AKP កំពង់ធំ ថ្ងៃទី២៩ ខែឧសភា ឆ្នាំ២០២៥--

លោក សាយ គឹមឡម អភិបាលស្រុកស្ទោង បានលើកទឹកចិត្តដល់គណៈកម្មការលទ្ធកម្មឃុំត្រូវធ្វើផែនការវិនិយោគរបស់ខ្លួន ដោយផ្ដោតលើគុណភាព បរិមាណ និងតម្រូវការជាអាទិភាពរបស់ប្រជាពលរដ្ឋក្នុងមូលដ្ឋាន ក្នុងឱកាសអញ្ជើញជាអធិបតីភាពក្នុងពិធីដេញថ្លៃគម្រោងមូលនិធិឃុំឆ្នាំ២០២៥ នៅសាលាឃុំប្រឡាយ ស្រុកស្ទោង ខេត្តកំពង់ធំ កាលពីថ្ងៃទី២៨ ខែឧសភា ឆ្នាំ២០២៥។

លោកអភិបាលស្រុកបានមានប្រសាសន៍ថា ការកសាងគម្រោងមូលនិធិ ឬក៏គម្រោងស្ថាបនានានា ជាពិសេសការធ្វើផ្លូវត្រូវបើកឱ្យបានធំទូលាយ ដើម្បីធានានូវផ្លូវដែលធ្វើចរាចរណ៍ប្រកបដោយសុវត្ថិភាពមិនមានការស្ទះ សំណង់មានគុណភាពប្រើប្រាស់បានយូរថែមទាំងប្រព័ន្ធរំដោះទឹកត្រឹមត្រូវហើយត្រូវសិក្សាបន្ថែមទៀតនូវប្រព័ន្ធលូដែលអាចរំដោះទឹកបានលឿន និងជាប្រភេទលូប្រអប់នៅតាមអូរឬប្រឡាយចាស់ៗដើម្បីបញ្ចៀសការកកស្ទះ ឬបញ្ចៀសទឹកជំនន់ ថែមទាំងជួយការពារផ្លូវកុំឱ្យឆាប់ខូចខាត ឬដាច់ដោយទឹកជំនន់ជាដើម។ គណៈកម្មការលទ្ធកម្មឃុំត្រូវធ្វើសេចក្តីជូនដំណឹងដល់ប្រជាពលរដ្ឋដែលរស់នៅអមសងខាងផ្លូវដែលត្រូវកសាងឱ្យបានទូលំទូលាយ ដើម្បីបានជ្រាបនិងចូលរួមសហការ ជាពិសេសត្រូវធ្វើការតាមដានឱ្យបានម៉ត់ចត់នូវដំណើរការស្ថាបនា ដើម្បីចៀសវាងនូវបញ្ហាផ្សេងៗជាពិសេស ដើម្បីទទួលបាននូវផ្លូវដែលប្រកបដោយបទដ្ឋានបច្ចេកទេសតាមកិច្ចសន្យានិងជាផ្លូវដែលមានគុណភាពប្រើប្រាស់បានយូរអង្វែង។

ទន្ទឹមនឹងនេះ លោកអភិបាលស្រុកបានណែនាំដល់អ្នកដែលទទួលការកសាងផ្លូវនេះត្រូវខិតខំពន្លឿនធ្វើផ្លូវនេះឱ្យបានឆាប់រហ័សតាមដែលអាចធ្វើទៅបានជាពិសេសឱ្យទាន់ដើមរដូវវស្សាឆ្នាំនេះហើយអនុវត្តតាមកិច្ចសន្យានិងបច្ចេកទេសសំណង់ដើម្បីធានានូវសំណង់ដែលមានគុណភាពខ្ពស់។

សូមបញ្ជាក់ថា ផ្លូវដែលដាក់ឱ្យដេញថ្លៃនៅក្នុងឱកាសនេះមានប្រវែង៥គីឡូម៉ែត្រ ទទឹង៥ម៉ែត្រ និងកម្រាស់០,១៥ម៉ែត្រ និងមានថវិកាប៉ាន់ស្មានសរុប៤២៣៧១៨១០៥រៀល មានលូរំដោះទឹកកាត់ផ្លូវ៥លូ និងស្លាកឈ្មោះគម្រោង០១ផ្ទាំងឆ្លងកាត់គ្របដណ្តប់លើ៦ភូមិ៕

ដោយ ស៊ុម វណ្ណា