AKP កំពង់ធំ ថ្ងៃទី០៤ ខែមិថុនា ឆ្នាំ២០២៥-- លោក ងួន រាសី អភិបាលរងខេត្តកំពង់ធំលោក ហេង ភារម្យ ប្រធានសាខាការពារអ្នកប្រើប្រាស់កិច្ចការការប្រកួតប្រជែង និងបង្រ្កាបការក្លែងបន្លំ(ក.ប.ប) ខេត្តកំពង់ធំ រួមជាមួយរថយន្តមន្ទីរពិសោធន៍ចល័តផ្នែកម្ហូបអាហារ របស់អគ្គនាយកដ្ឋាន(ក.ប.ប) បានសហការជាមួយមន្ទីរពាណិជ្ជកម្មរដ្ឋបាលក្រុង រដ្ឋបាលសង្កាត់ ប៉ូលីសមូលដ្ឋាន និងគណៈគ្រប់គ្រងផ្សារបានចុះត្រួតពិនិត្យសុវត្ថិភាពម្ហូបអាហារនៅផ្សារកំពង់ធំ និងផ្សារស្ទឹងសែន ក្រុងស្ទឹងសែន ខេត្តកំពង់ធំកាលពីថ្ងៃទី០៣ ខែមិថុនា ឆ្នាំ២០២៥។

លោក ហេង ភារម្យ បានលើកឡើងថាការចុះត្រួតពិនិត្យសុវត្ថិភាពម្ហូបអាហារតាមបណ្តាទីផ្សារបានចំនួន០២ទីតាំងគឺ៖១.ផ្សារកំពង់ធំពិនិត្យបានចំនួន២៦គំរូ(បូរ៉ាក់)ចំនួន១០គំរូ (សូដ្យូមអ៊ីដ្រូស៊ុលហ្វីត)ចំនួន០៦គំរូ(សាលីស៊ីលិច អាស៊ីត)ចំនួន០១គំរូ(ហ្វ័រម៉ាលីន)ចំនួន០៤គំរូ (សំណល់ថ្នាំកសិកម្ម)និងចំនួន០៥គំរូដែលមាននៅលើបន្លែ ផ្លែឈើ ត្រី សាច់ និងនំចំណីផ្សេងៗ។ ២.ផ្សារស្ទឹងសែនពិនិត្យបានចំនួន២៣គំរូ(បូរ៉ាក់) ចំនួន០៩គំរូ (សូដ្យូមអ៊ីដ្រូសុលហ្វីត)ចំនួន០៦គំរូ (សាលីស៊ីលិចអាស៊ីត)ចំនួន០៤គំរូ(ហ្វ័រម៉ាលីន)ចំនួន០១គំរូ(សំណល់ថ្នាំកសិកម្ម)ចំនួន០៣គំរូ សរុបចំនួន៤៩គំរូ។ ជាលទ្ធផលបានរកឃេីញសំណាកគំរូពពុះសណ្តែកចំនួន០១គំរូ មានសារធាតុគីមីហាមឃាត់បូរ៉ាក់( borax) បានដកហូតនិងធ្វេីការណែនាំបញ្ឈប់ការតាំងលក់ផលិតផលដែលមានសារធាតុគីមីហាមឃាត់។

លោក ងួន រាសី បានលើកឡើងថា ប្រជាពលរដ្ឋដែលលក់បន្លែផ្លែឈើ ត្រីសាច់នំចំណីផ្សេងៗជាច្រើន ពុំបានគិតពីអនាម័យនិងពុំបានពិនិត្យមើលទៅលើការកំណត់ថ្ងៃខែឆ្នាំនិងការប្រើប្រាស់ថាសារធាតុគីមីទាំងអស់នោះហើយដែលបងប្អូនប្រជាពលរដ្ឋមកទិញយកទៅទទួលទាននឹងអាចធ្វើឱ្យប៉ះពាល់ដល់សុខភាពនិងបណ្ដាលឱ្យមានជំងឺនៅក្នុងខ្លួនទៀតផង។ ការនាំចូលរបស់របរទាំងអស់នេះហើយ យកមកលក់នៅលើទីផ្សារ មិនបានពិនិត្យនឹងយកចិត្តទុកដាក់របស់របរមួយចំនួនគឺប្រើប្រាស់ទៅដោយសារធាតុគីមីបានចរាចរណ៍នៅលើទីផ្សារដោយសេរី។ សូមបងប្អូនប្រជាពលរដ្ឋអ្នកលក់ទាំងអស់ សូមមេត្តាចូលរួមសហការគ្នាការពារការនាំចូលសម្ភារប្រើប្រាស់និងផលិតផលផ្សេងៗប្រសិនបើមានសកម្មភាពអ្វីមួយមិនល្អ សង្ស័យរបស់នោះខូចគុណភាព កុំដាក់លក់នៅលើទីផ្សារឱ្យសោះ វានឹងប៉ះពាល់ទៅដល់សុខភាពមនុស្សដែលយកទៅបរិភោគនិងប្រើប្រាស់ផងដែរ។

សូមបញ្ជាក់ថាការចុះពិនិត្យសុវត្ថិភាពម្ហូបអាហារតាមបណ្តាទីផ្សារមានដូចជាផ្សារកំពង់ធំនិងផ្សារស្ទឹងសែនក្នុងភូមិសាស្រ្តខេត្តកំពង់ធំរួមមាន÷ តូបលក់បន្លែ ផ្លែឈើ សាច់គោសាច់ជ្រូក ចាប់ហួយ ម៉ាត នំកញ្ចប់គ្រឿងកំប៉ុង ប្រហិត ផ្អក ប្រហុក ត្រីប្រៃ ជ្រក់ផ្សេងៗ គ្រឿងសមុទ្រ និងចំណីអាហារបង្អែមជាដើម៕

ដោយ ស៊ុម វណ្ណា