AKP ព្រះសីហនុ ថ្ងៃទី០៣ ខែមិថុនា ឆ្នាំ២០២៥-- លោក នេន ចំរើន ប្រធានមន្ទីរកសិកម្ម រុក្ខាប្រមាញ់ និងនេសាទខេត្តព្រះសីហនុ បានដឹកនាំនាយខណ្ឌរដ្ឋបាលជលផលកំពង់សោម លោកនាយផ្នែករដ្ឋបាលជលផលទំនប់រលក នាថ្ងៃអង្គារ ទី០៣ ខែមិថុនា ឆ្នាំ២០២៥ បានអញ្ជើញចុះពិនិត្យទីតាំងវារីវប្បកម្មទឹកសាប និងទឹកប្រៃក្នុងស្រុកស្ទឹងហាវ ខេត្តព្រះសីហនុ ដោយមានការចូលរួមពីរដ្ឋបាលស្រុកស្ទឹងហាវ ការិយាល័យប្រជាពលរដ្ឋស្រុកស្ទឹងហាវ មន្រ្តីអង្គភាពច្រកចេញចូលតែមួយរដ្ឋបាលខេត្ត អាជ្ញាធរមូលដ្ឋាន និងវារីវប្បករនៅក្នុងស្រុកស្ទឹងហាវ។

ក្នុងឱកាសដឹកនាំមន្ត្រីបច្ចេកទេសចុះពិនិត្យទីតាំងវារីវប្បកម្មចំនួន៣ទីតាំង រួមមាន វារីវប្បកម្មចិញ្ចឹមបង្គា នៅឃុំកំពេញ វារីវប្បកម្មចិញ្ចឹមត្រីឆ្ពង់ នៅឃុំអូរត្រេះ និងវារីវប្បកម្មចិញ្ចឹមត្រីឆ្តោរ នៅឃុំទំនប់រលក ស្រុកស្ទឹងហាវ ខេត្តព្រះសីហនុ។

ទន្ទឹមនោះ លោកប្រធានមន្ទីរក៏បានធ្វើការណែនាំដល់វារីវប្បករទាំងអស់ដែលជាម្ចាស់វារីវប្បកម្ម ត្រូវយកចិត្តទុកដាក់ថែទាំ និងពិនិត្យសុខភាពត្រីរបស់ខ្លួន ដើម្បីទទួលបានទិន្នផលល្អលក់ក្នុងទីផ្សារ។ ប្រសិនបើត្រីរបស់បងប្អូនមានបញ្ហា ត្រូវរាយការណ៍មកកាន់មន្ត្រីបច្ចេកទេសនៃមន្ទីរកសិកម្ម រុក្ខាប្រមាញ់ និងនេសាទ ដើម្បីយើងមានវិធានការចុះអន្តរាគមន៍បានទាន់ពេលវេលា ជួយដល់បងប្អូនវារីវប្បករ ហើយការចិញ្ចឹមត្រីបែបវារីវប្បកម្មនេះត្រូវបានយកចិត្តទុកដាក់ពីមន្ទីរកសិកមក្ម ក៏ដូចជាអាជ្ញាធរខេត្ត ព្រោះការចិញ្ចឹមត្រីជួយបង្កើនផលិតផលក្នុងទីផ្សារក្នុងស្រុក កាត់បន្ថយការនាំចូលត្រី ក្តាម បន្លែមកពីប្រទេសជិតខាង។

ម្យ៉ាងទៀត ការធ្វើវារីវប្បកម្មនេះបង្កើនការងារដល់ប្រជាពលរដ្ឋ បង្កើនជីវភាពគ្រួសារក្នុងសហគមន៍កាន់តែល្អប្រសើឡើង។ យើងត្រូវរៀបចំសហគមន៍ចិញ្ចឹមក្តាមត្រីបែបវារីវប្បកម្មនៅក្នុងស្រុកស្ទឹងហាវ និងស្រុកព្រៃនប់ ដែលជាតំបន់មានអំណោយផលល្អផ្នែកវារីវប្បកម្ម៕

ដោយ ងូ សុមុនី