AKP កំពង់ធំ ថ្ងៃទី០៥ ខែមិថុនា ឆ្នាំ២០២៥-- ស្ត្រីរឹងមាំគឺជាស្ត្រីដែលមានសេដ្ឋកិច្ចនៅក្នុងដៃ “មានលុយចាយគ្រប់គ្រាន់” ជាកត្តាមួយដែលនាំឱ្យមានការកាត់បន្ថយនូវអំពើហិង្សាក្នុងគ្រួសារ។ នេះជាប្រសាសន៍លើកឡើងរបស់លោកស្រី លំ គន្ធារី អភិបាលរងខេត្តកំពង់ធំ ក្នុងឱកាសអញ្ជើញជាអធិបតីក្នុងកិច្ចប្រជុំក្រុមការងារឆ្លើយតបជាពហុវិស័យចំពោះអំពើហិង្សា ទាក់ទងនឹងយេនឌ័រ កាលពីរសៀលថ្ងៃទី០៤ ខែមិថុនា ឆ្នាំ២០២៥ នៅមន្ទីរកិច្ចការនារីខេត្តកំពង់ធំ។

លោកស្រី លំ គន្ធារី មានប្រសាសន៍ថា តាមរយៈការរួមគ្នាលើកកម្ពស់យេនឌ័រ គឺចង់សំដៅទៅដល់ការយកចិត្តទុកដាក់ ការផ្ដល់សិទ្ធិពេញលេញ និងការគាំពារ ចំពោះស្ត្រី និងកុមារី។ ហេតុដូច្នេះ សូមក្រុមការងារទាំងអស់ដែលមកពីតាមបណ្ដាស្រុកទាំង៧នៅក្នុងខេត្តកំពង់ធំ មេត្តាយកចិត្តទុកដាក់ឱ្យបានខ្ពស់ទៅលើកិច្ចអន្តរាគមន៍ជួយដោះស្រាយ បញ្ហារបស់ស្ត្រី និងកុមារី ដែលរងគ្រោះ ដោយការរំលោភបំពាន និងរងនូវអំពើហិង្សានៅក្នុងមូលដ្ឋានឱ្យបានទាន់ពេលវេលា និងមានប្រសិទ្ធភាពបំផុត។ ជាពិសេសត្រូវជួយផ្ដល់កន្លែងមានសុវត្ថិភាព ស្វែងរកសេវាផ្នែកច្បាប់ សេវាថែទាំសុខភាព ស្វែងរកការបណ្ដុះបណ្ដាលជំនាញវិជ្ជាជីវៈ និងស្វែងរកការងារ សម្រាប់ជនរងគ្រោះផងដែរ។ ក្នុងករណីមានអំពើហិង្សា និងការរំលោភបំពានកើតឡើង ត្រូវសហការធ្វើយ៉ាងណាចាប់ជនប្រព្រឹត្តបទល្មើសយកមកផ្ដន្ទាទោសទៅតាមផ្លូវច្បាប់ឱ្យខានតែបាន។

លោកស្រីបានបន្តថា រាជរដ្ឋាភិបាលកម្ពុជាបានយកចិត្តទុកដាក់ខ្ពស់ទៅលើការជួយជនរងគ្រោះ ដោយបានបង្កើតគណៈមេធាវីសម្ដេចតេជោ របស់ក្រុមប្រឹក្សាជាតិកម្ពុជាដើម្បីស្ត្រី ដែលនឹងជួយដល់ស្ត្រី និងកុមារីដែលរងគ្រោះដោយអំពើហិង្សានៅក្នុងព្រះរាជាណាចក្រកម្ពុជាដោយឥតគិតថ្លៃដែលនេះគឺជាការលើកទឹកចិត្តនិងជាឱកាសសម្រាប់ស្ត្រីដើម្បីពង្រឹងសមត្ថភាពរបស់ខ្លួនឱ្យកាន់តែមានភាពរឹងមាំ ហើយឈានទៅក្លាយជាស្ត្រី ដែលមានសេដ្ឋកិច្ចនៅក្នុងដៃរបស់ខ្លួន បានន័យថាស្ត្រីមានលុយសម្រាប់ប្រើប្រាស់តាមតម្រូវការ តាមរយៈការមានការងារធ្វើបង្កើតចំណូលឱ្យខ្លួនឯងទាំងនេះជាមូលហេតុមួយដែលនាំឱ្យមានការកាត់បន្ថយនូវអំពើហិង្សាមួយចំណែកធំចំពោះស្ត្រីនៅក្នុងជីវភាពប្រចាំថ្ងៃក្នុងគ្រួសារ។

ទន្ទឹមនឹងនោះ លោកស្រី ស៊ិន ស៊ីផាន ប្រធានមន្ទីរកិច្ចការនារីមានប្រសាសន៍ថា ការបង្កើតក្រុមការងារ ឆ្លើយតបជាពហុវិស័យ ចំពោះអំពើហិង្សា ទាក់ទងនឹងយេនឌ័រ ក្នុងខេត្តកំពង់ធំ ដែលមានចំនួន៧ស្រុក គឺមានភារកិច្ច និងទំនួលខុសត្រូវ ដូចមានចែងនៅក្នុងសេចក្តីសម្រេចហើយក៏សូមអរគុណចំពោះកិច្ចខិតខំប្រឹងប្រែងរបស់ក្រុមការងារក្នុងការសម្របសម្រួល ដែលចូលរួមក្នុងការដោះស្រាយបញ្ហាដល់ជនរងគ្រោះជាស្ត្រីនិងកុមារី កន្លងមកដោយបានទទួលបាននូវលទ្ធផលល្អប្រសើរ។ដូច្នេះជាទិសដៅនិងផែនការបន្ត សូមក្រុមការងារតាមបណ្ដាលស្រុកទាំងអស់បន្តខិតខំឱ្យអស់ពីសមត្ថភាព ក្នុងការចូលរួម លើកកម្ពស់យេនឌ័រ ដើម្បីស្ត្រី និងកុមារី រួចផុតពីការរំលោភបំពាន និងការទទួលរងនូវអំពើហិង្សាគ្រប់រូបភាព៕

ដោយ ស៊ុម វណ្ណា