AKP សៀមរាប ថ្ងៃទី០១ ខែមិថុនា ឆ្នាំ២០២៥ – លោកវេជ្ជបណ្ឌិត ស៊ឹង រិទ្ទីរ៉េត អនុប្រធានមន្ទីរសុខាភិបាល ខេត្តសៀមរាប បានណែនាំក្រុមគ្រូពេទ្យទាំងអស់ត្រូវគោរពក្រមវិជ្ជាជីវៈឱ្យបានខ្ជាប់ខ្ចួន និងត្រូវខិតខំព្យាបាលអ្នកជំងឺប្រកប ដោយប្រសិទ្ធភាព និងស្មើភាព ព្រោះគ្រូពេទ្យជាអ្នកព្យាបាលអ្នកជំងឺ ដោយមិនគិតពីអ្វីផ្សេងពីនេះឡើយ ហើយការប្រកបរបរវិជ្ជាជីវៈសុខាភិបាលនេះ មានបញ្ហាប្រឈមច្រើន ដែលក្រុមគ្រូពេទ្យត្រូវប្រុងប្រយ័ត្នឱ្យបានខ្ពស់។ ការណែនាំបែបនេះ បានធ្វើឡើងនៅក្នុងពិធីបើកទិវាអភិវឌ្ឍន៍វិជ្ជាជីវៈវេជ្ជសាស្ត្របន្តលើកទី១៨ នៅព្រឹកថ្ងៃទី០១ ខែមិថុនា នៅខេត្តសៀមរាប។

លោកវេជ្ជបណ្ឌិត ស៊ឹង រិទ្ទីរ៉េត បានលើកឡើងថា ការគោរពបាននូវក្រមសីលធម៌វិជ្ជាជីវៈ នឹងជួយឱ្យគ្រូពេទ្យរួចផុតពីការប្រឈមទាំងនោះនិងជួយឲ្យគ្រូពេទ្យទទួលបាននូវគោរពប្រកបដោយកិត្តិយស និង សេចក្តីថ្នៃថ្នូរ។ លោកវេជ្ជបណ្ឌិតបន្តថា កន្លងមកតែងមានរឿងរ៉ាវច្រើនរវាងអ្នកជំងឺ និងគ្រូពេទ្យព្យាបាល ប៉ុន្តែបញ្ហាទាំងអស់នោះត្រូវបានកាត់បន្ថយបន្តិចម្តងៗ បន្ទាប់ពីក្រុមគ្រូពេទ្យបានប្រកាន់ខ្ជាប់នូវក្រមវិជ្ជាជីវៈនេះឯង។ បើទោះជាយ៉ាងនេះក្តី លោកអនុប្រធានមន្ទីរសុខាភិបាលរូបនេះ បានណែនាំដល់ក្រុមប្រឹក្សា  គណៈគ្រូពេទ្យខេត្តសៀមរាប ត្រូវខិតខំសហការគ្នាជាមួយមន្ទីរសុខាភិបាលខេត្ត ធ្វើការចុះពិនិត្យនៅតាមបណ្តាសេវាកម្មសុខាភិបាលនានា ដើម្បីពង្រឹងវិស័យសុខាភិបាលក្នុងខេត្តសៀមរាបឱ្យកាន់តែប្រសើរថែមទៀត។

លោកវេជ្ជបណ្ឌិត អ៊ុយ ចាន់ថុល ប្រធានក្រុមប្រឹក្សាគណៈគ្រូពេទ្យខេត្តសៀមរាប បានឱ្យដឹងថា ការរៀបចំទិវាវេជ្ជសាស្ត្រនេះជាការធ្វើឱ្យប្រសើរឡើងនូវចំណេះជំនាញរបស់អ្នកប្រកបវិជ្ជាជីវៈសុខាភិបាល ។ ការចូលរួមទិវាអភិវឌ្ឍន៍វិជ្ជាជីវៈវេជ្ជសាស្ត្របន្តក៏ដូចជាចូលរួមសិក្ខាសាលាវិជ្ជាជីវៈសុខាភិបាលផ្សេងៗ ក៏ដើម្បីបំពេញពិន្ទុសម្រាប់បន្តសុពលភាពរបស់លោកគ្រូអ្នកគ្រូពេទ្យផងដែរ។ លោកវេជ្ជបណ្ឌិត អ៊ុយ ចាន់  ថុល ថា សព្វថ្ងៃមិនត្រឹមតែសេវាឯកជនទេ ដែលរងពាក្យបណ្ដឹង សូម្បីតែពេទ្យរដ្ឋ ពេទ្យអង្គការមិនយកកម្រៃ ក៏រងពាក្យបណ្ដឹងដែរ។ ដូច្នេះដើម្បីឱ្យការប្រព្រឹត្តរបស់អ្នកប្រកបវិជ្ជាជីវៈសុខាភិបាលកាន់តែប្រសើរ ទាមទាឱ្យគ្រូពេទ្យទាំងអស់គោរពក្រមសីលធម៌ ខិតខំរៀនសូត្របន្តពង្រឹងចំណេះដឹងខ្លួនឯង ចូលរួមទិវាអភិវឌ្ឍន៍វិជ្ជាជីវៈវេជ្ជសាស្ត្របន្ត ក៏ដូចជាចូលរួមសិក្ខាសាលាវិជ្ជាជីវៈសុខាភិបាលផ្សេងៗដើម្បីបំពេញពិន្ទុ និងបន្តសុពលភាពផងដែរ។

សូមជម្រាបថា ក្រុមប្រឹក្សាគណៈគ្រូពេទ្យខេត្តសៀមរាប ដោយមានការគាំទ្រពីគណៈគ្រូពេទ្យជាតិ និងមន្ទីរសុខាភិបាល នៃរដ្ឋបាលខេត្តសៀមរាប តែងតែរៀបចំទិវាអភិវឌ្ឍន៍វិជ្ជាជីវៈវេជ្ជសាស្ត្របន្តក្នុងមួយឆ្នាំចំនួ២ដង ក្នុងគោលបំណងចែករំលែកនូវបទពិសោធន៍ និងស្វែងរកនូវចំណេះដឹងថ្មីៗពាក់ព័ន្ធនឹងវិជ្ជាជីវៈវេជ្ជសាស្ត្រ៕

ដោយ៖ ឃុត សៅ