AKP ភ្នំពេញ ថ្ងៃទី៣១ ខែឧសភា ឆ្នាំ២០២៥ -- កម្ពុជា-ជប៉ុនកាន់តែរឹតចំណងទាក់ទាងគ្នាជិតស្និទ្ធដោយឈរលើកិច្ចសហប្រតិបត្តិការយុទ្ធសាស្ត្រគ្រប់ជ្រុងជ្រោយ។ ក្នុងដំណើរទស្សនកិច្ចការងារផ្លូវការ របស់សម្ដេចនាយករដ្ឋមន្ត្រីកម្ពុជា នៅទីក្រុងតូក្យូ ប្រទេសជប៉ុន ប៉ុន្មានថ្ងៃកន្លងទៅនេះ សមភាគីទាំងពីរបានជំរុញការភ្ជាប់ទំនាក់ទំនងលើវិស័យជាច្រើនសម្រាប់ប្រយោជន៍ទៅវិញទៅមកនៃប្រទេសទាំងពីរ។

ឯកឧត្តម តាន់ ហ្សង់ហ្វ្រង់ស័រ រដ្ឋមន្ត្រីប្រតិភូអមនាយករដ្ឋមន្ត្រី ទទួលលបន្ទុកកិច្ចការការបរទេស និងសហប្រតិបត្តិការអន្តរជាតិ បានគូសបញ្ជាក់ក្នុងសន្និសីទសារព័ត៌មាន ស្តីពីលទ្ធផលនៃដំណើរទស្សនកិច្ចការងារផ្លូវការ របស់ សម្ដេចធិបតី នៅប្រទេសជប៉ុន នាព្រលប់ថ្ងៃទី៣១ ខែឧសភា ឆ្នាំ២០២៥នេះថា នាយករដ្ឋមន្ត្រីកម្ពុជានិងជប៉ុន បានជំរុញទាំងវិស័យរដ្ឋនិងឯកជន ដើម្បីបង្កើនការវិនិយោគនៅកម្ពុជា។ជាក់ស្ដែងដូចជា ការដាក់ចេញនូវកញ្ចប់សេដ្ឋកិច្ចរួមកម្ពុជា-ជប៉ុន ដើម្បីផ្ដល់សម្ទះថ្មីនៃការវិនិយោគនៅកម្ពុជា។

ឯកឧត្តម តាន់ ហ្សង់ហ្វ្រង់ស័រ បានថ្លែងឱ្យដឹងថា «នៅថ្ងៃ២៩ឧសភា ថ្នាក់ដឹកនាំក្រុមហ៊ុនជប៉ុនចំនួនជាង២០០ដែលចាប់អារម្មណ៍លើស្ថានភាពអំណោយផលកាន់តែខ្លាំងឡើងនៃការវិនិយោគនៅកម្ពុជាសុទ្ធតែមកចូលរួមស្ដាប់សុន្ទរកថារបស់សម្ដេចធិបតី នៅក្នុងវេទិកាធរកិច្ចកម្ពុជា-ជប៉ុន»។ 
នៅលើវេទិកាធុរកិច្ចនេះ ក៏ដូចក្នុងឱកាសជំនួបសម្ដែងការគួរសមពីសំណាក់ក្រុមហ៊ុនជប៉ុននានាទាំងអស់ចំនួន១២ សម្ដេចបវរធិបតីបន្តទាក់ម៉ូយ សម្ដេចថ្លែងប្រាប់វិស័យឯកជនជប៉ុនថា «កម្ពុជាមានច្បាប់វិនិយោគសេរី កម្ពុជាមានយន្តការពិគ្រោះយោបល់ទៀងទាត់ជាមួយធុរជនបរទេស កម្ពុជាបាននិងកំពុងបន្តសម្រួលបរិយាកាសនៃការវិនិយោគបរទេស កម្ពុជាបើកចំហជានិច្ចដើម្បីទទួលក្រុមហ៊ុនបរទេសពិសេសក្រុមហ៊ុនជប៉ុន»។
ដោយឡែកហេដ្ឋារចនាសម្ព័ន្ធនិងការតភ្ជាប់ក៏ជាប្រធានបទសំខាន់មួយដែលសម្ពេចធិបតី និងសមភាគីរបស់សម្ដេចលើកមកពិភាក្សា ក្នុងន័យនេះ សម្ដេចអរគុណមិត្តជប៉ុនចំពោះការបន្តជួយអភិវឌ្ឍន៍កំពង់ផែក្រុងព្រះសីហនុ ឱ្យក្លាយទៅជាកំពង់ផែនិងមជ្ឈមណ្ឌលភស្តុភាកម្មក្នុងតំបន់។ ទន្ទឹមនេះ នាយករដ្ឋមន្ត្រីកម្ពុជា និងនាយករដ្ឋមន្ត្រីជប៉ុនឯកភាពគ្នាជំរុញការតភ្ជាប់ប្រជាជននិងប្រជាជនឱ្យកាន់តែស្និទ្ធតាមរយៈកិច្ចសប្រតិបត្តិការ អប់រំ ការងារ និងទេសចរណ៍៕

ដោយ៖ គង់ សិរីរ័ត្ន, រូបថត៖ ហុង ម៉េងឡុង