AKP បន្ទាយមានជ័យ ថ្ងៃទី០៥ ខែមិថុនា ឆ្នាំ២០២៥ -- រដ្ឋបាលខេត្តបន្ទាយមានជ័យ នាព្រឹកថ្ងៃទី០៥ ខែមិថុនា ឆ្នាំ២០២៥ បានរៀបចំប្រារព្ធទិវាបរិស្ថានជាតិ និងបរិស្ថានពិភពលោក ក្រោមប្រធានបទដ៏សំខាន់ "ប្រយុទ្ធប្រឆាំងការបំពុលដោយផ្លាស្ទិក" ដោយពិធីដ៏មានអត្ថន័យនេះត្រូវបានធ្វើឡើងនៅបរិវេណអនុវិទ្យាល័យភ្នៀត សង្កាត់ភ្នៀត ក្រុងសិរីសោភ័ណ ក្រោមអធិបតីភាពដ៏ខ្ពង់ខ្ពស់របស់លោក ប្រាក់ ប៉ូលី អភិបាលរងខេត្ត តំណាងឯកឧត្តម អ៊ុ រាត្រី អភិបាលនៃគណៈអភិបាលខេត្តបន្ទាយមានជ័យ។

ព្រឹត្តិការណ៍នេះបានប្រមូលផ្ដុំការចូលរួមយ៉ាងផុសផុលពីសំណាក់មន្ទីរ-អង្គភាពពាក់ព័ន្ធ រដ្ឋបាលក្រុង កងកម្លាំងប្រដាប់អាវុធទាំងបីស្រុក ចៅសង្កាត់ មេភូមិ លោកគ្រូ អ្នកគ្រូ សិស្សានុសិស្សនៃអនុវិទ្យាល័យភ្នៀត និងតំណាងក្រុមហ៊ុនប្រមូលសំរាម សរុបប្រមាណ ៤៥៨នាក់។ វត្តមានដ៏ច្រើនកុះករនេះ បានឆ្លុះបញ្ចាំងពីការប្តេជ្ញាចិត្តរួមគ្នា ដើម្បីដោះស្រាយបញ្ហាការបំពុលបរិស្ថាន ជាពិសេសគឺប្លាស្ទិក ដែលកំពុងក្លាយជាការគំរាមកំហែងយ៉ាងធ្ងន់ធ្ងរដល់ភពផែនដី និងសុខភាពមនុស្សជាតិ។

ក្នុងឱកាសនោះ លោក ប្រាក់ ប៉ូលី អភិបាលរងខេត្ត បានគូសបញ្ជាក់ពីសារៈសំខាន់នៃទិវាបរិស្ថាននេះ ដែលជាឱកាសដ៏ល្អមួយដើម្បីក្រើនរំលឹក និងលើកកម្ពស់ការយល់ដឹងជាសាធារណៈអំពីផលប៉ះពាល់អវិជ្ជមាននៃប្លាស្ទិកទៅលើបរិស្ថាន និងប្រព័ន្ធអេកូឡូស៊ី។ ប្លាស្ទិកដែលប្រើប្រាស់តែម្ដងហើយបោះចោល គឺជាប្រភពនៃការបំពុលដ៏ធំសម្បើម ដែលត្រូវការពេលវេលារាប់រយឆ្នាំដើម្បីបំបែកខ្លួន ហើយវាបានជ្រាបចូលទៅក្នុងដី ទឹក និងខ្យល់ ប៉ះពាល់ដល់ជីវិតសត្វព្រៃ និងជលផល រួមទាំងសុខភាពមនុស្សតាមរយៈខ្សែសង្វាក់អាហារ។

