AKP ភ្នំពេញ ថ្ងៃទី០៤ ខែមិថុនា ឆ្នាំ២០២៥

សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា និងជាអនុប្រធានកិត្តិយសទីមួយនៃក្រុមប្រឹក្សាជាតិកម្ពុជាដើម្បីស្ត្រី បានផ្ដល់អនុសាសន៍ឱ្យក្រុមប្រឹក្សាជាតិកម្ពុជាដើម្បីស្ត្រី ស្នើទៅកាន់នាយករដ្ឋមន្ត្រី កំណត់នូវកូតាជាអភិបាលរងជាស្រ្តីយ៉ាងតិច២រូប នៅថ្នាក់រាជធានី ខេត្ត ក្រុង ស្រុក ខណ្ឌ ដែលពីមុនមកកូតាជាអភិបាលរងជាស្ត្រីមានចំនួន១រូបនោះ។

នេះបើតាមការឱ្យដឹងរបស់ឯកឧត្ដម ជា ធីរិទ្ធ អ្នកនាំពាក្យព្រឹទ្ធសភា បន្ទាប់ពីសម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា និងជាអនុប្រធានកិត្តិយសទីមួយនៃក្រុមប្រឹក្សាជាតិកម្ពុជាដើម្បីស្ត្រី បានអនុញ្ញាតឱ្យប្រតិភូក្រុមប្រឹក្សាជាតិកម្ពុជាដើម្បីស្ត្រី ដឹកនាំដោយលោកជំទាវកិត្តិបណ្ឌិត អ៊ឹង កន្ថាផាវី រដ្ឋមន្ត្រីក្រសួងកិច្ចការនារី និងជាប្រធានក្រុមប្រឹក្សាជាតិកម្ពុជាដើម្បីស្ត្រី ចូលជួបសម្ដែងការគួរសម និងទទួលអនុសាសន៍ នាព្រឹកថ្ងៃទី០៤ ខែមិថុនា ឆ្នាំ២០២៥ នៅវិមាន៧មករា។

ក្នុងជំនួបនោះ សម្ដេចតេជោអនុប្រធានកិត្តិយសទីមួយនៃក្រុមប្រឹក្សាជាតិកម្ពុជាដើម្បីស្ត្រី បានផ្ដល់នូវសារសំខាន់ៗចំនួន ៤ ដល់ជនរួមជាតិ គឺ ទី១. សម្ដេចតេជោបានផ្ដល់អនុសាសន៍ឱ្យក្រុមប្រឹក្សាជាតិកម្ពុជាដើម្បីស្ត្រី ស្នើទៅកាន់នាយករដ្ឋមន្ត្រីឱ្យកំណត់នូវកូតា អភិបាលរង នៃរាជធានី ខេត្ត ក្រុង ស្រុក ខណ្ឌ ដែលនៅក្នុង រាជធានី ខេត្ត ក្រុង ស្រុក ខណ្ឌ នីមួយៗមានអភិបាលរងជាស្រ្តីយ៉ាងតិច២រូប ដែលពីមុនមកកូតាជាអភិបាលរងជាស្ត្រីមានចំនួន១រូប។ ២. សម្ដេចតេជោ បានលើកឡើងដោយផ្ដល់អនុសាសន៍ឱ្យក្រុមប្រឹក្សាជាតិកម្ពុជាដើម្បីស្ត្រី ជួបប្រជុំ ឬជជែក ឬពិភាក្សាស្នើសុំយោបល់បន្ថែមពីនាយករដ្ឋមន្ត្រី ជាពិសេសចំពោះរដ្ឋមន្ត្រីក្រសួងមុខងារសាធារណៈ ចំពោះការប្រឡងជ្រើសរើសមន្ត្រីរាជការចូលបម្រើការងារតាមស្ថាប័ន ក្រសួងនានា ដោយសម្ដេចបានផ្ដល់អនុសាសន៍ គួរតែមានការកំណត់កូតា ផ្ដល់អាទិភាពសម្រាប់ការជ្រើសរើសស្ត្រីយ៉ាងតិចបំផុតចំនួន៥០% ក្នុងចំណោមកូតា១០០%។ សម្ដេចតេជោលើកឡើងថា នេះគឺជាគោលដៅ ដើម្បីឱ្យស្ត្រីបានចូលរួមចំណែកបម្រើប្រទេសជាតិឱ្យកាន់តែមានចំនួនកើនឡើង។ ៣. សម្ដេចតេជោបានផ្ដល់អនុសាសន៍ ក្នុងគោលដៅពង្រីក និងពង្រឹង នូវអនុត្តរភាពរបស់ស្ត្រី ពោលគឺការធ្វើឱ្យស្ត្រីមានភាពខ្លាំង ជាអំណាចនៅគ្រប់វិស័យ ដោយចាប់ផ្ដើមពីការធ្វើអនុត្តរភាពស្ត្រីនៅក្នុងវិស័យសេដ្ឋកិច្ច។ ក្នុងន័យនេះសម្ដេចតេជោបានវាយតម្លៃថា យ៉ាងយូរពី២០ ទៅ៣០ឆ្នាំទៀត នៅក្នុងប្រទេសកម្ពុជា ឥទ្ធិពលរបស់ស្ត្រី ឬអនុត្តរភាពរបស់ស្ត្រី នឹងចូលរួមកាន់តែខ្លាំងឡើងនៅក្នុងការអភិវឌ្ឍប្រទសជាតិ មិនតិចជាងបុរសនោះទេ តាមរយៈការពង្រឹងនូវអនុត្តរភាពអំណចរបស់ស្ត្រីនៅក្នុងវិស័យសេដ្ឋកិច្ចនេះ។ ៤. សម្ដេចតេជោបាបង្ហាញនូវគំនិត នៃការរៀបចំបង្កើតនៅអន្តេវាសិកដ្ឋានសម្រាប់និស្សិតជាស្ត្រី ដែលបានមករស់នៅរាជធានីភ្នំពេញដើម្បីបន្តការសិក្សា។

