AKP កំពង់ធំ ថ្ងៃទី០៤ ខែមិថុនា ឆ្នាំ២០២៥–- ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ បានដាក់បទបញ្ជាដល់នាយទាហាន នាយទាហានរង និងពលទាហាននៃបញ្ជាការដ្ឋានតំបន់ប្រតិបត្តិការសឹករងកំពង់ធំ ត្រូវត្រៀមខ្លួនរួចជាស្រេចដើម្បីអនុវត្តតាមបទបញ្ជារបស់ថ្នាក់ដឹកនាំគ្រប់លំដាប់ថ្នាក់នៃកងយោពលខេមរភូមិន្ទ និងឯកឧត្តមប្រធានគណៈបញ្ជាការឯកភាពរដ្ឋបាលខេត្តកំពង់ធំ ក្នុងភារកិច្ចបម្រើជាតិនិងប្រជាជនកម្ពុជា។ ការដាក់បទបញ្ជានេះក្នុងកិច្ចប្រជុំត្រួតពិនិត្យកងកម្លាំងនៅទីបញ្ជាការតំបន់ប្រតិបត្តិការសឹករងកំពង់ធំ កាលពីថ្ងៃទី០៣ ខែមិថុនា ឆ្នាំ២០២៥។

ក្នុងឱកាសនោះ ឧត្តមសេនីយ៍ទោ សោម ស៊ុន បានផ្សព្វផ្សាយសភាពការណ៍ថ្មីៗនៅតាមបណ្ដោយព្រំដែនកម្ពុជា-ថៃ និងបានផ្សព្វផ្សាយប្រសាសន៍ដ៏ខ្ពង់ខ្ពស់របស់សម្ដេចមហាបវរធិបតី ហ៊ុន ម៉ាណែតនាយករដ្ឋមន្ត្រីនៃព្រះរាជាណាចក្រកម្ពុជា ក្នុងចំណាត់ការតាមផ្លូវច្បាប់ទៅកាន់តុលាការយុត្តិធម៌អន្តរជាតិ (ICJ) ស្ដីពីតំបន់ប្រាសាទតាមាន់ធំ ប្រាសាទតាមាន់តូច ប្រាសាទតាក្របី និងតំបន់មុំបី ដែលភាគីថៃបានរំលោភបំពាន រហូតដល់មានការផ្ទុះអាវុធនៅតំបន់មុំបីនៅព្រឹកថ្ងៃទី២៨ ខែឧសភា ឆ្នាំ២០២៥កន្លងទៅថ្មីៗនេះ បណ្ដាលឱ្យកងទ័ពកម្ពុជាមួយរូបបានពលីជីវិតក្នុងភារកិច្ចការពារបូរណភាពទឹកដីនៃយើង។

ឧត្តមសេនីយ៍ទោ សោម ស៊ុន បានដាក់បទបញ្ជាដល់កងកម្លាំងទាំងអស់ត្រូវត្រៀមបម្រុងកម្លាំងមធ្យោបាយគ្រឿងបំពាក់គ្រប់គ្រាន់ដើម្បីអនុវត្តតាមបទបញ្ជាគឺ÷ ទី១. ក្នុងភារកិច្ចការពារបូរណភាពទឹកដី ទី២.ជួយសង្គ្រោះប្រជាពលរដ្ឋ ដែលជួបគ្រោះមហន្តរាយផ្សេងៗក្នុងរដូវវស្សានេះ និងទី៣.បន្តចូលរួមបង្ក្រាបបទល្មើសធនធានធម្មជាតិមានបទល្មើសព្រៃឈើ និងបទល្មើសនេសាទឱ្យទទួលបានជោគជ័យបន្ថែមទៀត។

នាយទាហាន នាយទាហានរង និងពលទាហាននៃបញ្ជាការដ្ឋានតំបន់ប្រតិបត្តិការសឹករងកំពង់ធំ យោធភូមិភាគទី៤ បានប្រកាសគាំទ្រយ៉ាងពេញទំហឹង ចំពោះការសម្រេចចិត្តរបស់ប្រមុខរាជរដ្ឋាភិបាលនៃព្រះរាជាណាចក្រកម្ពុជាក្នុងការចាត់វិធានការផ្លូវច្បាប់ទៅកាន់តុលាការយុត្តិធម៌អន្តរជាតិ(ICJ)ស្ដីពីការរំលោភបំពានបូរណភាពទឹកដីកម្ពុជា នៅតំបន់ប្រាសាទតាមមាន់តូច ប្រាសាទតាមាន់ធំ ប្រាសាទតាក្របី និងតំបន់មុំបី ជាប់ព្រំដែនកម្ពុជា-ថៃនិងវិធានការប្រេីប្រាស់កម្លាំងយោធា ក្នុងការប្រឆាំងសត្រូវឈ្លានពានរំលោភលេីដែនអធិបតេយ្យភាពទឹកដីកម្ពុជាឱ្យពួកវាទទួលបរាជ័យ៕

ដោយ ស៊ុម វណ្ណា (ប្រភព៖ តំបន់សឹករងកំពង់ធំ)