AKPកំពង់ធំថ្ងៃទី០៥ខែមិថុនាឆ្នាំ២០២៥-- ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំកាលពីរសៀលថ្ងៃទី០៤ខែមិថុនាឆ្នាំ២០២៥បានដឹកនាំសហការីនាំយកស្បៀងអាហារ គ្រឿងឧបភោគបរិភោគ សស័ង្កសីដែលជាអំណោយដ៏ថ្លៃថ្លារបស់សម្ដេចមហាបវរធិបតី ហ៊ុន ម៉ាណែតនាយករដ្ឋមន្ត្រីនៃព្រះរាជាណាចក្រកម្ពុជានិងលោកជំទាវ បណ្ឌិត​ពេជ​ ចន្ទ​មុន្នី​ ទៅឧបត្ថម្ភនិងជួយសាងសង់ជម្រកស្នាក់នៅថ្មីជូនប្រជាពលរដ្ឋដែលរងគ្រោះមហន្តរាយដោយខ្យល់កន្ត្រាក់បណ្ដាលឱ្យខូចខាត​ជម្រក​ស្នាក់​នៅ០១ខ្នង​ នៅភូមិត្រពាំងព្រលិត ឃុំត្រពាំងឬស្សី ស្រុកកំពង់ស្វាយ ខេត្តកំពង់ធំ។

ឧត្តមសេនីយ៍ទោ សោម ស៊ុន បានបញ្ជាក់ថា នៅវេលាម៉ោង៩និង៣០នាទីយប់ថ្ងៃទី២ ខែមិថុនា ឆ្នាំ២០២៥ កន្លងទៅនេះមានខ្យល់កន្ត្រាក់និងភ្លៀងមួយមេបណ្ដាលឱ្យខូចខាត របើកដំបូលផ្ទះមួយខ្នងទំហំ ៦ម៉ែត្រគុណនិង៨ ម៉ែត្រ សាងសង់ពីឈើដំបូលនិងជញ្ជាំងស័ង្កសី របស់ឈ្មោះ ថន សោ និងភរិយាឈ្មោះ ឡុង ហ៊ីម  មានកូននៅក្នុងបន្ទុកចំនួន៤នាក់ ដែលគ្រួសារនេះមានជីវភាពលំបាកខ្វះខាតយ៉ាងខ្លាំង។ 

នៅក្នុងឱកាសនោះឧត្តមសេនីយ៍ទោ សោម ស៊ុន រួមជាមួយសហការី ព្រមទាំងអាជ្ញាធរដែនដីនិងប្រជាពលរដ្ឋបានរួមគ្នាជួយសាងសង់ជម្រកស្នាក់នៅថ្មីជូនគាត់ ដោយបានឧបត្ថម្ភស័ង្កសីចំនួន៤០សន្លឹក សម្រាប់ប្រក់​ដដំបូលនិង​បាំងជញ្ជាំងនិងឧបត្ថម្ភអង្ករចំនួន៥០គីឡូក្រាម មីជាតិចំនួន ២កេស ទឹកត្រីទឹកស៊ីអ៊ីវចំនួន២យួរ ត្រីខកំប៉ុងចំនួន២យួរនិងថវិកាមួយចំនួនដែលជាអំណោយដ៏ថ្លៃថ្លារបស់សម្ដេចមហាបវរធិបតី ហ៊ុន ម៉ាណែតនិងលោកជំទាវបណ្ឌិតពេជ ចន្ទមុន្នី។

លោក ថន សោ និងក្រុមគ្រួសារ មានសេចក្តីរំភើបចិត្តឥតឧបមារនិងបានសូមគោរពថ្លែងអំណរគុណដ៏ជ្រាលជ្រៅជាទីបំផុតចំពោះសម្ដេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី តាមរយៈឧត្តមសេនីយ៍ទោ សោម ស៊ុន ដែលបានជួយឧបត្ថម្ភគ្រឿងឧបភោគបរិភោគថវិកា និងស័ង្កសីព្រមទាំងបានជួយសាងសង់ជម្រកស្នាក់នៅជូនគាត់ជាថ្មីផងដែរនិងសូមគោរពជូនពរសម្ដេចនិងលោកជំទាវព្រមទាំងក្រុមការងារទាំងអស់សូមទទួលបានព្រះពុទ្ធពរទាំង៤ប្រការ កុំបីឃ្លៀងឃ្លាតឡើយ៕

ដោយ៖ ស៊ុម វណ្ណា, ប្រភពតំបន់សឹករងកំពង់ធំ