AKP កំពង់ធំ ថ្ងៃទី០៤ ខែមិថុនា ឆ្នាំ២០២៥--

ពាក្យស្លោកសំខាន់ៗចំនួន៣ ដែលដើរតួនាទីយ៉ាងសំខាន់ក្នុងការជំរុញការអភិវឌ្ឍជារួមនៃវិស័យទេសចរណ៍របស់កម្ពុជាគឺ៖ ទី១. “ទេសចរណ៍ដើម្បីទាំងអស់គ្នាទាំងអស់គ្នាដើម្បីទេសចរណ៍” ទី២. "ទេសចរណ៍រីកលូតលាស់ក្នុងសន្តិភាព" និងទី៣. "ម្នាក់ៗជាអ្នកផ្សព្វផ្សាយទេសចរណ៍កម្ពុជាម្នាក់"។ នេះជាប្រសាសន៍លើកឡើងរបស់លោកជំទាវ ហ៊ុន ដានី រដ្ឋលេខាធិការក្រសួងទេសចរណ៍ និងជាប្រធានក្រុមការងារអភិវឌ្ឍន៍សេដ្ឋកិច្ចក្រៅប្រព័ន្ធក្នុងវិស័យទេសចរណ៍ ក្នុងសិក្ខាសាលាស្ដីពី “ការផ្សព្វផ្សាយគោលនយោបាយ របស់រាជរដ្ឋាភិបាលក្នុងការជំរុញ និង លើកទឹកចិត្តដល់អ្នកសេដ្ឋកិច្ចក្រៅប្រព័ន្ធក្នុងវិស័យទេសចរណ៍ឱ្យចុះឈ្មោះចូលក្នុងថ្នាលឌីជីថល” ក្នុងខេត្តកំពង់ធំ នៅសាលប្រជុំសាលាខេត្តកំពង់ធំ កាលពីរសៀលថ្ងៃទី០៣ ខែមិថុនា ឆ្នាំ២០២៥ ដោយមានការអញ្ជើញចូលរួមពីលោក ងួន រាសី អភិបាលរងខេត្ត តំណាងឯកឧត្តម នួន ផារ័ត្ន អភិបាលខេត្តកំពង់ធំ  រដ្ឋបាលក្រុង-ស្រុក មន្ទីរអង្គភាពពាក់ព័ន្ធនិងបងប្អូនប្រជាពលរដ្ឋជាច្រើននាក់។

លោកជំទាវ ហ៊ុន ដានី បានមានប្រសាសន៍ថា ការចុះបញ្ជីថ្នាលឌីជីលសម្រាប់អ្នកសេដ្ឋកិច្ចក្រៅប្រព័ន្ធនេះ មានគោលបំណងសំខាន់ គឺដើម្បីជួយ និងមិនមែនដាក់បន្ទុកបន្ថែមដល់អ្នកសេដ្ឋកិច្ចក្រៅប្រព័ន្ធ ដោយ ផ្អែក លើគោលការណ៍ ស្ម័គ្រចិត្ត និងមិនមានការបង្ខិតបង្ខំនោះឡើយ។ នេះជាយន្តការដែលរាជរដ្ឋាភិបាលរៀបចំឡើងដើម្បីបង្កើតនូវទំនាក់ទំនងរវាងអ្នកសេដ្ឋកិច្ចក្រៅប្រព័ន្ធ ជាមួយនឹងរាជរដ្ឋាភិបាល ក្នុងការគិតគូរ និងជួយ ដល់បងប្អូនសេដ្ឋកិច្ចក្រៅប្រព័ន្ធ ឱ្យកាន់តែមានប្រសិទ្ធភាព និងរហ័សទាន់ពេល។

លោក ងួន រាសី បានមានប្រសាសន៍ថា ការផ្សព្វផ្សាយគោលនយោបាយរាជរដ្ឋាភិបាលក្នុងការជំរុញ និងលើកទឹកចិត្តដល់អ្នកសេដ្ឋកិច្ចក្រៅប្រព័ន្ធក្នុងវិស័យ ទេសចរណ៍ឱ្យចុះឈ្មោះក្នុងថ្នាលឌីជីថល គឺជាផ្នែកមួយនៃផែនការរបស់រាជរដ្ឋាភិបាល ក្នុងការជំរុញឱ្យគោលដៅនៃយុទ្ធសាស្ត្រជាតិស្ដីពីការអភិវឌ្ឍសេដ្ឋកិច្ចក្រៅប្រព័ន្ធទទួលបានជោគជ័យ ដែលជាចំណែកយ៉ាងសំខាន់ក្នុងការរុញច្រានកម្ពុជាឱ្យសម្រេចបាននូវចក្ខុវិស័យរបស់ខ្លួនក្លាយជាប្រទេសមានចំណូលកម្រិតខ្ពស់នៅឆ្នាំ២០៥០។

ទន្ទឹមនឹងនេះ លោក សេង អាន ប្រធានមន្ទីរទេសចរណ៍ខេត្តកំពង់ធំ បានរាយការណ៍នូវស្ថានភាពទេសចរណ៍ក្នុងខេត្តកំពង់ធំ និងបានលើកឡើងពីអាជីវកម្ម សេវាកម្មទេសចរណ៍ដែលកំពុងបម្រើជូនទេសចរ និងបងប្អូនប្រជាពលរដ្ឋមកកម្សាន្ត និងស្នាក់នៅក្នុងខេត្តកំពង់ធំ បានផ្តល់ឱកាសការងារជូនប្រជាពលរដ្ឋដោយផ្ទាល់ ១០៣៣នាក់ និងដោយ ប្រយោលជាច្រើនផ្សេងទៀត៕

ដោយ ស៊ុម វណ្ណា