ជាមួយគ្នានេះ សម្ដេចតេជោ បានថ្លែងបញ្ជាក់ថា សម្ដេចនឹងរៀបចំបង្កើតអន្តេវាសិកដ្ឋានមួយ លើផ្ទៃដីទំហំ២ហិកតា ដែលមានតម្លៃប្រមាណជា១០លានដុល្លារអាម៉េរិក សម្រាប់ការស្នាក់នៅរបស់និស្សិតជាស្ត្រី បន្តការសិក្សា។ សម្ដេចតេជោបានបញ្ជាក់ទៀតថា ថវិកាការកសាង អន្តេវាសិកដ្ឋាន សម្រាប់ការស្នាក់នៅរបស់និស្សិតជាស្ត្រីនេះ វាមិនពាក់ព័ន្ធជាមួយថវិការាជរដ្ឋាភិបាលនោះទេ។ ជាងនេះទៀត ក្រោយពីការកសាងអន្តេវាសិកដ្ឋាននេះបានរួចរាល់ សម្ដេចនឹងប្រគល់ទៅឱ្យក្រសួងកិច្ចការនារី ជាអ្នកគ្រប់គ្រង និងមើលការខុសត្រូវ សម្រាប់ទទួលយកនិស្សិតជាស្ត្រីដែលមកបន្តការសិក្សានៅរាជធានីភ្នំពេញ។

ប្រតិភូក្រុមប្រឹក្សាជាតិកម្ពុជាដើម្បីស្ត្រី ដឹកនាំដោយលោកជំទាវកិត្តិបណ្ឌិត អ៊ឹង កន្ថាផាវី រដ្ឋមន្ត្រីក្រសួងកិច្ចការនារី និងជាប្រធានក្រុមប្រឹក្សាជាតិកម្ពុជាដើម្បីស្ត្រី បានសម្ដែងនូវការអរគុណយ៉ាងក្រៃលែងចំពោះសម្ដេចតេជោ ចំពោះការគិតគូរដ៏ធំធេងសម្រាប់ស្ត្រីនៅក្នុងព្រះរាជាណាចក្រកម្ពុជា៕

ដោយ៖ ជឹម ណារី