AKP ភ្នំពេញ ថ្ងៃទី០៥ ខែមិថុនា ឆ្នាំ២០២៥-- ក្រុមការងារបច្ចេកទេស ការិយាល័យអភិរក្ស និងការិយាល័យព័ត៌មានភូមិសាស្រ្ត និងផែនទីនៃនាយកដ្ឋានត្រួតពិនិត្យការធ្វើអាជីវកម្ម និងអភិរក្ស កាលពីថ្ងៃទី០២ ដល់ថ្ងៃទី០៥ ខែមិថុនា ឆ្នាំ២០២៥ បានចុះបេសកកម្មរួមគ្នាសិក្សាប្រមូលចងក្រងទិន្នន័យ ព័ត៌មាន ដើម្បីរៀបចំធ្វើបច្ចុប្បន្នភាពផែនទីគោលតំបន់ទន្លេសាប និងការចុះសិក្សាស្វែងយល់លើកិច្ចការងារអភិរក្ស និងពិគ្រោះយោបល់ជាមួយសហគមន៍ ព្រមទាំងអ្នកពាក់ព័ន្ធនានា ដើម្បីអាចកំណត់វិភាគមុខងារលើកន្លែងអភិរក្សសហគមន៍ ស្តីក្រោមរហាលសួង (រាំងពេន ៣ត) ស្ថិតក្នុងឃុំព្រែកហ្លួង ស្រុកឯកភ្នំ ខេត្តបាត់ដំបង។

ការចុះសិក្សានេះក្រុមការងារមានគោលបំណង ៥សំខាន់ៗគឺ៖ ទី១. ការចុះសិក្សាប្រមូលព័ត៌មាន ទិន្នន័យ ដើម្បីចងក្រងរៀបចំធ្វើផែនទីគោលតំបន់ទន្លេសាបនៃខេត្តទាំង៦ ជុំវិញបឹងទន្លេសាប ដោយផ្តោតសំខាន់លើការរៀបចំចងក្រងព័ត៌មានហេដ្ឋារចនាសម្ព័ន្ធ តំបន់អភិរក្ស ប្រជាសាស្រ្ត និងធនធានធម្មជាតិក្នុងកម្រិតឃុំ។ ទី២. ស្វែងយល់ពីទស្សនវិស័យ និងផែនការគ្រប់គ្រង អភិរក្សធនធានជលផល ជីវចម្រុះ ព្រៃលិចទឹក និងប្រព័ន្ធអេកូឡូស៊ី នៅក្នុងកន្លែងអភិរក្សរាំងពេន ៣ត។ ទី៣.  ការចូលរួមអនុវត្តច្បាប់ និងបទដ្ឋានគតិយុត្ត ដែលមានស្រាប់នៅក្នុងការចូលរួមថែរក្សា ការពារ និងការគ្រប់គ្រង។ ទី៤. សក្តានុពល និងកាលានុវត្តភាពដែលផ្តល់ផលប្រយោជន៍ពីកន្លែងអភិរក្សទៅដល់ប្រជាជនដែលរស់នៅជុំវិញ និងតំបន់ពាក់ព័ន្ធ និងទី៥. ភាពខ្លាំង ភាពខ្សោយ និងវិធានដោះស្រាយ រួមជាមួយតម្រូវការក្នុងវិធានការឆ្ពោះទៅការគ្រប់គ្រង និងអភិរក្ស ធនធានជលផល និងជីវចម្រុះនៅជុំវិញបឹងទន្លេសាបប្រកបដោយចីរភាព។

ពេលនេះក្រុមការងារបច្ចេកទេសអាជ្ញាធរទន្លេសាបបាន និងកំពុងរៀបចំកសាងឯកសារបច្ចេកទេសរួមគ្នាដែលជាធាតុចូលយ៉ាងសំខាន់ដល់ការកសាងផែនការយុទ្ធសាស្រ្តរយៈពេលមធ្យម និងរយៈពេលវែងសម្រាប់តំបន់បឹងទន្លេសាប។

សូមបញ្ជាក់ថា តំបន់ជុំវិញបឹងទន្លេសាបគ្របដណ្តប់ក្នុងខេត្តចំនួន៦ រួមមាន ខេត្តកំពង់ឆ្នាំង ខេត្តពោធិ៍សាត់ ខេត្តបាត់ដំបង ខេត្តបន្ទាយមានជ័យ ខេត្តសៀមរាប ខេត្តកំពង់ធំ។ ក្នុងនេះដែរសហគមន៍នេសាទ និងតំបន់អភិរក្សជលផលគឺបានដើរតួនាទីយ៉ាងសំខាន់ ក្នុងការគ្រប់គ្រង អភិរក្ស និងអភិវឌ្ឍន៍តំបន់ទន្លេសាប។ តំបន់បឹងទន្លេសាបត្រូវបានបែងចែកជាបីតំបន់ ក្នុងនោះតំបន់១ ជាតំបន់លំនៅដ្ឋាន និងស្រែចំការរបស់ប្រជាពលរដ្ឋ ដែលទទួលបានកម្មសិទ្ធិស្របច្បាប់ ហើយតំបន់២ ជាតំបន់ប្រើប្រាស់អាស្រ័យផល និងរក្សាទុកជាតំបន់ទ្រនាប់ការពារ ជាតំបន់ប្រជាពលរដ្ឋធ្វើស្រែឡើងទឹក និងប្រដេញទឹក និងតំបន់ ៣ ជាតំបន់ដែនព្រៃលិចទឹកហាមឃាត់ដាច់ខាត៕

ដោយ ណយ នឿន (ប្រភព៖ អាជ្ញាធរទន្លេសាប)