AKP កំពង់ធំ ថ្ងៃទី២៩ ខែឧសភា ឆ្នាំ២០២៥ -- លោក សាយ គឹមឡម អភិបាលស្រុក និងជាប្រធានកិត្តិយសសមាគមអតីតយុវជនកម្ពុជាស្រុកស្ទោង បានមានប្រសាសន៍ថា ការផ្ដល់ថវិកាបេឡាមរណសង្គ្រោះជូនដល់គ្រួសារពលីគឺជាការយកចិត្តទុកដាក់ខ្ពស់របស់សមាគមអតីតយុទ្ធជនកម្ពុជា និងរាជរដ្ឋាភិបាល ក្នុងឱកាសដែលលោក និងសហការីបានអញ្ជើញប្រគល់ថវិកាបេឡាមរណសង្គ្រោះជូនគ្រួសារពលី ស្ថិតនៅក្នុងភូមិសំបួរ ឃុំពពក ស្រុកស្ទោង ខេត្តកំពង់ធំ នារសៀលថ្ងៃទី២៩ ខែឧសភា ឆ្នាំ២០២៥។

ក្នុងឱកាសនោះ លោក សាយ គឹមឡម បានពាំនាំនូវការផ្ដាំសួរសុខទុក្ខពីសំណាក់ឯកឧត្តម នួន ផារ័ត្ន អភិបាលខេត្តកំពង់ធំ និងលោកជំទាវ ព្រមទាំងសម្ដេចអគ្គមហាសេនាបតីតេជោហ៊ុន សែន ប្រធានសមាគមអតីតយុទ្ធជនកម្ពុជា និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន  សម្ដេចមហាបវរធិបតីហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវ ពេជ ចន្ទមុន្នី ដែលសម្ដេចតែងតែគិតគូរ និងយកចិត្តទុកដាក់ដល់អតីតយុវជនកម្ពុជា និងក្រុមគ្រួសារគ្រប់ពេលវេលា។

ជាការចូលរួមរំលែកទុក្ខជាមួយក្រុមគ្រួសារសព លោកអភិបាលស្រុកបានលើកឡើងថា ការប្រគល់ថវិកាបេឡាមរណសង្គ្រោះជូនដល់គ្រួសារសពអតីតយុទ្ធជនកម្ពុជានិងគ្រួសារពលីគឺជាការយកចិត្តទុកដាក់ខ្ពស់ពីប្រមុខរាជរដ្ឋាភិបាល និងគាំពារសេដ្ឋកិច្ចគ្រួសារ និងជាការថ្លែងអំណរគុណដល់គ្រួសារសពដែលបានបញ្ជូនសាច់ញាតិ សមាជិក គ្រួសារ និងពលីសព្វបែបយ៉ាងទាំងសាច់ស្រស់ឈាមស្រស់ ព្រមទាំងអាយុជីវិតដើម្បីបុព្វហេតុជាតិ សាសនា ព្រះមហាក្សត្រ ហើយនេះក៏ជាគោលនយោបាយ របស់រាជរដ្ឋាភិបាលកម្ពុជាដែលតែងតែយកចិត្តទុកដាក់លើគ្រួសារពលី និងអតីតយុទ្ធជនកម្ពុជាគ្រប់កាល:ទស:។

ទន្ទឹមនឹងនេះ លោកអភិបាលស្រុកបានណែនាំដល់អាជ្ញាធរភូមិ/ឃុំ ត្រូវបង្កើនការយកចិត្តទុកដាក់ខ្ពស់ថែមទៀតក្នុងការផ្ដល់សេវាជូនប្រជាពលរដ្ឋប្រកបដោយទំនុកចិត្តខ្ពស់មានភាពងាយស្រួល និងឆាប់រហ័ស និងមានទំនួលខុសត្រូវចំពោះប្រជាពលរដ្ឋ និងរាជរដ្ឋាភិបាលនិងបាននាំយកថវិកាបេឡាមរណសង្គ្រោះចំនួន៤លានរៀល ជូនដល់គ្រួសារពលីគឺលោក យាយ អ៊ឹម លី ដែលបានទទួលមរណភាពកាលពីថ្ងៃទី២៦ ខែឧសភា ឆ្នាំ២០២៥កន្លងទៅថ្មីៗនេះនៅឃុំពពក ស្រុកស្ទោង ខេត្តកំពង់ធំ ដោយរោគាពាធក្នុងជន្មាយុ៨៤ឆ្នាំ៕

ដោយ ស៊ុម វណ្ណា