AKP ភ្នំពេញ ថ្ងៃទី០៣ ខែមិថុនា ឆ្នាំ២០២៥ -- យោងតាមញតិ្ដគាំទ្ររបស់រដ្ឋបាលរាជធានីភ្នំពេញ នាថ្ងៃអង្គារ ទី០៣ ខែមិថុនា ឆ្នាំ២០២៥ បញ្ជាក់ថា យើងខ្ញុំទាំងអស់គ្នា ក្នុងនាមក្រុមប្រឹក្សារាជធានីភ្នំពេញ គណៈអភិបាលរាជធានីភ្នំពេញ ថ្នាក់ដឹកនាំគ្រប់លំដាប់ថ្នាក់ មន្ត្រីរាជការ កងកម្លាំងប្រដាប់អាវុធគ្រប់ប្រភេទ និងក្នុងនាមប្រជាពលរដ្ឋទាំងអស់ក្នុងរាជធានីភ្នំពេញ សូមប្រកាសគាំទ្រយ៉ាងពេញទំហឹងលើយន្តការដោះស្រាយរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ក៏ដូចជាការអនុម័តគាំទ្រលើសេចក្តីថ្លែងការណ៍របស់រាជរដ្ឋាភិបាល ក្នុងអង្គសមាជរដ្ឋសភា និងព្រឹទ្ធសភា ក្រោមអធិបតីភាពដ៏ ខ្ពង់ខ្ពស់បំផុតរបស់សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងជាប្រធានក្រុមឧត្តមប្រឹក្សាផ្ទាល់ព្រះមហាក្សត្រនៃព្រះរាជាណាចក្រកម្ពុជា ចំពោះការដោះស្រាយបញ្ហាប្រាសាទតាមាន់ធំ ប្រាសាទតាមាន់តូច ប្រាសាទតាក្របី និងតំបន់មុំបី តាមផ្លូវច្បាប់ទៅតុលាការយុត្តិធម៌អន្តរជាតិ (ICJ) និងបន្តប្រើប្រាស់ឱ្យអស់លទ្ធភាពនូវយន្តការទ្វេភាគីដែលមានស្រាប់ រួមមាន គណៈកម្មការចម្រុះព្រំដែន (JBC) និងគណៈកម្មាធិការព្រំដែនទូទៅ (GBC) ដើម្បីរក្សា និងកសាងព្រំដែនមិត្តភាព សន្តិភាព សហប្រតិបត្តិការ និងការអភិវឌ្ឍជាប្រយោជន៍សម្រាប់ប្រទេស និងប្រជាជនទាំងពីរ។

ការដាក់ចេញនូវយន្តការដោះស្រាយនេះគឺជាឆន្ទៈរួមរបស់ប្រជាពលរដ្ឋ និងជាផែនការយុទ្ធសាស្ត្រប្រកបដោយគតិបណ្ឌិតដ៏ខ្ពង់ខ្ពស់បំផុតរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ក្នុងការដោះស្រាយ បញ្ហាព្រំដែនដោយសន្តិវិធី តាមយន្តការការទូត និងច្បាប់អន្តរជាតិ ប្រកបដោយភាពចាស់ទុំ "ត្រូវពន្លត់ភ្លើងជាជាងអង្គុយបក់ផ្សែង” ក្នុងកិច្ចការការពារដែនអធិបតេយ្យភាព និងបូរណភាពទឹកដីរបស់កម្ពុជា។ ទន្ទឹមនឹងនេះ ខ្ញុំបាទក៏សូមសម្តែងនូវការគោរពចំពោះអនុសាសន៍ដ៏ខ្ពង់ខ្ពស់បំផុតរបស់សម្តេចតេជោ ហ៊ុន សែន ក្នុងនាមជាអតីតនាយករដ្ឋមន្ត្រីដ៏អង់អាចឈ្លាសវៃដែលបានគាំទ្រ ចំណាត់ការរបស់រាជរដ្ឋាភិបាល និងបានផ្តល់នូវអនុសាសន៍ជូនរាជរដ្ឋាភិបាល ប្រកបដោយភាពចាស់ទុំ និងមុតស្រួចបំផុត ទាំងខាងនយោបាយ ការទូត និងយោធា ដែលធ្វើឱ្យប្រជាពលរដ្ឋទាំងក្នុង និងក្រៅប្រទេស មានទំនុកចិត្តខ្ពស់ អស់ក្តីព្រួយបារម្ភ និងរស់នៅប្រកបដោយភាពកក់ក្តៅបំផុត។

ជាថ្មីម្តងទៀត! យើងខ្ញុំទាំងអស់គ្នាសូមប្រកាសគាំទ្រយ៉ាងឱឡារិកចំពោះយន្តការដោះស្រាយដ៏ខ្ពង់ខ្ពស់បំផុតរបស់សម្តេចធិបតីនាយករដ្ឋមន្ត្រី ក៏ដូចជាការអនុម័តគាំទ្រលើសេចក្តីថ្លែងការណ៍ក្នុងអង្គសមាជរដ្ឋសភា និងព្រឹទ្ធសភា ក្នុងការធានាបាននូវសុខសន្តិភាព ស្ថេរភាព មិត្តភាព សហប្រតិបត្តិការ និងការអភិវឌ្ឍ តាមបណ្តោយបន្ទាត់ព្រំដែនឱ្យកាន់តែប្រសើរឡើង សំដៅធានាបាននូវអធិបតេយ្យជាតិ បូរណភាពទឹកដី និងព្រំដែនច្បាស់លាស់ និងសូមប្តេជ្ញាចូលរួមគាំទ្រយ៉ាងពេញទំហឹង ចំពោះយន្តការដោះស្រាយដ៏ខ្ពង់ខ្ពស់បំផុតនេះឱ្យបានម៉ឺងម៉ាត់បំផុត និងឥតងាករេ៕

ដោយ សួស សំរិត