AKP កំពង់ធំ ថ្ងៃទី០៥ ខែមិថុនា ឆ្នាំ២០២៥ -- ឯកឧត្ដម នួន ផារ័ត្ន អភិបាលនៃគណៈអភិបាលខេត្តកំពង់ធំ នាព្រឹកថ្ងៃទី០៥ ខែមិថុនា ឆ្នាំ២០២៥ បានអញ្ជើញជួបសំណេះសំណាល និងជូនដំណើរ នាយទាហាន នាយទាហានរងនៃកងរាជអាវុធហត្ថខេត្តកំពង់ធំ ទៅបន្តហ្វឹកហាត់នៅមជ្ឈមណ្ឌលហ្វឹកហ្វឺន កងរាជអាវុធហត្ថភ្នំជុំសែនរីករាយ ខេត្តកំពង់ឆ្នាំង ដើម្បីត្រៀមឈរផែនដើរព្យុះហយាត្រាអបអរសាទរខួបលើកទី៣២ ទិវាកងរាជអាវុធហត្ថ (១៤ កក្កដា ១៩៩៣-១៤ កក្កដា ២០២៥)។

ឯកឧត្ដម នួន ផារ័ត្ន បានកោតសរសើរដល់នាយទាហាន នាយទាហានរងនៃកងរាជអាវុធហត្ថកំពង់ធំទាំងអស់ក្នុងការខិតខំប្រឹងប្រែង ហ្វឹកហាត់ ក៏ដូចជាចូលរួមយ៉ាងសកម្មក្នុងការការពារសន្តិសុខ សុវត្ថិភាព ជូនប្រជាពលរដ្ឋ និងការពារសង្គមជាតិ។ សូមឱ្យប្អូនៗដែលសិក្ខាកាម ត្រូវខិតខំប្រឹងប្រែងរៀនសូត្រ ដើម្បីក្លាយខ្លួនទៅជាអាវុធហត្ថមានជំនាញ មានវិជ្ជាជីវៈច្បាស់លាស់ និងជាទំពាំងស្នងឬស្សីដ៏ល្អ សម្រាប់បម្រើ និងការពារប្រទេសជាតិទាំងមូល។

ឆ្លៀតក្នុងឱកាសនោះ ឯកឧត្ដមអភិបាលខេត្តបាននាំយកអង្ករចំនួន៥តោន និងថវិកាចំនួន១៥លានរៀល ជូនដល់នាយទាហាន នាយទាហានរង និងពលទាហានចំនួន៣០០នាក់ក្នុងម្នាក់ៗទទួលបានថវិកាចំនួន៥០០០០រៀល។

លោក ឧត្តមសេនីយ៍ត្រី មាស យ៉ត មេបញ្ជាការ កងរាជអាវុធហត្ថខេត្តកំពង់ធំបានធ្វើសេចក្ដីរាយការណ៍ ជូន ឯកឧត្ដម នួន ផារ័ត្ន អភិបាលខេត្ត អំពីការហ្វឹកហាត់ដោយសង្ខេបរបស់កងរាជអាវុធហត្ថខេត្តកំពង់ធំនិងបានថ្លែងអំណរគុណយ៉ាងជ្រាលជ្រៅចំពោះ ឯកឧត្ដមអភិបាលខេត្ត ដែលបានចំណាយពេលវេលាដ៏មានតម្លៃអញ្ជើញមកសំណេះសំណាលនិងបានឧបត្ថម្ភ អង្ករ ព្រមទាំងថវិកា ដល់នាយទាហាន នាយទាហានរង និងសិក្ខាកាមនៃកងរាជអាវុធហត្ថកំពង់ធំ៕

ដោយ ស៊ុម វណ្ណា