AKP ថ្ងៃទី៣ ខែមិថុនា ឆ្នាំ២០២៥ -- ពិធីចុះកិច្ចព្រមព្រៀង និងសម្ភោធ គម្រោងសហប្រតិបត្តិការឧស្សាហកម្មស្រូវទំនើប ច្រករបៀងមច្ឆា និងអង្ករ ចិន(ក្វាងស៊ី)-កម្ពុជា បានប្រារព្ធឡើងដោយជោគជ័យ នៅភូមិអូតាសែក ឃុំគោកបន្ទាយ ស្រុករលាប្អៀរ ខេត្តកំពង់ឆ្នាំង។ 

គម្រោងនេះគឺជាគម្រោងជំនួយបច្ចេកទេសកសិកម្មដែលតំបន់ស្វយ័តក្វាងស៊ីរបស់ចិនបានអនុវត្តនៅកម្ពុជា ដោយមានគោលបំណងពង្រឹងដំណើរការអភិវឌ្ឍន៍ឧស្សាហកម្មអង្ករទំនើបនៅក្នុងខេត្តផលិតអង្ករសំខាន់ៗជុំវិញបឹងទន្លេសាបរបស់កម្ពុជា តាមរយៈការបង្ហាត់បង្រៀន និងផ្សព្វផ្សាយបច្ចេកទេសអង្ករទំនើប។  
ថ្លែងក្នុងពិធីនាព្រឹកថ្ងៃទី៣ ខែមិថុនា ឆ្នាំ២០២៥លោក ឡាន ហួយ៉ាន់ ប្រធានក្រុមហ៊ុនForword Agriculture Technology international Cooperation បានរៀបរាប់ថា បន្ទាប់ពីគម្រោងចាប់ផ្តើមជាផ្លូវការ នឹងអនុវត្តផែនការការងារ "១-២-៣-៤" នៅខេត្តកំពង់ឆ្នាំង រួមមាន៖១.កសាងតំបន់សហប្រតិបត្តិការឧស្សាហកម្មអង្ករទំនើបដែលមានផ្ទៃដី៧០ហិចតា។ ២. អនុវត្តការសាងសង់២ប្រភេទគឺ តំបន់ ឧស្សាហកម្មអង្ករគំរូ និងការ ពង្រឹងសមត្ថភាព។ ៣. បង្កើតមជ្ឈមណ្ឌលសេវាកម្ម៣គឺមជ្ឈមណ្ឌលថែទាំដំណាំស្រូវ ,មជ្ឈមណ្ឌលសេវាគ្រឿងចក្រកសិកម្ម  និងមជ្ឈមណ្ឌលសម្ងួត និងឃ្លាំងសារពើភ័ណ្ឌ ។ ៤. រៀបចំការបណ្តុះបណ្តាលបច្ចេកទេស៤ប្រភេទគឺ បច្ចេកទេសដាំដុះ ,ការគ្រប់គ្រងដំណាំស្រូវ , ការប្រើប្រាស់គ្រឿងចក្រកសិកម្ម ,បច្ចេកទេសដំណាំអង្ករ-បន្លែ វិលជុំ។ 

តាមរយៈផែនការនេះ នឹងអនុវត្តប្រើប្រាស់ចំណុចខ្លាំងរបស់បច្ចេកទេសអង្កររបស់ប្រទេសចិន លើកកម្ពស់ខ្សែសង្វាក់ផលិតកម្មអង្ករទំនើបនៅកម្ពុជា ជំរុញសន្តិសុខស្បៀង បង្កើនប្រសិទ្ធភាពកសិកម្ម និងចំណូលកសិករ ផ្តល់គំរូសម្រាប់ការអភិវឌ្ឍ "ច្រករបៀងមច្ជានិងអង្ករ" ជុំវិញខេត្តបឹងទន្លេសាប បង្កើតគំរូថ្មីនៃកិច្ចសហប្រតិបត្តិការសន្តិសុខស្បៀងក្នុងគម្រោង "ខ្សែក្រវ៉ាត់មួយ ផ្លូវមួយ" និងបើកឱកាសថ្មីៗដល់កិច្ចសហប្រតិបត្តិការកសិកម្មចិន-កម្ពុជា។  

