AKP ព្រះវិហារ ថ្ងៃទី០៥ ខែមិថុនា ឆ្នាំ២០២៥ -- អាជ្ញាធរខេត្តព្រះវិហារ រួមជាមួយប្រជាពលរដ្ឋ សិស្សានុសិស្ស និងអង្គការដៃគូ បានប្រារព្ធទិវាបរិស្ថានជាតិ និងបរិស្ថានពិភពលោក ៥មិថុនា ឆ្នាំ២០២៥ ក្រោមប្រធានបទ «ប្រយុទ្ធប្រឆាំងការបំពុលដោយបរិស្ថាន» និងរួមគ្នាដង្ហែរក្បួនដោយកាន់បដាពាក្យស្លោក ចាក់សារសំឡេងអប់រំអំពីផលប៉ះពាល់នៃការបំពុលបរិស្ថាន និងសារៈសំខាន់នៃការថែរក្សាបរិស្ថាន ព្រមទាំងបានសម្អាតសំរាមនៅតាមដងផ្លូវក្នុងក្រុងព្រះវិហារ។ ពិធីនេះប្រព្រឹត្តិទៅនាព្រឹកថ្ងៃទី០៥ ខែមិថុនា ឆ្នាំ២០២៥ នៅបរិវេណរង្វង់មូលព្រះនរាយណ៍ ស្ថិតក្នុងក្រុងព្រះវិហារ ខេត្តព្រះវិហារ ដោយមានការអញ្ជើញចូលរួមពីលោក សុខ សាន្ដតារ៉ា អភិបាលរងខេត្តព្រះវិហារ។

លោក មឿន សុភេទ ប្រធានមន្ទីរបរិស្ថានខេត្តព្រះវិហារ បានបញ្ជាក់ថា ទិវាបរិស្ថាន ជាតិ និងបរិស្ថានពិភពលោក ៥មិថុនា ឆ្នាំនេះ ត្រូវបានប្រារព្ធធ្វើឡើងក្នុងគោលបំណងដើម្បីផ្សព្វផ្សាយ និងជំរុញសាធារណជនចូលរួមធ្វើអនាម័យបរិស្ថាន តាមលំនៅឋាន និងទីសាធារណៈដើម្បីចូលរួមការប្រយុទ្ធប្រឆាំងការបំពុលដោយប្លាស្ទិក។ លោកប្រធានមន្ទីរបន្ដថា បញ្ហាប្លាស្ទិកគឺជាប្រធានបទដ៏ធំសម្រាប់ពិភពលោកជារួម និងដោយឡែកសម្រាប់កម្ពុជាគឺជាប្រធានក្តៅផងដែរ ហើយបច្ចុប្បន្នកំណើននៃការប្រើប្រាស់ថង់ប្លាស្ទិកបានកើឡើងជាគំហុក ជាក់ស្តែង នៅរាជធានីភ្នំពេញត្រូវបានគេរកឃើញថាមានថង់ប្លាស្ទិកចំនួន១០លានថង់ត្រូវបានប្រើប្រាស់រៀងរាល់ថ្ងៃ ខណៈដែលប្រជាជនកម្ពុជារស់នៅតាមទីក្រុងនានាក្នុង១នាក់ប្រើប្រាស់ថង់ប្លាស្ទិកប្រមានជា ២ ០០០ថង់ក្នុង១ឆ្នាំ។ លោកបានបន្ដទៀតថា ដើម្បីឆ្លើយតបទៅនឹងបញ្ហានេះ ក្រសួងបរិស្ថានបានដាក់ចេញនូវយុទ្ធសាស្ត្រចក្រាវិស័យបរិស្ថានឆ្នាំ ២០២៣-២០២៨ ផ្តោតលើភាពស្អាត ភាពបៃតង និងចីរភាព។

ក្នុងឱកាសនោះ លោក សុខ សាន្តតារ៉ា បានលើកឡើងពីសារៈសំខាន់នៃការយល់ដឹង និងការចូលរួមរបស់ប្រជាពលរដ្ឋគ្រប់រូបក្នុងការថែរក្សាបរិស្ថានឱ្យបានល្អប្រសើរ។ លោកអភិបាលរងខេត្ដបានថ្លែងបញ្ជាក់ថា ការបំពុលបរិស្ថាន មិនថាតែការបំពុលខ្យល់ ទឹក ដីនោះទេ សុទ្ធតែបង្កផលប៉ះពាល់យ៉ាងធ្ងន់ធ្ងរដល់សុខភាពមនុស្ស សត្វ និងប្រព័ន្ធអេកូឡូស៊ីទាំងមូល។ លោកអភិបាលរងខេត្តក៏បានគូសបញ្ជាក់ផងដែរថា ខេត្តព្រះវិហារដែលសម្បូរទៅដោយធនធានធម្មជាតិ និងតំបន់បេតិកភណ្ឌពិភពលោកជាច្រើន កាន់តែត្រូវការការយកចិត្តទុកដាក់ខ្ពស់ក្នុងការការពារ និងអភិរក្ស ដើម្បីធានានូវការអភិវឌ្ឍប្រកបដោយចីរភាព។ លោកអភិបាលរងខេត្ដក៏បានជំរុញឱ្យអាជ្ញាធរគ្រប់លំដាប់ថ្នាក់ បន្តពង្រឹងការអនុវត្តច្បាប់បរិស្ថាន និងផ្សព្វផ្សាយអប់រំដល់ប្រជាពលរដ្ឋអំពីផលប៉ះពាល់នៃការបំពុល និងវិធីសាស្ត្រក្នុងការកាត់បន្ថយ និងលុបបំបាត់ការបំពុល។

ជាមួយគ្នានេះដែរ លោកអភិបាលរងខេត្ត ក៏បានអំពាវនាវដល់ប្រជាពលរដ្ឋទាំងអស់ ជាពិសេសយុវជន ឱ្យចូលរួមយ៉ាងសកម្មក្នុងការកាត់បន្ថយការប្រើប្រាស់ប្លាស្ទិក កែច្នៃសំរាម ការដាំដើមឈើ និងចូលរួមសម្អាតបរិស្ថាននៅតាមគេហដ្ឋាន សាលារៀន និងទីសាធារណៈនានា ដើម្បីរួមចំណែកបង្កើតបរិស្ថានស្អាត បៃតង និងប្រកបដោយផាសុកភាពសម្រាប់យើងទាំងអស់គ្នា និងសម្រាប់មនុស្សជំនាន់ក្រោយ៕

ដោយ៖ រិទ្ធី, ប្រភព៖ មន្ទីរព័ត៌មានខេត្ដព្រះវិហារ