AKP កណ្ដាល ថ្ងៃទី០៤ ខែមិថុនា ឆ្នាំ២០២៥-- រដ្ឋបាលក្រុងតាខ្មៅ ដឹកនាំដោយ លោក ឃឹម សំភារ អភិបាលក្រុងតាខ្មៅ នៅរសៀលថ្ងៃទី០៣ ខែមិថុនា ឆ្នាំ២០២៥ បានចុះពិនិត្យ និងណែនាំទៅដល់ប្រជាពលរដ្ឋសាងសង់រំលោភលើចំណីផ្លូវឱ្យធ្វើការរុះរើឡើងវិញជាបន្ទាន់ លើបណ្ដោយកំណាត់ផ្លូវមហាវិថីស៊ីជិនពីង ឬ ក្រវ៉ាត់ក្រុងទី៣ ក្នុងសង្កាត់សិត្បូ សង្កាត់ស្វាយរលំ សង្កាត់រការខ្ពស់។

ក្នុងឱកាសចុះណែនាំ លោក ឃឹម សំភារ អភិបាលក្រុងតាខ្មៅ បានធ្វើការណែនាំទៅដល់បងប្អូនប្រជាពលរដ្ឋទាំងអស់ដែលរស់នៅក្នុងក្រុងតាខ្មៅ សូមកុំធ្វើការសាងសង់រំលោភលើចំណីផ្លូវ ដែលអាចបង្កឱ្យមានផលប៉ះពាល់ទៅដល់អ្នកធ្វើដំណើរ និងអាចបង្កទៅជាគ្រោះថ្នាក់ចរាចរណ៍ ហើយប្រជាពលរដ្ឋណាដែលសាងសង់រំលោភលើចំណីផ្លូវទាំងប៉ុន្មានត្រូវធ្វើការរុះរើជាបន្ទាន់ និងត្រូវរៀបចំឡើងវិញដើម្បីឱ្យមានសណ្ដាប់ធ្នាប់ និងសោភ័ណភាពល្អ ព្រមទាំងបានចាត់ឱ្យមន្ត្រីជំនាញភូមិបាលចុះពិនិត្យវាស់វែងជាក់ស្ដែង កំណត់បង្គោលព្រំដីរបស់ប្រជាពលរដ្ឋ និងចំណីផ្លូវឱ្យបានត្រឹមត្រូវ ។

ប្រជាពលរដ្ឋមុននឹងសាងសង់សំណង់ត្រូវសុំច្បាប់អនុញ្ញាតជាមុនសិន ដើម្បីកុំឱ្យរំលោភលើចំណីផ្លូវ និងមិនឱ្យបងប្អូនប្រជាពលរដ្ឋសាងសង់រំលោភចំណីផ្លូវបន្តទៀត និងចូលរួមសហការជាមួយអាជ្ញាធរផងដែរ៕

ដោយ ណយ នឿន (ប្រភព៖ រដ្ឋបាលខេត្តកណ្តាល)