AKP ភ្នំពេញ ថ្ងៃទី៣១ ខែឧសភា ឆ្នាំ២០២៥ -- ការតភ្ជាប់ប្រជាជន និងប្រជាជន រវាងកម្ពុជា-ជប៉ុន ឱ្យកាន់តែស្និទ្ធមានច្រើនបែបច្រើនយ៉ាង។ គ្រាន់តែតាមរយៈកិច្ចសហប្រតិបត្តិការវិស័យអប់រំមួយក្នុងរយៈពេលជាង៣០ឆ្នាំមកនេះ ជប៉ុន បានផ្តល់អាហារូបករណ៍ដល់កម្ពុជាជិត ២០០០នាក់ ឱ្យសិក្សានៅជប៉ុន។ នេះតាមការថ្លែងឱ្យដឹងពី ឯកឧត្តម តាន់ ហ្សង់ហ្វ្រង់ស័រ។

ក្នុងសន្និសីទសារព័ត៌មាន ស្តីពីលទ្ធផលនៃដំណើរទស្សនកិច្ចការងារផ្លូវការ របស់ សម្ដេចធិបតី នៅប្រទេសជប៉ុន នាព្រលប់ថ្ងៃទី៣១ ខែឧសភា ឆ្នាំ២០២៥នេះ ឯកឧត្តម តាន់ ហ្សង់ហ្វ្រង់ស័រ រដ្ឋមន្ត្រីប្រតិភូអមនាយករដ្ឋមន្ត្រី ទទួលលបន្ទុកកិច្ចការការបរទេស និងសហប្រតិបត្តិការអន្តរជាតិ បានថ្លែងឱ្យដឹងទៀតថា កម្ពុជា និងជប៉ុន បានឯកគ្នាបន្តកិច្ចសហប្រតិបត្តិការគ្នាដែលមានស្រាប់លើវិស័យសន្តិសុខ មានជាអាទិ៍ តាមរយៈការកសាងសមត្ថភាព និងការចែករំលែកព័ត៌មាន ដើម្បីបន្តប្រយុទ្ធប្រឆាំងនឹងឧក្រិដ្ឋកម្មឆ្លងដែន។ 

សម្តេចបវរធិបតី ហ៊ុន ម៉ាណែត និងនាយករដ្ឋមន្ត្រីជប៉ុន ក៏បានឯកភាពរួមគ្នា ដើម្បីជំរុញភាពជាដៃគូយុទ្ធសាស្ត្រគ្រប់ជ្រុងជ្រោយកម្ពុជា និងជប៉ុន ឱ្យកាន់តែស៉ីជម្រៅ ក្នុងគោលដៅនាំមកនូវកំណើនសុខុមាលភាពវិបុលភាពរួម ដើម្បីផ្តល់សន្ទុះថ្មីថែមទៀតដល់ទំនាក់ទំនងកម្ពុជា និងជប៉ុន៕

ដោយ៖ គង់ សិរីរ័ត្ន, រូបថត៖ ហុង ម៉េងឡុង