម្មណ៍លើការងារបណ្ដុះបណ្ដាល ដែលប្រទេសនីហ្សេសេរីយ៉ានិងព្រះរាជាណាចក្រកម្ពុជា មានវិទ្យាស្ថានបណ្ដុះបណ្ដាលជាច្រើន។ ដោយហេតុនេះប្រទេសនីហ្សេរីយ៉ា បានស្វាគមន៍ដល់យោធិន នៃកងយោធពលខេមរភូមិន្ទ ដែលមានបំណងចង់ទៅបណ្ដុះបណ្ដាលនៅប្រទេសនីហ្សេរីយ៉ា បើប្រទេសទាំងពីរមានកិច្ចព្រមព្រៀងជាមួយគ្នា។

ឯកឧត្តម នាយឧត្តមសេនីយ៍ វង្ស ពិសេន បានថ្លែងអំណរគុណចំពោះការលើកឡើងនេះ ព្រោះនេះជាការចង់បានរបស់អគ្គបញ្ជាការ ក្នុងការបណ្ដុះបណ្ដាលធនធានមនុស្ស។ តែចំពោះមុខគប្បីត្រូវធ្វើការសម្របសម្រួលនៅថ្នាក់ក្រសួងការពារជាតិជាមុន ទើបកិច្ចសហប្រតិបត្តិការនេះប្រព្រឹត្តទៅបានរលូន និងល្អប្រសើរ៕

ដោយ សំ សាម៉ន (ប្រភព៖ អគ្គមេបញ្ជាការកងយោធពលខេមរភូមិន្ទ)