លោក Somany Prum អគ្គនាយកដ្ឋានសហប្រតិបត្តិការអន្តរជាតិក្រសួងកសិកម្ម រុក្ខាប្រមាញ់និងនេសាទ លោក Ngin Hun ប្រធានមន្ទីរកសិកម្ម រុក្ខាប្រមាញ់និងនេសាទខេត្តកំពុងឆ្នាំង លោក Hang kimsreang នាយកសាលា សីហមុនី ព្រមទាំងលោក Wang hui wu នាយកមជ្ឈមណ្ឌលគ្រប់គ្រងគម្រោងកសិកម្មវិនិយោគក្រៅប្រទេស ក្វាងស៊ី លោក Lu Hanxuan ប្រធាននាយកដ្ឋានគ្រប់គ្រងគម្រោងមជ្ឈមណ្ឌលកសិកម្មជនបទក្វាងស៊ី លោក Jiang Bo អ្នកស្រាវជ្រាវថ្នាក់ទី៤នាយកដ្ឋានសហប្រតិបត្តិការក្រៅប្រទេសក្រសួងកសិកម្មក្វាងស៊ី អ្នកជំនាញគម្រោង តំណាងសហព័ន្ធសហគ្រាសក្វាងស៊ីនៅកម្ពុជា និងតំណាងភូមិឃុំគោកបន្ទាយ ស្រុករលាប្អៀរ ខេត្តកំពង់ឆ្នាំង បានចូលរួមជាសាក្សីក្នុងពិធីចុះហត្ថលេខា និងចាប់ផ្តើមគម្រោងនេះផងដែរ។  
បន្ទាប់ពីពិធីចុះហត្ថលេខា វគ្គបណ្តុះបណ្តាលបច្ចេកទេសដាំដុះស្រូវដំណាក់កាលទី១នៃគម្រោង "មច្ជានិងអង្ករ" បានចាប់ផ្តើមភ្លាមៗ ដោយមានលោក សៀ ជីហ្គាន អ្នកជំនាញអង្ករនៃស្ថានីយស្រាវជ្រាវអង្ករ ស្ថាប័នវិទ្យាសាស្ត្រកសិកម្មក្វាងស៊ី ជាអ្នកបង្រៀនដល់កសិករមូលដ្ឋាន ដើម្បីជាគ្រឹះល្អសម្រាប់ការអនុវត្ត និងផ្សព្វផ្សាយបច្ចេកទេសនាពេលក្រោយ។
សូមជម្រាបថាកាលពីខែមេសា ឆ្នាំ២០២៥ លោក ស៊ី ជីនពីង (Xi Jinping) ប្រធានាធិបតីនៃសាធារណរដ្ឋប្រជាមានិតចិន បានអញ្ជើញមកដល់ប្រទេសកម្ពុជាដើម្បីបំពេញទស្សនកិច្ចផ្លូវរដ្ឋយ៉ាងជោគជ័យ ហើយបានសម្រេចលទ្ធផលសំខាន់ៗជាច្រើន។ ថ្នាក់ដឹកនាំប្រទេសទាំងពីរបានឯកភាពកសាងសហគមន៍វាសនារួមកម្ពុជា-ចិន ក្នុងយុគសម័យថ្មី គ្រប់រដូវកាល។
ការកសាង ច្រករបៀងមច្ឆា និងអង្ករ ចិន-កម្ពុជា គឺជាកិច្ចព្រមព្រៀងសំខាន់មួយក្នុងចំណោមកិច្ចព្រមព្រៀងរបស់ថ្នាក់ដឹកនាំប្រទេសទាំងពីរ។ ការចុះហត្ថលេខា និងចាប់ផ្តើមការកសាងគម្រោងនេះគឺជាវិធានការសំខាន់ក្នុងការអនុវត្តកិច្ចព្រមព្រៀងរបស់ថ្នាក់ដឹកនាំ ពង្រឹងសហប្រតិបត្តិការកសិកម្មចិន-កម្ពុជា និងជំរុញការអភិវឌ្ឍន៍ឧស្សាហកម្មកសិកម្មប្រកបដោយចីរភាពនៅកម្ពុជា។

គម្រោងសហប្រតិបត្តិការឧស្សាហកម្មស្រូវទំនើប ច្រករបៀងមច្ឆា និងអង្ករ ចិន(ក្វាងស៊ី)-កម្ពុជា គឺជាគម្រោងជំនួយបច្ចេកទេសកសិកម្មក្រោមកិច្ចព្រមព្រៀងអន្តរក្រសួងរវាងរដ្ឋាភិបាលតំបន់ស្វយ័តក្វាងស៊ីរបស់ចិន និងក្រសួងកសិកម្ម រុក្ខាប្រមាញ់ និងនេសាទកម្ពុជា ដែលបានចុះហត្ថលេខានៅខែកញ្ញា ឆ្នាំ២០២៤។  
អង្គភាពគ្រប់គ្រងគម្រោងគឺក្រសួងកសិកម្ម និងជនបទតំបន់ស្វយ័តក្វាងស៊ី អង្គភាពសាងសង់គឺមជ្ឈមណ្ឌលគ្រប់គ្រងគម្រោងវិនិយោគក្រៅប្រទេសខេត្តក្វាងស៊ី អង្គភាពអនុវត្តគឺក្រុមហ៊ុនForword Agriculture Technology international Cooperation ក្វាងស៊ី ។ គម្រោងនេះ មានរយៈពេលអនុវត្ត២ឆ្នាំ ចាប់ពីខែមិថុនា ឆ្នាំ២០២៥ ដល់ខែមិថុនា ឆ្នាំ២០២៧ ៕

ដោយ៖ ប៊ុនរិទ្ធ