AKP ភ្នំពេញ ថ្ងៃទី៣ ខែមិថុនា ឆ្នាំ២០២៥--

មន្ត្រី អង្គការ CI បានឱ្យដឹងនៅថ្ងៃទី០៣ ខែមិថថុនា ឆ្នាំ២០២៥ថា ចាប់ពីខែមីនា ដល់ខែមិថុនា ឆ្នាំ២០២៥ ក្រុមការងារជីវៈចម្រុះនិងវិទ្យាសាស្ត្រ នៃអង្គការអភិរក្សអន្តរជាតិកម្ពុជា CI សហការជាមួយមន្រ្តីបរិស្ថាន និងសមាជិកសហគមន៍ បានចុះសិក្សាស្រាវជ្រាវពីរបាយសត្វព្រៃ តាមរយៈការប្រមូលសំឡេងរបស់ពួកវានៅតំបន់ជួរភ្នំក្រវាញកណ្តាលដោយប្រើឧបករណ៍ថតសំឡេងស្វ័យប្រវត្តិ។

ប្រមូលសំឡេងនេះដើម្បីអ្វី? ការប្រមូលសំឡេងគឺដើម្បីតាមដានពីរបាយសត្វទោចម្កុដដែលជិតផុតពូជ ដោយមិនរំខានដល់ទីជម្រករបស់វា។ តាមរយៈការកត់ត្រាសំឡេងសត្វទោចនាពេលព្រឹកព្រលឹម អ្នកស្រាវជ្រាវបានប្រមូលទិន្នន័យសំខាន់ៗអំពីវត្តមាន របាយ ទីជម្រក និងឥរិយាបថរបស់សត្វទោចម្កុដ។

ឧបករណ៍ទាំងនេះបានបំពាក់នៅក្នុងព្រៃ រយៈពេលពីមួយទៅពីរសប្តាហ៍ ជាផ្នែកនៃវិធីសាស្រ្តស្រាវជ្រាវបែបបច្ចេកវិទ្យានិងវិទ្យសាស្រ្តដែលមិនមានការរំខាន ជួយអ្នកស្រាវជ្រាវរៀបចំផែនការល្អប្រសើរជាងមុនសម្រាប់ការអភិរក្ស។ នេះជាសកម្មភាពមួយនៃការប្រើប្រាស់បច្ចេកវិទ្យាក្នុងការអភិរក្សដើម្បីរក្សាការពារធនធានធម្មជាតិ ៕

ដោយ៖ ណយ នឿន (ប្រភព៖ C I)