AKP ភ្នំពេញ ថ្ងៃទី០៤ ខែមិថុនា ឆ្នាំ២០២៥--

អ្នកប្រដាល់គុនខ្មែរ ពេជ្រ សម្បត្តិ ដែលឈ្នះខ្សែក្រវាត់ USEACA ដែលជាខ្សែក្រវាត់១ ក្នុងចំណោមខ្សែក្រវាត់ចំនួន៣របស់កម្ពុជាបានវិលត្រឡប់មកដល់មាតុប្រទេសវិញហើយ នៅថ្ងៃទី០៤ ខែមិថុនា ឆ្នាំ២០២៥ បន្ទាប់ពីដណ្តើមបានខ្សែក្រវាត់ពីក្នុងព្រឹត្តិការណ៍គ្រុឌគុនខ្មែរអន្តរជាតិ លើកទី២ នៅទីក្រុងតាកូម៉ា រដ្ឋវ៉ាស៊ីនតោន សហរដ្ឋអាមេរិក ដោយក្នុងចំណោមកីឡាករ កីឡាការិនីកម្ពុជា ៥នាក់ គឺមានកីឡាករកម្ពុជា ៣នាក់ឈ្នះខ្សែក្រវាត់។

ដំណើរមកដល់របស់គ្រូបង្វឹក កីឡាករ កីឡាការិនី១ក្រុម នៅអាកាសយានដ្ឋានអន្តរជាតិភ្នំពេញ នៅថ្ងៃទី០៤ ខែមិថុនា ឆ្នាំ២០២៥នេះទទួលបានការស្វាគមន៍យ៉ាងកក់ក្តៅពីឯកឧត្តម ម៉ិល កាដូ ទីប្រឹក្សាក្រសួងអប់រំ យុវជន និងកីឡា និងជាអនុប្រធានសហព័ន្ធកីឡាប្រដាល់គុនខ្មែរ និងលោក ទុយ ប៊ុនហឿន អនុប្រធានសហព័ន្ធកីឡាប្រដាល់គុនខ្មែរ។

ក្រុមកីឡាប្រដាល់គុនខ្មែរ ដែលមកដល់មុនគេ ដឹកនាំដោយលោកគ្រូ ពេជ្រ សុផាន់ កីឡាករ ពេជ្រ សម្បត្តិ ម្ចាស់ខ្សែក្រវាត់ និងកីឡាការិនី អេ យ៉ានុត ដែលបានប្រកួតចាញ់ការប្រកួតដោយពិន្ទុ។ ចំពោះកីឡាករ ពេជ្រ សម្បត្តិ ដណ្តើមបានខ្សែក្រវាត់ USEACA បន្ទាប់ពីបានប្រកួតឈ្នះដោយពិន្ទុជាមួយកីឡាករម្ចាស់ផ្ទះអាមេរិក Malcolm Hill ក្នុងប្រភេទទម្ងន់ ៦០គ.ក្រ។ ចំពោះកីឡាករ ឡៅ ចន្ទ្រា ឈ្នះខ្សែក្រវាត់គុនខ្មែរ (ខ្សែក្រវាត់ប្រដាល់គុនខ្មែរដាក់ឱ្យគេដណ្តើម) ជាមួយម្ចាស់ផ្ទះអាមេរិកដែរ គឺកីឡាករ Juan Jackson ក្នុងប្រភេទម្ងន់ ៧៥គ.ក្រ។ រីឯ កីឡាករ លន បញ្ញា ក៏ឈ្នះខ្សែក្រវាត់ USEACA ផងដែរ ក្រោយឈ្នះកីឡាករម្ចាស់ផ្ទះអាមេរិក Jose Aquino ក្នុងប្រភេទទម្ងន់ ៦៧គ.ក្រ។

គួរបញ្ជាក់ថា ព្រឹត្តិការណ៍ប្រកួតគ្រុឌគុនខ្មែរអន្តរជាតិ នៅទឹកដីសហរដ្ឋអាមេរិកនេះ អ្នកប្រដាល់គុនខ្មែរមានចំនួន៥នាក់ ក្នុងនោះកីឡាករ៣នាក់ដណ្តើមបានខ្សែក្រវាត់។ រីឯកីឡាការិនី អេ យ៉ានុត និងកីឡាករ ឡៅ ចិត្រា បានចាញ់ការប្រកួតដោយពិន្ទុ។ ចំពោះការវិលត្រឡប់មកវិញរបស់ប្រតិភូកម្ពុជាទាំងអស់នឹងត្រូវចេញដំណើរចុងក្រោយគេ នាថ្ងៃទី០៦ ខែមិថុនា ឆ្នាំ២០២៥ ក្រោមការដឹកនាំរបស់ឯកឧត្តម ខូវ ឆាយ ប្រធានសហព័ន្ធកីឡាប្រដាល់គុនខ្មែរបានដឹកនាំកីឡាករ កីឡាការិនីកម្ពុជាទៅប្រកួត-ផ្សព្វផ្សាយ នៅទឹកដីសហរដ្ឋអាមេរិក លើកទី២នេះ ដោយទទួលបានផលចំណេញច្រើន ក្នុងការលើកកម្ពស់ការអភិវឌ្ឍជំនាញកីឡាអត្តសញ្ញាណជាតិខ្មែរមួយនេះ៕

ដោយ ហេង ណាលីន