AKP កំពង់ធំ ថ្ងៃទី០៣ ខែមិថុនា ឆ្នាំ២០២៥ -- លោក សាយ គឹមឡម អភិបាលស្រុកស្ទោង មានប្រសាសន៍លើកឡើងថា ការចុះបញ្ជីដីធ្លីលក្ខណៈជាប្រព័ន្ធគឺជាការយកចិត្តទុកដាក់ខ្ពស់ពីសំណាក់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជាលើសុខទុក្ខ សុខុមាលភាពរបស់ប្រជាពលរដ្ឋគ្រប់មូលដ្ឋាន ក្នុងឱកាសដែលលោក និងលោក អ៊ឹម សុឌីណា ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តកំពង់ធំ ព្រមទាំងលោក ហ៊ី សាយ ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តសៀមរាប បានអញ្ជើញជាអធិបតីភាពក្នុងពិធីប្រកាសកំណត់តំបន់ធ្វើការវិនិច្ឆ័យសម្រាប់ការចុះបញ្ជីដីធ្លីមានលក្ខណៈជាប្រព័ន្ធជូនពុកម៉ែបងប្អូនប្រជាពលរដ្ឋ នៅក្នុងឃុំរុងរឿង ស្រុកស្ទោង ខេត្តកំពង់ធំ នាព្រឹកថ្ងៃទី០៣ ខែមិថុនា ឆ្នាំ២០២៥។

ទន្ទឹមនឹងនេះ លោកអភិបាលស្រុកបានលើកទឹកចិត្តដល់អាជ្ញាធរឃុំរុងរឿងត្រូវធ្វើការផ្សព្វផ្សាយ និងណែនាំឱ្យបានទូលំទូលាយស្តីពីការចុះបញ្ជីដីធ្លីមានលក្ខណៈជាប្រព័ន្ធនេះជូនពុកម៉ែបងប្អូនប្រជាពលរដ្ឋនៅក្នុងមូលដ្ឋាន ជាពិសេសអ្នកដែលបានចំណាកស្រុក ដើម្បីលៃលកលទ្ធភាព ឬឱកាសជាក់ស្តែង ក៏ដូចជាការត្រៀមលក្ខណៈ និងឯកសារពាក់ព័ន្ធនានា ដូចជាអត្តសញ្ញាណប័ណ្ណ សៀវភៅគ្រួសារ សំបុត្របញ្ជាក់កំណើត ឬសំបុត្របញ្ជាក់អាពាហ៍ពិពាហ៍ជាដើម ឬឯកសារចាំបាច់ណាមួយដែលក្រុមបច្ចេកទេសចុះបញ្ជីត្រូវការ ក្នុងការចុះបញ្ជីឱ្យបានគ្រប់គ្រាន់ និងទាន់ពេលវេលា ដើម្បីក្រុមការងារបានធ្វើការនេះបានទៅតាមផែនការយុទ្ធសាស្ត្ររបស់រាជរដ្ឋាភិបាលអាណត្តិទី៧ ដែលនឹងបញ្ចប់នៅដំណាច់ឆ្នាំ២០២៥នេះ។

លោកអភិបាលស្រុកបានលើកទឹកចិត្តថែមទៀតដល់អាជ្ញាធរភូមិ ឃុំ ក៏ដូចជាអ្នកពាក់ព័ន្ធផ្សេងៗ និងប្រជាពលរដ្ឋដែលមានព្រំដីជាប់គ្នាត្រូវធ្វើការកំណត់ឯកភាពគ្នានូវព្រំរួម និងម្ចាស់ដីពាក់ព័ន្ធឱ្យបានរួចរាល់ជាស្រេចដើម្បីឱ្យក្រុមការងារចុះបញ្ជីបានធ្វើកិច្ចការនេះទៅបានដោយរលូននិងមិនមានការ បណ្ដឹង ឬទំនាស់ក្នុងពេលចុះអនុវត្ត ឬក្នុងពេលបិទផ្សាយជាដើម។

លោក សាយ គឹមឡម ក៏បានណែនាំដល់អាជ្ញាធរឃុំរុងរឿង និងជំនាញពាក់ព័ន្ធផ្សេងៗត្រូវបង្កលក្ខណៈងាយស្រួល និងសហការខ្ពស់ជាពិសេសរក្សានូវសន្តិសុខសណ្តាប់ធ្នាប់ជូនក្រុមការងារចុះបញ្ជីដីធ្លីលក្ខណៈជាប្រព័ន្ធនេះ ដែលពួកគាត់នឹងចុះអនុវត្តក្នុងពេលឆាប់ៗនេះដើម្បីមានសុវត្ថិភាព និងប្រព្រឹត្តទៅដោយរលូនតាមផែនការ។

សូមបញ្ជាក់ថា ឃុំរុងរឿងមានផ្ទៃដីសរុប១៣២៧ហិកតា ដែលក្នុងនោះមានដីលំនៅឋានចំនួន១៩៥,១៨ហិកតា និងផ្ទៃដីស្រែចំនួន ១១៦៨ហិកតា មានចំនួន៩ភូមិ និងមានប្រជាពលរដ្ឋសរុបចំនួន១៤៨០គ្រួសារ ស្មើនឹង៦៨៥៤នាក់៕

ដោយ ស៊ុម វណ្ណា