AKP កំពង់ចាម ថ្ងៃទី០៤ ខែមិថុនា ឆ្នាំ២០២៥--

ឯកឧត្តម អ៊ុន ចាន់ដា អភិបាលខេត្តកំពង់ចាមបានលើកឡើងថា មន្ត្រីរាជការសាធារណៈយើងទាំងអស់គ្រប់ផ្នែកគ្រប់ថ្នាក់ត្រូវតែខិតខំធ្វើការបម្រើសេវាជូនប្រជាពលរដ្ឋឱ្យបានល្អ ទាំងសេវាកាតព្វកិច្ច និងសេវាសំណូមពរ ដោយត្រូវធ្វើការឆ្លើយតបនូវបំណងប្រាថ្នាពិតប្រាកដរបស់ប្រជាពលរដ្ឋ ធ្វើយ៉ាងណាឆ្លើយតបជូនប្រជាពលរដ្ឋ និងចង់ឃើញប្រជាពលរដ្ឋរស់នៅប្រកបដោយសុខសាន្ត និងសប្បាយរីករាយ។

ឯកឧត្តមអភិបាលខេត្តបានថ្លែងដូចនេះក្នុងកិច្ចប្រជុំត្រួតពិនិត្យការអនុវត្តការងាររបស់រដ្ឋបាលស្រុកចំការលើ ខេត្តកំពង់ចាម លើការពង្រឹងការងារ លើការរក្សាសន្តិសុខសណ្ដាប់ធ្នាប់ និងការបម្រើសេវាជូនប្រជាពលរដ្ឋ ដោយមានការចូលរួមពីឯកឧត្តម ខ្លូត ផន ប្រធានក្រុមប្រឹក្សាខេត្តកំពង់ចាម  នៅព្រឹកថ្ងៃទី០៤ ខែមិថុនា ឆ្នាំ២០២៥ នៅសាលាស្រុកចំការលើរបស់ខេត្តកំពង់ចាម។

ក្នុងឱកាសនោះ ឯកឧត្តមអភិបាលខេត្តបានចោទជាសំណួរថា តើធ្វើយ៉ាងណា ដើម្បីឱ្យប្រជាពលរដ្ឋរស់នៅប្រកបដោយសុខសាន្ត? តើមន្ត្រីយើងចាំបាច់ត្រូវមើលអំពីការងារប្រចាំថ្ងៃតើអ្វីដែលជាតម្រូវការរបស់បងប្អូនប្រជាពលរដ្ឋ? ហើយអ្វីដែលជាកាតព្វកិច្ចរបស់មន្ត្រីយើង?

ទន្ទឹមនឹងនេះ ឯកឧត្តមបានបញ្ជាក់ថា ដើម្បីឱ្យប្រជាពលរដ្ឋរស់នៅប្រកបដោយសុខសាន្តនោះ ចំណុចទី១ គឺការបម្រើសេវាសន្តិសុខសណ្ដាប់ធ្នាប់សាធារណៈបានល្អ មិនមានបាតុភាពអសកម្ម គ្មានអំពើចោរកម្មផ្សេងៗ គ្មានបញ្ហាគ្រឿងញៀន គ្មានបញ្ហាក្មេងទំនើង ដែលរំខានដល់ការរស់នៅរបស់ប្រជាពលរដ្ឋ និងចំណុចទី២ គឺការបម្រើសេវាដែលជាតម្រូវការរបស់ប្រជាពលរដ្ឋនូវឯកសារផ្សេងៗ ដើម្បីពួកគាត់យកទៅប្រកបការងារដែលស្របច្បាប់ ក្នុងការបង្កើនចំណូលក្នុងគ្រួសារ។ ហេតុដូច្នេះហើយ ដែលត្រូវការឱ្យមន្ត្រីរបស់យើង រួមទាំងកងកម្លាំង ធ្វើការងារប្រកបដោយស្វាហាប់ និងម៉ឺងម៉ាត់ព្រមៗគ្នា ដើម្បីឱ្យប្រជាពលរដ្ឋរស់នៅប្រកបដោយសុខសាន្ត និងមានទំនុកចិត្តលើការដឹកនាំរបស់ រាជរដ្ឋាភិបាលកម្ពុជាយើង ក្រោមការដឹកនាំប្រកបដោយគតិបណ្ឌិតរបស់សម្តេច មហាបវរធិបតី ហ៊ុន ម៉ាណែត ជានាយករដ្ឋមន្ត្រីរបស់យើង៕

ដោយ ឆាយ ម៉ុត