AKP កំពង់ធំ ថ្ងៃទី០៣ ខែមិថុនា ឆ្នាំ២០២៥ -- ឯកឧត្តម នួន ផារ័ត្ន អភិបាលខេត្តកំពង់ធំ បានដាក់វិធានការ ៣កុំ ដើម្បីទប់ស្កាត់ការចែកចាយ ប្រើប្រាស់គ្រឿងញៀនខុសច្បាប់ នៅក្នុងភូមិសាស្រ្តខេត្តកំពង់ធំទាំងមូល។ ឯកឧត្តមបានដាក់វិធានការនេះ ក្នុងកិច្ចប្រជុំផ្សព្វផ្សាយផែនការស្តីពីយុទ្ធនាការប្រយុទ្ធប្រឆាំងគ្រឿងញៀនខុសច្បាប់លើកទី១០ របស់រាជរដ្ឋាភិបាល និងស្តាប់របាយការណ៍ស្តីពីវឌ្ឍនភាពលើការងារប្រយុទ្ធប្រឆាំងគ្រឿងញៀនប្រចាំឆ្នាំ២០២៥ កាលពីរសៀលថ្ងៃទី០២ ខែមិថុនា ឆ្នាំ២០២៥។ 

វិធានការ៣កុំនោះគឺ៖ ១. កុំពាក់ព័ន្ធ គឺខ្លួនឯងមិនប្រើប្រាស់ បើសិនមានមន្ត្រីណាដែលពាក់ព័ន្ធត្រូវបណ្តេញចេញ និងប្រឈមមុខនឹងច្បាប់ក្នុងនាមជាអ្នកអនុវត្តច្បាប់។ ២. កុំបង្កបរិយាកាសសម្រាប់ការជួញដូរ ឬការចរាចរណ៍នានា។ ៣. កុំលើកលែងចំពោះបុគ្គលណាដែលប្រព្រឹត្តការជួញដូរ ឬប្រើប្រាស់សារធាតុញៀនខុសច្បាប់។

 
ឯកឧត្តម នួន ផារ័ត្ន បានមានប្រសាសន៍បញ្ជាក់ថា គណៈបញ្ជាការឯកភាពក្រុង-ស្រុកទាំងអស់ត្រូវប្រឹងប្រែងក្នុងការអភិវឌ្ឍបន្ថែម ព្រោះការអភិវឌ្ឍពិតជាសំខាន់ក្នុងការជួយមនុស្សឱ្យមានការងារធ្វើសេដ្ឋកិច្ចល្អ មនុស្សមានការយល់ដឹងនោះ ការអប់រំមនុស្សក៏ធ្វើឱ្យមានភាពងាយស្រួលដែរ។ គ្រឿងញៀនគឺជារបស់ដែលធ្វើឱ្យមានភាពចលាចលក្នុងសង្គម ភាពអសន្តិសុខរួមទាំងមូល។បើសិនជាមូលដ្ថានមិនមានការយកចិត្តទុកដាក់ទេនោះសង្គមជាតិ និងរងផលប៉ះពាល់ផងដែរ។

ឯកឧត្តមក៏បានធ្វើការណែនាំដល់អាជ្ញាធរតាមមូលដ្ឋាន ជាពិសេសកម្លាំងសមត្ថកិច្ចត្រូវធ្វើសកម្មភាពឱ្យបានខ្លាំងក្លាក្នុងការទប់ស្កាត់ការចែកចាយ និងប្រើប្រាស់គ្រឿងញៀនខុសច្បាប់ ហើយមិនត្រូវមានការស៊ុមគ្រលំ ឬពាក់ព័ន្ធខុសច្បាប់ជាមួយជនដែរប្រព្រឹត្តនោះទេ។ បើមានមន្រ្តីណាពាក់ព័ន្ធគឺត្រូវទទួលខុសត្រូវចំពោះមុខច្បាប់ ដោយគ្មានការយោគយល់នោះឡើយ៕

ដោយ ស៊ុម វណ្ណា