លោកអភិបាលរងខេត្តក៏បានអំពាវនាវដល់សាធារណជន ជាពិសេសសិស្សានុសិស្ស ដែលជាទំពាំងស្នងឫស្សី ឱ្យចូលរួមយ៉ាងសកម្មក្នុងការកាត់បន្ថយការប្រើប្រាស់ប្លាស្ទិក តាមរយៈការអនុវត្តន៍គោលការណ៍ "3Rs" គឺ Reduce (កាត់បន្ថយ), Reuse (ប្រើឡើងវិញ), និង Recycle (កែច្នៃ)។ លោកក៏បានលើកទឹកចិត្តឱ្យមានការប្រើប្រាស់ផលិតផលដែលងាយរលាយបំបែកបានតាមបែបធម្មជាតិ និងចូលរួមថែរក្សាបរិស្ថានជុំវិញខ្លួនឱ្យមានអនាម័យល្អ។ ការងារបរិស្ថានមិនមែនជាបន្ទុករបស់បុគ្គលណាម្នាក់ ឬស្ថាប័នណាមួយនោះទេ តែជាកាតព្វកិច្ចរួមរបស់ប្រជាពលរដ្ឋគ្រប់រូប ដើម្បីធានានូវបរិស្ថានស្អាតសម្រាប់កូនចៅជំនាន់ក្រោយ។ 

កញ្ញា សុខ លីណា សិស្សថ្នាក់ទី១១ នៃអនុវិទ្យាល័យភ្នៀត បានថ្លែងថា "ខ្ញុំពិតជាយល់ដឹងច្រើនពីគ្រោះថ្នាក់នៃប្លាស្ទិក បន្ទាប់ពីបានចូលរួមកម្មវិធីនេះ។ ខ្ញុំនឹងចាប់ផ្តើមអនុវត្តន៍ដោយខ្លួនឯង ដោយកាត់បន្ថយការប្រើថង់ប្លាស្ទិក និងដបទឹកប្លាស្ទិក ហើយនឹងលើកទឹកចិត្តមិត្តភក្តិ និងក្រុមគ្រួសារខ្ញុំឱ្យធ្វើដូចគ្នា"។

ចំណែក លោក សៅ រិទ្ធី តំណាងក្រុមហ៊ុនប្រមូលសំរាម ក៏បានសម្តែងការគាំទ្រយ៉ាងពេញទំហឹងចំពោះយុទ្ធនាការនេះ។ លោកបានមានប្រសាសន៍ថា "ក្រុមហ៊ុនយើងខ្ញុំរីករាយក្នុងការចូលរួមចំណែកក្នុងការប្រមូល និងគ្រប់គ្រងសំរាមឱ្យបានត្រឹមត្រូវ។ ទោះជាយ៉ាងណា បញ្ហាប្លាស្ទិកទាមទារការសហការពីគ្រប់ភាគី រាប់តាំងពីអ្នកប្រើប្រាស់រហូតដល់អាជ្ញាធរ និងក្រុមហ៊ុន។ យើងសង្ឃឹមថា ប្រធានបទនេះនឹងជំរុញឱ្យមានការកែប្រែឥរិយាបថក្នុងការប្រើប្រាស់ និងគ្រប់គ្រងសំណល់ប្លាស្ទិកឱ្យកាន់តែប្រសើរឡើង"។

ការប្រារព្ធទិវាបរិស្ថានជាតិ និងបរិស្ថានពិភពលោក ក្រោមប្រធានបទ "ប្រយុទ្ធប្រឆាំងការបំពុលដោយផ្លាស្ទិក" នៅខេត្តបន្ទាយមានជ័យនេះ គឺជាសញ្ញាមួយបង្ហាញពីការយកចិត្តទុកដាក់ខ្ពស់របស់អាជ្ញាធរ និងការចូលរួមយ៉ាងសកម្មរបស់ប្រជាពលរដ្ឋ ក្នុងការដោះស្រាយបញ្ហាបរិស្ថានដ៏បន្ទាន់នេះ។ តាមរយៈការអប់រំ ការលើកកម្ពស់ការយល់ដឹង និងការអនុវត្តន៍ជាក់ស្តែង ប្រជាពលរដ្ឋខេត្តបន្ទាយមានជ័យ រួមទាំងរាជរដ្ឋាភិបាល កំពុងដើរតួនាទីយ៉ាងសំខាន់ក្នុងការកសាងអនាគតមួយដែលគ្មានការបំពុលដោយប្លាស្ទិក សម្រាប់មនុស្សជំនាន់ក្រោយ៕

ដោយ ឈុន សារ៉ាត