AKP បន្ទាយមានជ័យ ថ្ងៃទី០៤ ខែមិថុនា ឆ្នាំ២០២៥--

ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តបន្ទាយមានជ័យ នៅថ្ងៃទី០៤ ខែមិថុនា ឆ្នាំ២០២៥ បានដឹកនាំគណៈប្រតិភូក្រសួង និងអាជ្ញាធរខេត្ត ចុះសួរសុខទុក្ខកងកម្លាំងឈរជើងតាមខ្សែបន្ទាត់ព្រំដែនកម្ពុជា-ថៃ នៅបញ្ជាការដ្ឋានកងពលតូចលេខ ៥១ ស្រុកព្រះនេត្រព្រះ។ ដំណើរទស្សនកិច្ចនេះធ្វើឡើងភ្លាមៗបន្ទាប់ពីសមាជរដ្ឋសភា-ព្រឹទ្ធសភាបានបិទបញ្ចប់ដោយជោគជ័យ។

ក្នុងឱកាសនោះ ឯកឧត្តម ឌិត ទីណា បានគូសបញ្ជាក់ពីការយកចិត្តទុកដាក់ខ្ពស់របស់រាជរដ្ឋាភិបាលចំពោះការការពារអធិបតេយ្យភាព និងបូរណភាពទឹកដីកម្ពុជា និងបានលើកឡើងថា ការសម្រេចដាក់ពាក្យបណ្តឹងទៅតុលាការយុត្តិធម៌អន្តរជាតិ (ICJ) លើបញ្ហាជម្លោះព្រំដែនកម្ពុជា-ថៃ គឺបានទទួលការគាំទ្រទាំងស្រុងពីសមាជរដ្ឋសភា-ព្រឹទ្ធសភា។

ឯកឧត្តមបានមានប្រសាសន៍ថា៖ «យន្តការសម្ព័ន្ធមេត្រីភាព និងការចុះសួរសុខទុក្ខ គឺជាការគិតគូរយកចិត្តទុកដាក់ពីសំណាក់រាជរដ្ឋាភិបាល និងសប្បុរសជនទាំងអស់ ដែលតែងតែបន្តកៀរគរបន្ថែមជានិច្ចសម្រាប់គាំទ្រទាហានជួរមុខ។»

ឯកឧត្តមក៏បានពាំនាំនូវការផ្តាំផ្ញើសួរសុខទុក្ខ និងការនឹករលឹកពីសំណាក់សម្តេចអគ្គមហាសេនាបតីតេជោ ហ៊ុន សែនប្រធានព្រឹទ្ធសភា និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី ជូនចំពោះកងទ័ព និងក្រុមគ្រួសារកងទ័ពឈរជើងតាមបណ្តោយព្រំដែន និងបានកោតសរសើរយ៉ាងស្មោះស្ម័គ្រចំពោះកិច្ចខិតខំប្រឹងប្រែង និងការលះបង់របស់កងទ័ព ក្នុងការការពារជាតិប្រកបដោយឆន្ទៈមោះមុត និងស្មារតីស្នេហាជាតិ ជាពិសេសនៅតាមខ្សែបន្ទាត់ព្រំដែន។

ជាការឆ្លើយតប ឧត្តមសេនីយ៍ត្រី សឹង្ហ ទុំ មេបញ្ជាការកងពលតូចថ្មើរជើងលេខ ៥១ បានថ្លែងអំណរគុណយ៉ាងជ្រាលជ្រៅចំពោះប្រមុខរាជរដ្ឋាភិបាលកម្ពុជា ដែលតែងតែគិតគូរសុខទុក្ខ និងឧបត្ថម្ភគាំទ្រជានិច្ច និងបានបញ្ជាក់ថា «វត្តមានឯកឧត្តមរដ្ឋមន្ត្រីដែលបានចុះមកសំណេះសំណាលផ្ទាល់លើកទឹកចិត្តនេះ គឺជាកម្លាំងជំរុញដ៏ធំធេង។ យើងខ្ញុំសូមប្តេជ្ញាបន្តការពារបូរណភាពទឹកដី អធិបតេយ្យភាពជាតិ ភាពសុខសាន្តរបស់ប្រជាជនកម្ពុជា និងរក្សាសន្តិភាពជាតិឱ្យបានស្ថិតស្ថេរ។»

ជាមួយគ្នានោះដែរ ឯកឧត្តមរដ្ឋមន្ត្រីបាននាំយកនូវអំណោយជាថវិកា ព្រមទាំងស្បៀងអង្ករ គ្រឿងឧបភោគ បរិភោគមួយចំនួនទៀត ចែកជូនកងកម្លាំង។ អំណោយទាំងនេះគឺជាការអរគុណចំពោះការលះបង់កម្លាំងកាយ និងញើសឈាម ដើម្បីការពារជាតិមាតុភូមិ និងជាការលើកទឹកចិត្តឱ្យបន្តនូវកិច្ចការងារដ៏សំខាន់នេះតទៅមុខទៀត ជាខឿនការពារជាតិសម្រាប់កូនចៅជំនាន់ក្រោយ៕

ដោយ ឈុន សារ៉ាត